VOV4.Êđê - Êpul djŏ tuôm kdriêk Kon Plŏng, čar Kon Tum dôk mjêč tui ksiêm boh klei bi rai dliê mrâo hmao ƀuh ti wăl krah Măng Đen. Klei hưn tal êlâo dưi thâo, Anôk bruă sang čư̆ êa wăl krah Măng Đen hmao ƀuh hlăm hruê 3/3/2022 ti alŭ 2, 3, wăl dliê 11, čuê dliê 486, mâo Anôk bruă sang čư̆ êa wăl krah Măng Đen kriê dlăng. Truh hruê 8/3/2022 dŭm êpul djŏ tuôm mơ̆ng kdriêk Kon Plŏng nao ksiêm dlăng leh anôk anei, ƀuh mâo 26 phŭn kyâo arăng koh druôm, mâo: Xoan mộc, Máu chó, Bời lời vàng, Xoan ta hlăm êpul V lehanăn êpul VI. Boh prŏng kyâo arăng bi rai mơ̆ng 30 cm -80cm.

Grăp phŭn kyâo diñu knŏng uă mă kdrêč prŏng hĭn giăm phŭn, dŭm kyâo adôk lui tinăn. Gru đoh ktŭng kyâo ƀuh ti anôk koh uă kyâo anei nao phă kdriêk Kon Braih. Ară anei, klei bi rai dliê anei mâo Anôk bruă kahan ksiêm kdriêk Kon Plŏng lehanăn Anôk bruă dliê kmrơ̆ng kdriêk Kon Plŏng, čar Kon Tum mjêč ksiêm dlăng./.

H’Nêč pô mblang