VOV4.Êđê - Ti čar Kon Tum, sa Êpul hgŭm bruă mta mrâo ngă bruă mnia blei êa drao - hiu čhưn ênguê mâo phung bi hgŭm mlir čar hưn mdah ngă bruă ti să dleh dlan hĭn Măng Ri, kdriêk Tu Mrông. Êpul hgŭm bruă ana êa drao hiu čhưn ênguê Ngọc Linh H80 mâo 172 čô hgŭm, hlăm anăn 50% čô jing mnuih djuê ƀiă leh anăn lu phung hruê mơ̆ng dŭm čar ƀuôn prŏng mkăn. Anei jing Êpul hgŭm bruă mâo lu phung hgŭm hĭn mơ̆ng čar Kon Tum ngă bruă mnia blei bruă anei leh anăn jing gru hmô phŭn mơ̆ng kdriêk Tu Mrông.

Êpul hgŭm bruă kčah hdră kñăm mkăp hdră djŏ tuôm mkra mjing kơ phung hgŭm; đru kơ phung ba čhĭ mnơ̆ng lŏ hma; ktrâo lač kơ phung hgŭm mkra mjing mâo djăp hnơ̆ng mnơ̆ng dhơ̆ng, tŭ dưn; đru kơ phung hgŭm bi leh klei thâo kriê dlăng hdră mkra mjing, hdơ̆ng bi đru plah wah phung hgŭm leh anăn Êpul hgŭm bruă ăt msĕ mơh plah wah Êpul hgŭm bruă hŏng êpul êya alŭ wăl. Truh ară anei čar Kon Tum mâo 218 Êpul hgŭm bruă leh anăn 1 Êpul bi hgŭm Êpul hgŭm bruă. Ênoh prăk ngă bruă, ênoh mnơ̆ng dhơ̆ng mơ̆ng dŭm êpul hgŭm bruă mâo 275 êklai prăk. Boh sĭt brei ƀuh dŭm êpul hgŭm bruă ƀrư̆ hruê ƀrư̆ pral hĭn hŏng klei bhiăn anôk ba čhĭ, čŏng ngă hlăm bruă mkŏ mjing ngă bruă leh anăn mâo klei đru mguôp klă sĭt kơ bruă mđĭ kyar bruă duh mkra- ala ƀuôn toi čar Kon Tum./.

H’ Zawut pô mblang