VOV4.Êđê - Adôk ka bŏ 1 mlan truh yơh klei bi lông hriăm jih 3, ti čar Kon Tum hlăm wưng mjêč anei, dŭm anôk bruă sang hră dôk mđĭ ktang klei bi hriăm leh anăn mprăp ai tiê đru kơ hđeh sang hră ngă jăk klei bi lông. Klei bi lông giăm jih gưl 3 thŭn anei čar Kon Tum mâo êbh 4.700 čô hđeh čih anăn bi lông. Čiăng lač djŏ kơ klei thâo phung hđeh, Knơ̆ng bruă sang hră mtô bi hriăm čar Kon Tum gĭt gai dŭm sang hră mkŏ mjing mkŏ mjing kơ jih jang hđeh adŭ 12 lông bi lông čiăng ktuê dlăng, hmao mbŏ, mkra mlih mta phŭn hriăm čiăng đru kơ hđeh păn kjăp klei thâo. Knơ̆ng bruă sang hră mtô bi hriăm čar Kon Tum mĭn tĭng mkŏ mjing 12 anôk bi lông, hŏng 203 adŭ bi lông, 41 adŭ dôk guôn leh anăn mkăp. Čiăng kơ klei bi lông êđăp ênang, djŏ hdră kčah, Anôk bruă gĭt gai klei bi lông hriăm jih gưl 3 thŭn 2022 čar Kon Tum ăt mâo leh hdră rơ̆ng êđăp ênang kơ hđeh krĭng taih kbưi hlăm hdră nao bi lông leh anăn đih pĭt, huă ƀơ̆ng. Dăp dŭm anôk djŏ guôp hŏng boh sĭt găl ênưih kơ hđeh bi lông./.

H’ Zawut pô mblang