VOV4.Êđê - Bi hdơr 50 thŭn Hruê hdră mblah tŭ dưi Đăk Tô – Tân Cảnh, hruê 24/4, Phŭn bruă lĭng kahan srăng gĭt gai, bi hgŭm hŏng čar Kon Tum mkŏ mjing klei bi kƀĭn trông “Hdră mblah tŭ dưi Đăk Tô – Tân Cảnh”. Klei bi kƀĭn trông kñăm bi mklă bruă klam yuôm bhăn mơ̆ng hdră mblah tŭ dưi Đăk Tô – Tân Cảnh hŏng Hdră mblah Dưr Lăn dap kngư lehanăn hdră kdơ̆ng mblah bi kdơ̆ng hŏng Mi, mtlaih ala ti krĭng Lăn dap kngư. Kruăk knăl hdră mkŏ mjing, gĭt gai lehanăn đru mguôp hlăm klei tŭ jing mơ̆ng hdră mblah thŭn 1972. Klei bi kƀĭn trông mă leh klei hriăm hƀuê ênuk, yuôm bhăn hlăm klei kiă kriê, gĭt gai mơ̆ng anôk bruă Đảng gưl dlông, bruă Đảng kahan gưl dlông, Phŭn bruă lĭng kahan kơ hdră êlan, hdră mkŏ mjing; hdră bi hgŭm plah wah êpul kahan phŭn lehanăn êpul djă phao ktuang, mnuih ƀuôn sang Kon Tum ti alŭ wăl Lăn dap kngư. Hluê anăn, ba yua, mđĭ lar hlăm hdră mkŏ mkra lehanăn răng mgang ala čar./.

H’Nêč pô mblang