VOV4.Êđê - Kon Tum – sa čar dleh dlan ti Lăn dap kngư hlăm thŭn 2021 gĭr ktưn kpưn đĭ hŏng lu boh tŭ dưn năng čih yap. Ti dŭm alŭ wăl, grăp čô Đảng viên, grăp anôk bruă Đảng mđĭ lar leh jăk bruă klam jing gru mngač, ba akŏ hlăm jih jang hdră bruă lehanăn mđing dlăng kriê klei hdĭp kơ mnuih ƀuôn sang. 

Tết Nguyên Đán thŭn anei ti ƀuôn Đung, să Mường Hoong, kdriêk Đăk Glei, čar Kontum, gŏ sang ung mô̆ A Ngân, Y Lim ƀơ̆ng Tết hŏng klei mơak. Hlăk akŏ thŭn 2021, ung mô̆ diñu mâo dua čô anak điêt, ăt dôk hlăm sang hlang mtih kđuh ka bŏ mơh 120m², ƀri mâo wưng nao čuă ƀuôn sang, Khua bruă Đảng čar khua Êpul Gơ̆ng bruă ƀuôn sang čar Kontum Dương Văn Trang nao čuă êmuh gŏ sang gơ̆, lehanăn asei ñu pô yơh iêo mthưr phung mâo ai tiê kmah mâo klei bi đru. Mơ̆ng ênoh bi đru mâo 50 êklăk prăk, phung lĭng kahan kdriêk Đăk Glei đru mdơ̆ng brei sang, dưi mâo sa boh sang bi đru prŏng 53m², hŏng sa boh adŭ čhưn, 2 boh adŭ pĭt jăk, mâo asei khua bruă Đảng čar mtam ngă bruă mđup brei hlăm knhal jih thŭn 2021, ngă bi mlih leh klei hdĭp gŏ sang A Ngân. Hlăm klei mơak akŏ thŭn mrâo, A Ngân lač;"Thŭn dih gŏ sang hmei dôk hlăm sang hlang mdjip mdjap, hjan hlĭm angĭn thut êăt shră. Leh mâo Khua bruă Đảng čar hriê muh kña kơ klei hdĭp mda, mđĭ ai. Mâo lĭng kahan kdriêk hriê đru mdơ̆ng brei sang anei. Lač jăk kơ knuă druh čar, knuă druh să lu snăk. Mâo sang dôk leh, thŭn mrâo srăng gĭr hĭn čiăng tlaih mơ̆ng klei dleh dlan, gĭr ktĭr duah ƀơ̆ng”.

Thŭn 2021 jing thŭn hlue ngă Hdră mtrŭn klei bi kƀĭn prŏng Đảng djăp gưl, mbĭt hŏng klei gĭr kiă kriê mă bruă, bi leh mta kñăm mđĭ kyar, dŭm gưl bruă Đảng ti Kontum wir nanao hlăm krĭng taih kbưi mđing uêñ kơ klei hdĭp phung ƀuôn sang. Bruă tal êlâo mơ̆ng khua bruă Đảng čar Kontum jing kiă kriê hrăm mbĭt hŏng dŭm bruă nah gŭ, djăp knơ̆ng dhar bruă truh hŏng să Mường Hoong, Ngọc Linh hlăm kdriêk Đăk Glei, lehanăn să Văn Xuôi, kdriêk Tu Mrông, 3 să dleh dlan hĭn hlăm čar, hŏng hnơ̆ng ênoh gŏ êsei ƀun mơ̆ng êbeh 59% truh êbeh 76%. Hŏng dŭm mmông mă bruă hŏng bruă sang čư̆ êa lehanăn phung ƀuôn sang hlăm 3 să anei, ba leh kơ khua bruă Đảng čar Kontum Dương Văn Trang dôk bi mĭn nanao kơ bruă klam phung knuă druh đảng viên lui hĕ phung ƀuôn sang lĕ hlăm klei dleh dlan: “Knuă druh đảng viên mơh lui hĕ phung ƀuôn sang dôk hlăm klei dleh dlan snăn kâo ƀuh ka djŏ ôh. Lehanăn dôk bi mĭn nanao kơ ai tiê klei thâo kiă kriê mơ̆ng dŭm êpul bruă Đảng hlăm să pô, hlăm anăn mâo wăt êpul khua kiă kriê bruă Đảng kdriêk snăn klei duh mĭn kơ phung ƀuôn sang adôk êdu awăt. Phung ƀuôn sang čiăng thâo duh ƀơ̆ng snăn pô bi ktrâo atăt snăn kơh. Bi anei phung ƀuôn sang hjăn, pô hjăn mơh snăn ka djŏ ôh”.

