VOV4.Êđê - Čiăng gang mkhư̆ klei tlĕ mă čuah soh hŏng hdră bhiăn, hlăm dŭm thŭn êgao, čar Kon Tum mkŏ mjing leh klei bi lông blei, brei klei dưi mă dŭm pluh anôk mâo čuă ti dŭm hnoh êa, krông êa. Êngao kơ dŭm klei tŭ mâo klei klă mngač, hlăm dŭm anôk mă čuah ăt mâo klei ngă soh, ngă truh klei čôñ ăl. Phŭn agha truh klei anei jing kyua bruă kriê dlăng awăt êdu, mâo đa đa ngă klei mgang, mdăp klei ngă soh.

Anôk mă čuah ti krông Pô Kô, kdrêč găn ƀuôn Kà Nhảy, să Dak Nông, kdriêk Ngọc Hồi mâo Knơ̆ng bruă sang čư̆ êa čar Kon Tum brei mă mơ̆ng mlan 11/2018 kơ Knơ̆ng bruă Lĩnh Vũ. Hlue si klei mnuih ƀuôn sang lač, mơ̆ng hlăk ka dưi mkăp hră anôk bruă duh mkra anei čŏng mă čuah, čŏng čuk hli sa ktuê êlan dlông hlăm brô 100m ktuê hang ksĭ Pô Kô găn lăn mơ̆ng giăm 10 gŏ êsei mnuih ƀuôn sang dôk yua. Ayŏng Lê Văn Kha bi kdơ̆ng bruă anei snăn A Veo pô anôk mă čuah iêô mnuih nao čăm. Ayŏng Kha brei thâo, klei anei ăt ka dưi msir mgaih: “Kâo wĭt ƀuh sa ktuê êlan snăn jing kâo trŭn mă giê pơ̆ng hĕ kdrêč lăn kâo snăn A Veo ba mnuih hriê čăm kâo. Hlăk êjai anăn mâo dua čô knuă druh ƀuh arăng čăm kâo, kâo amâo găl lač anăn ôh. Kâo akâo kơ să, Knơ̆ng bruă sang čư̆ êa msĕ si mgang msir mgaih hlue si klei tŭ dưn kơ A Veo.”

Mơ̆ng klei ngă soh amâo dưi gang mkhư̆ ară anei lŏ djŏ hdră bruă dưi mkăp brei kuai mă, Knơ̆ng bruă Lĩnh Vũ lŏ dơ̆ng mâo dŭm bruă hmaĭ kơ klei hdĭp mnuih ƀuôn sang, msĕ si: Amâo hlue ngă djŏ hdră mă kơ hruê mmông; hdră dŭ mdiăng čuah yan không snăn ngă čhŏ, yan hjan ngă kdlŭt êlan. Boh nik anôk bruă duh mkra anei lŏ mă lăn boh tâo dơr êlan mđoh êa mơ̆ng êlan Hồ Chí Minh čiăng găl kơ êdeh mdiăng čuah găn êrô. Ayŏng Lê Văn Tường sang giăm êlan dŭ mdiăng čuah mơ̆ng anôk mă čuah mơ̆ng anôk bruă duh mkra êlan Hồ Chí Minh, rŭng răng: “Jih jang êdeh prŏng, êdeh 4 boh pông êran snăn kđang sang, mô̆ anak kâo đih pĭt ăt huĭ mơh. Leh anăn čhŏ djhan wăl hdĭp mda. Sang kâo jing kđăl ƀăng nanao amâo jhŏng pŏk ƀăng ôh. Ti anăp mâo êlan Hồ Chí Minh, hlăk êlâo mâo pŏk mgang, ară anei êdeh hriê mă čuah pŏk mgang anăn mčah leh. Mdiăng lăn, mdiăng boh tâo hlăm yan hjan mơh snăn êa amâo dưi đoh hlue êlan mnuôr ôh đĭ dlai êlan đoh hlăm sang kâo”.

Mbĭt hŏng klei hmaĭ kơ klei hdĭp mnuih ƀuôn sang, ti dŭm anôk mă čuah ti čar Kon Tum lŏ mâo lu klei soh kjham. Êdah kdlưn jing ti anôk mă čuah, boh tâo ti êa krông Đăk Pxi, kdrêč găn alŭ 7, să Đăk Pxi, kdriêk Đăk Hà. Hlue si Hră brei mă mnơ̆ng hlăm gŭ lăn mrô 898, hruê 15/9/2020 Knơ̆ng bruă sang čư̆ êa čar Kon Tum mkăp, snăn Knơ̆ng bruă 87 knŏng dưi ba yua hŏng hdră pom hrip.

