VOV4.Êđê- Tlam mbrue (12/9), Dhar bruă kiă kriê klei hâo hưn mơ̆ng bruă Đảng čar Kontum mkŏ mjing leh knăm mtrŭt mjhar klei bi lông tui duah klei thâo săng “Kontum – 110 thŭn hrue mkŏ mjing lehanăn mđĭ kyar”. Klei bi lông anei mâo mkŏ mjing hlăm dua hdră: Bi lông hŏng klei čih, lehanăn kruăk ti anôk djŏ hlăm hla pŏk elektronik mơ̆ng Anôk bruă kiă kriê klei hâo hưn mơ̆ng bruă Đảng čar Kontum. Hdră bi lông čih mâo 3 klei êmuh, lehanăn wưng kčah knhal tuič ba jao klei bi lông hlăm hrue 20/11/2022.

Bi hdră bi lông kruak ti anôk djŏ dưi mkŏ mjing hlăm 3 mlan, kčưm mơ̆ng 6h hrue 13/9 hlŏng truh kơ 9h mlam hrue 13/12/2022. Êpul mkŏ mjing klei bi lông mkă tĭng mkŏ mjing knăm ksiêm knhal tuič lehanăn jao klei pah mni klei bi lông ti hrue 5/2/2023. Klei bi lông anei kñăm mâo klei hâo hưn, mtô mblang mjuăt bi hriăm jih jang mnuih, boh nik hŏng hđeh gưl mrâo thâo săng hĭn kơ hƀuê ênuk mkŏ mjing lehanăn mđĭ kyar čar Kontum. Mơ̆ng anăn, mđĭ hĭn klei thâo săng hlăm bruă kriê pioh, mđĭ bi lar klei tŭ dưn hƀuê ênuk, lehanăn dhar kreh ƀuôn sang, lăn čar pô./.

Pô mblang: Y-Ƀel Êban