VOV4.Êđê- Leh angĭn êbŭ mrô 4, ti kdriêk Tu Mơ Rông, čar Kon Tum lŏ dơ̆ng mâo êa prŏng mơ̆ng akŏ êa krông kluh hriê ngă bi ktlah ti 3 să hlăm kdriêk Tu Mơ Rông mâo: Măng Ri, Đăk Na leh anăn Đăk Sao. Tlâo să anei ară anei mâo ênoh mnuih ƀuôn sang hlăm brô êbeh 8000 čô mnuih. Êngao ti să Tê Xăng, kyua klưh lăn nah dlông êlan, boh tâo săr dơr êlan anăn 147 gŏ êsei mnuih ƀuôn sang ti alŭ Tu Thó bi ktlah hjăn.

 Võ Trung Mạnh,  Khua Knơ̆ng bruă sang čư̆ êa kdriêk Tu Mơ Rông brei thâo, bruă sang čư̆ êa alŭ wăl iêô jak leh dŭm êpul mjêč msir mgaih. Klă klơ̆ng, hŏng Măng Ri, Knơ̆ng bruă sang čư̆ êa kdriêk gĭt gai lĭng kahan, mnuih ƀuôn sang, êdam êra đru mnuih ƀuôn sang dŭ êdeh găn anôk êlan êa đung. Ară anei knŏng adôk alŭ Tu Thó, să Tê Xăng bi ktlah hjăn. Êpul bruă djŏ tuôm dôk mjêč msir mgaih hnưm hĭn./.

Pô mblang: H’Zawut Ƀuôn Yă