VOV4.Êđê - Mơ̆ng hruê klei ruă tưp Covid-19 bluh đĭ, phung knuă druh, lĭng kahan knông lăn čar Dak Lak mâo nanao klei gĭr ktưn găn hgao dŭm klei dleh dlan, lui hĕ êjai bruă pô čiăng ngă jăk “Bruă klam mdua” răng mgang klei dưi kiă kriê ala čar leh anăn gang mkhư̆ klei ruă tưp. Klei anei dưi bi siam hĭn rup lĭng kahan knông lăn čar Dak Lak

Ti krah adiê mđiă mlan 3 ti Lăn Dap Kngư ti kđông alŭ Nhạp, să Ia Lôp, kdriêk Ea Sup, čar Dak Lak, knuă druh, lĭng kahan răng mgang Kđông kahan răng mgang knông lăn Ea Hleo ăt ngă jăk bruă hiu ksiêm dlăng răng mgang klei êđăp ênang knông lăn, ktuê dlăng gang mkhư̆ klei ruă Covid-19. Trung tá Nguyễn Thanh Tú, K’iăng khua êpul kahan ksiêm, kđông kahan răng mgang knông lăn Ea Hleo găk răng ti alŭ Nhạp brei thâo: mâo wưng klei ruă tưp bluh mâo ktang, anak êkei dôk hriăm ti ƀuôn prŏng Hồ Chí Minh djŏ Covid-19 amâo mâo găp djuê kăp dlăng. Mô̆ dôk ti sang khăng êngoh duam, ƀiădah ñu hŏng ƀĭng kahan ăt hruê mlam ktuê dlăng knông lăn, lu mlan amâo wĭt kơ sang čiăng bi leh bruă dưi jao. “Ăt rŭng răng kyua anak čô pô snăn ƀiădah amâo mâo găp djuê tinăn ôh. Bruă ñu bi ktlah hjăn si ngă, nao ti sang êa drao jing jao si ngă, hdră mdrao mgŭn si ngă pô kăn thâo mơh. Pô amâo dôk tinăn anăn rŭng răng snăk. Ƀiădah ăt gĭr snăn yơh bruă pô ngă ăt ngă mơh, tal êlâo pô mđĭ ai mô̆ anak gĭr hgao wưng dleh dlan kyua anăn jing klei dleh dlan mbĭt.”

Sang kbưi hŏng kđông kahan êbeh 40 km, ƀiădah kyua bruă klam Trung úy Hà Văn Tân, knuă druh êpul čung ba mnuih ƀuôn sang Kđông kahan răng mgang knông lăn Ea Hleo tăp năng mkrah thŭn kơh dưi wĭt čuă sang. Trung Úy Tân yăl dliê: Ară anei mô̆ F0, anak điêt 17 mlan ăt mơĭt kơ aduôn aê dlăng brei. Wăt tơdah hnĭng snăk kơ mô̆ anak ