VOV4.Êđê - Čar Kon Tum ară anei mâo êbeh 6.200 čô mnuih amâo jăk asei mlei lehanăn lu hlăm ênoh mnuih amâo myun anei gĭr hgao leh klei dleh dlan, gĭr ktưn kpưn đĭ hlăm klei hdĭp pô.

Amai Nguyễn Thị Kim Cúc, 49 thŭn brei thâo, 23 thŭn êlâo hŏng dua ƀĕ jơ̆ng ñu amâo mâo dưi êbat hiu ôh, amai mơ̆ng ƀuôn sang ñu pô ti Bình Định đuĕ nao dôk kơ Kontum duah ƀơ̆ng. Găn hŏng lu mta bruă mă, dơ̆ng mơ̆ng să jal, ñuăl, să ao mđao... čiăng duah ƀơ̆ng hlăm grăp hrue, lehanăn mâo mkuôm pioh dưi pŏk anôk mă bruă čhĭ mnia. Amâo mâo djŏ knŏng kpưn đĭ duah klei hdĭp hjăn kơ pô đuič ôh, ƀiădah ñu lŏ duh mĭn rông ba wăt amĭ ama, lehanăn adei êkei hlăk dôk hlăm klei djiu djuăm duam ruă ti ƀuôn sang pô. Leh kơ anăn ñu lŏ đru dua čô mnuih hlăm alŭ wăl mâo bruă knuă mă mơh. Yăl dliê kơ bruă mă, lehanăn klei hdĭp pô snei: “Asei mlei kâo pô si srăng ngă čiăng dưi hdĭp jăk, snăn čŏng pô yơh brei mâo klei thâo uêñ mĭn, thâo duah ƀơ̆ng, hdĭp jăk ênuah ênô. Čhĭ mnia bi mâo ai tiê ênuah, snăn kơh mnuih riêng gah dlăng kơ pô hŏng klei jăk, lehanăn hriê blei mnơ̆ng pô čhĭ. Bi tơdah pô hdĭp amâo klei ênuah ênô ôh, čhĭ mnia mĭn kơ klei ƀơ̆ng đĭ, snăn phung ƀuôn sang amâo mâo jĕ êrô hŏng pô ôh. Hdĭp thâo dôk dơ̆ng ƀơ̆ng huă jăk anăn yơh jing tal êlâo. Tuôm hĕ hŏng klei amâo mâo jăk asei mlei snei, snăn brei pô hdĭp bi mâo klei knhuah jăk”.

Pap ƀuh kơ klei hdĭp pô čhĭ mnơ̆ng, mâo lu mnuih nao bi blei mưng leh hŏng gơ̆, snăn čong nao mŭt ruah mă mnơ̆ng ya dŏ pô čiăng blei. Nguyễn Thị Lan, sang ti êpul mrô 3, ƀuôn hgŭm Duy Tân, sa čô mưng juăt leh hlăm bruă hriê blei mnơ̆ng gơ̆, mâo leh lu knhuah ngă bŏ hŏng klei jăk hŏng pô čhĭ mnơ̆ng anei:“Amai Trúc anăn hĕ. Čhĭ mnia thâo blŭ tlao snăk, jih ai tiê. Ƀiădah boh sĭt jing gơ̆ čhĭ êlưih hĭn kơ anôk mkăn snăn lu snăk mnuih hriê blei mnơ̆ng gơ̆. Amai Trúc jing mnuih kreh kriăng. Ƀuh jing mnuih tŭ lu klei dleh, lehanăn gơ̆ bŏ hŏng klei kriăng, doh, kyuanăn yơh mâo jih mnuih khăp lehanăn mpŭ, mâo lu mnuih hriê blei mnơ̆ng tinei”.