Duh mĭn kơ krĭng taih kbưi, krĭng mnuih djuê ƀiă dôk dleh dlan, thŭn 2021, mrâo êgao čar Kontum duh bi liê leh, mđrăm mbĭt hŏng bruă hlue ngă kjăp, jao bruă klă truh kơ dŭm knơ̆ng dhar bruă, grăp gưl. Tal êlâo jing đru bi mlih klei mĭn knhuah mă bruă hlăm phung ƀuôn sang. Djăp gưl bruă sang čư̆ êa, mbĭt hŏng dhar bruă djŏ tuôm mâo bruă lŏ bi kjăp, mkŏ mjing êpul hgŭm ngă bruă bi tŭ jing, mđĭ bruă ngă lŏ, rơ̆ng bi mâo djăp êsei huă, ktrâo atăt phung ƀuôn sang răng mgang dliê, pla mjing ana êa drao hlăm gŭ êyui kmrơ̆ng, msĕ si sâm Ngọc Linh, Đẳng Sâm, Sơn tra... čiăng lŏ mâo thiăm ênoh ba wĭt. Bi klei kơ mjeh mjiêng, prăk ngă bruă, hdră mă bruă, mâo bruă sang čư̆ êa, dŭm êpul bruă djŏ tuôm, djăp êpul êya, phung duh mkra... mđrăp mbĭt đru kơ phung ƀuôn sang. Mduôn A En, ti ƀuôn Đăk Rê̆, să Mường Hoong, kdriêk Đăk Glei brei thâo:"Thŭn anei phung ƀuôn sang mơak leh Khua bruă Đảng čar nao čuă, lehanăn dŭm dhar bruă ktrâo atăt, đru phung ƀuôn sang duh mkra pla mjing. Să pô dôk hlăm krĭng taih kbưi snăn ară anei ăt adôk hlăm klei knap mñai. Klei hdĭp ka mâo klei thâo đĭ kyar ôh. Hdơr klei Đảng mtă, pô jing khua mduôn snăn bi mtă mtăn kơ phung ƀuôn sang brei mâo klei thâo bi mguôp, kreh kriăng mă bruă knuă. Pla mdiê lŏ êjai, lehanăn pl amjing ana êa drao čiăng pioh čhĭ mâo prăk yua. Rông êmô kbao, čhĭ mnia duh kơ klei hdĭp, rông amâo mâo lŏ phưi tha hiu trui si čiăng ôh. Mâo Đảng mđing lu hĭn êdi, duh leh kơ phung ƀuôn sang, snăn ară anei asei mlei pô lehanăn mđrăm mbĭt hŏng jih jang phung ƀuôn sang čŏng gĭr kpưn đĭ đăm lŏ dôk nanao hlăm klei knap mñai ôh”.

Thŭn 2021 êjai găn klei ruă tưp prŏng Covid 19, nga hmăi leh amâo mâo djŏ điêt ôh hŏng klei hdĭp phung ƀuôn sang, hŏng bruă klam jing pô ba êlan êlâo, mâo klei uêñ mĭn kơ phung ƀuôn sang jih jang phung đảng viên, lehanăn dŭm êpul bruă Đảng ti čar Kontum kytang hĭn mơh dưi bi klă, lehanăn mâo leh klei phung ƀuôn sang khăp lehanăn mpŭ. A Đư̆u Khua bruă Đảng ƀuôn Ka Bầy, să Hơ Moong, kdriêk Sa Thầy brei thâo, 5 čô đảng viên mơ̆ng anôk bruă đảng anei jing pô phŭn hlăm klei bi mguôp, iêo jak phung ƀuôn sang, lehanăn ba akŏ nanao hlăm djăp bruă ƀuôn sang mâo. Wăt hlăm hrue mơak akŏ thŭn mrâo, drông tết diñu gĭr ktir hĭn mơh hlăm bruă mdrơ̆ng hŏng klei ruă tưp čiăng răng kriê klei suaih pral jih jang mnuih:“Bruă mdrơ̆ng hŏng klei ruă tưp mâo mkŏ mjing anôk gak răng, lehanăn hiu mtrŭt mjhar phung ƀuôn sang truă čhiăm guôm ƀô̆ tơdah kbiă hiu kơ êngao. Đảng viên hlăm êpul bruă Đảng ƀuôn nga klei bi hmô êlâo halwm djăp mta bruă. Bruă duh ƀơ̆ng msĕ mơh gŏ sang diñu yơh ba êlan êlâo. Jih jang bruă hlăm ƀuôn nao bi hgŭm sơăi, lehanăn iêo jak phung ƀuôn sang bi mguôp mbĭt”.

Mâo klei Đảng kiă kriê, lehanăn Đảng ngă bruă, sa ai mbĭt, thŭn 2021 leh êgao êjai dôk găn klei ruă tưp prŏng Covid 19, klei duh mkra ala ƀuôn čar Kontum ăt mâo leh lu boh tŭ dưn, msĕ si: Hnơ̆ng hrui wĭt jih jan gmâo 6,47%, kah knar grăp čô mnuih dưi yap jing êbeh 47 êklăk prăk, čar lŏ mâo thiăm 8 boh să djăp ênoh čuăn krĭng ƀuôn sang mrâo; hnơ̆ng ênoh gŏ êsei ƀun hrŏ truh 4% mkă hŏng thŭn 2020. Mơ̆ng dŭm boh tŭ dưn leh mâo anăn, phung ƀuôn sang čar Kontum čhuang hlăm thŭn mrâo 2022 hŏng klei đăo knang kjăp kơ klei Đảng kiă kriê, lehanăn hrăm mbĭt hŏng Đảng lŏ dơ̆ng mjing dŭm yan mnga trei mđao, jăk yâo./.