Khădah snăn Anôk bruă anei yua leh kdrăp masin čŏng kuai, dơr sa ktuê êlan dlông dŭm êtuh met mbha mdua êa krông čiăng mă čuah bi mlih êlan êa đoh. Klei mdê hĭn jing wăt tơdah anôk mă čuah knŏng kbưi hŏng anôk bruă Knơ̆ng bruă sang čư̆ êa să Đăk Pxi hlăm brô êbeh 1 km, ƀiădah Trần Phước Tuấn, Khua Knơ̆ng bruă sang čư̆ êa să bi mklă amâo ƀuh ôh klei soh: “Ti să khăng gĭt gai ayŏng adei ksiêm dlăng ktuê dlăng ƀiădah ară anei ka ƀuh ôh klei soh”

Kơ tĭng Adŭ bruă ngăn dŏ wăl hdĭp mda kdriêk Đăk Hà, Đinh Khánh Hoàng, K’iăng Khua adŭ bruă brei thâo, ti anôk mă čuah hlăm êa krông Đăk Pxi, kdrêč găn alŭ 7, să Đăk Pxi mơ̆ng Knơ̆ng bruă 87, anôk bruă ƀuh klei soh ƀiădah năng ai pap đei hŏng anôk bruă duh mkra anăn Adŭ bruă knŏng mdei ti bruă ngă hră mơar mtô lač đuič: “Si tô hmô diñu knŏng akâo kơ hô̆ pui, ma ssin hrip hlăk êjai anăn tăp năng ba wăt masin kuai snăn hmei ăt ngă hră mơar lač lu blư̆. Bi đa đa phung ngă êlan ba êdeh trŭn tinăn snăn ăt lač leh mơh, ăt akâo kơ Knơ̆ng bruă sang čư̆ êa să trŭn ksiêm dlăng. Truh ară anei ka msir mgaih ôh ya klei ngă soh”.

Hlăk êjai leh ksiêm dlăng Hră brei mă čuah leh anăn rup mơ̆ng anôk mâo boh klei, Võ Thanh Hải, K’iăng Khua Knơ̆ng bruă ngăn dŏ wăl hdĭp mda čar Kon Tum bi mklă, dŭm klei ngă soh mâo ti anôk mă čuah jing kjham snăk truh ti hnơ̆ng brei ksiêm dlăng wĭt mă hră brei mă čuah: “Hlăm klei kčah mtrŭn ñu dưi pom, bi klei amâo dưi jing amâo dưi ba masin, jing masin kuai ti gŭ êa krông čiăng mă čuah ăt kăn dưi, ƀiădah knŏng dưi pom dưk hlăm hô̆ mran, mơ̆ng hô̆ mran ba tuh ti anôk mkăn. Mkra êlan hlăm êa krông ngă mlih êlan mđoh jing soh leh, anei jing klei ngă soh lač kơ klei hmaĭ kơ wăl hdĭp mda leh anăn ngă soh hlăk êjai mă mơ̆ng hlăm gŭ lăn. Soh jih snăn klei anei brei lŏ wĭt mă hră brei klei dưi mă čuah”

Klei hâo hưn mơ̆ng Knơ̆ng bruă ngăn dŏ wăl hdĭp mda čar Kon Tum brei ƀuh, bruă mbha gưl kriê ndlăng kuai mă mnơ̆ng hlăm gŭ lăn čar Kon Tum jing klă mngač. Hdră kriê dlăng ăt tliêr kjăp. Grăp knăm tlâo grăp hruê kăm, grăp mlan leh anăn grăp gưl Knơ̆ng bruă sang čư̆ êa dŭm kdriêk, ƀuôn prŏng brei hâo hưn hŏng Knơ̆ng bruă ngăn dŏ wăl hdĭp mda kơ boh klei kriê dlăng mơ̆ng alŭ wăl. Khădah boh sĭt ya klei dôk mâo ti lu anôk kuai mă čuah ti čar Kon Tum brei thâo, bruă kriê dlăng hdră kuai mă, hlăk dưi mbha kơ anôk bruă lu anôk dôk phưi tha, boh nik mâo klei bi knăl mgang, đru kơ klei ngă soh anei./.

H’ Zawut pô mblang