Grăp čô mnuih găn hlăm sa klei hdĭp mdê mdê, mâo hĕ klei amâo mâo jăk hlăm asei mlei, ƀiădah hlăm ênoh êbeh 6 êbâo 200 čô mnuih amâo mâo jăk asei mlei ti čar Kontum lu jing mâo leh sa klei hdĭp jăk yâo. Ƀuh sa klei msĕ hlăm digơ̆ anăn jing klei kreh kriăng, klei thâo gĭr kpưn đĭ hlăm klei hdĭp, mâo klei đăo knang lehanăn hdĭp yâo mơak. Amai Phạm Thị Hồng Hương, 53 thŭn, sang tri alŭ mrô 6, să Đoàn Kết, ƀuôn prŏng Kontum mâo klei amâo mâo jăk asei mlei mơ̆ng điêt, ƀiădah ară mâo leh čô, gơ̆ ăt gĭr ktir mă bruă knuă:  “Hŏng djăp mta bruă ya dŏ dưi ngă, snăn kâo gĭr ngă jih. Aguah ưm hŭl điŏ ba čhĭ ti sang hră. Leh wĭt kơ sang nao khăt rơ̆k kơ êmô, lehanăn mčiêm ŭn. Mmông wăn nao čăp hla knih hlăm Êpul Tự Lực. Tlam wĭt lŏ kčoh čhum ao tĭ. Snăn ya mta bruă dưi ngă kñăm đru mdul kơ klei hdĭp, mâo ba wĭt prăk ƀ’ƀiă đru kơ gŏ sang anak čô kâo ngă jih, bi aê ñu ară anei kăn suaih rei. Klei kâo dôk hmăng hmưi ară anei hŏng jih jang mnuih amâo mâo jăk asei mlei brei thâo gĭr mơak hdĭp, amâo mâo klei hêñ mlâo ênguôt hnĭng ôh hlăm klei hdĭp. Čŏng asei mlei pô ya bruă dưi ngă snăn pô ngă yơh hrăm mbĭt hlăm klei hdĭp hŏng jih jang mnuih”.

Mrâo anei, Êpul hgŭm bruă răng mgang klei dưi êngiê phung hđeh, lehanăn răng mgang kơ phung amâo mâo jăk asei mlei čar Kontum mkŏ mjing leh klei bi kƀĭn mpŭ mni kơ phung amâo mâo jăk asei mlei bŏ hŏng klei thâo gĭr. Aduôn Nguyễn Thị Ánh, Khua êpul hgŭm lač:“Klei bi kƀĭn tal anei hmei mâo truh 100 čô pô bi ala jing mnuih amâo mâo jăk asei mlei hriê mơ̆ng jih jang dŭm kdriêk, ƀuôn prŏng. Phung mâo klei kdlưn hĭn ti anei jing phung đa đa mâo leh klei dưi đru, đa đa ka tuôm mâo klei đru kơ digơ̆ ôh, ƀiădah klei yuôm bhăn êdi jing digơ̆ bŏ hŏng klei thâo gĭr čŏng kpưn đĭ tlaih mơ̆ng klei dleh dlan. Hlăm grăp blư̆ mâo klei bi kƀĭn jing lŏ mâo klei bi mđĭ ai prŏng snăk. Phung nao ti anôk bi kƀĭn ba hriê lu klei bi mđĭ ai hdơ̆ng găp mâo lu mnuih ngă dŭm bruă bi hmô, mnuih jăk bruă jăk, čiăng lŏ dơ̆ng ba hriê dŭm mta bruă yuôm bhăn bi đru hŏng mnuih riêng gah mđrăm mbĭt hŏng pô kpưn đĭ mơh”.

Mơ̆ng akŏ thŭn truh kơ ară anei, hjăn Êpul hgŭm Răng mgang klei dưi êngiê phung hđeh, lehanăn răng mgang mnuih amâo mâo jăk asei mlei hlăm čar mâo mđup brei leh 4 boh sang bi đru hŏng ênoh truh 125 êklăk prăk, đru truh 10 drei êmô ana mđai kơ gŏ sang mnuih amâo mâo jăk asei mlei mâo klei hdĭp dleh dlan, lehanăn hlăk dôk mprăp đru truh 200 boh êdeh mdar kơ mnuih amâo mâo jăk asei mlei./.