VOV4.Êđê- Aguah mbrue (5/6), ti wăl krah Đăk Tô, kdriêk Đăk Tô, knơ̆ng bruă sang čư̆ êa čar Kontum mkŏ mjing knăm pla kyâo hdơr nanao kơ awa Hô thŭn 2022, lehanăn sa ai hŏng hrue tal rŏng lăn răng mgang wăl hdĭp mda 5/6. leh knăm anei, phung knuă druh, mnuih ngă bruă, dŭm knơ̆ng dhar bruă mbĭt hŏng phung ƀuôn sang ti kdriêk Đăk Tô trŭn nao pla kyâo hlăm wăl tač hrue 24/4, lehanăn hlăm lu anôk mkăn ti wăl krah Đăk Tô.

Wưng anei knơ̆ng bruă lŏ hma čar Kontum mkŏ mjing leh klei mtrŭt mjhar pla êbeh 157 êbâo 700 phŭn kyâo msĕ si juăr, ana mkŭl, ana hnêñ, hngô tlâo hla... mbha kơ dŭm anôk bruă êpul êya hlăm čar pla bi msiam wăl hdĭp mda. Hlăm yan hjan thŭn anei, čar Kontum čoh čuăn pla mrâo truh 4 êbâo 500 ha dliê, dưi mbha kơ djăp êpul êya bruă ti alŭ wăl./.

 Pô mblang: Y-Khem Niê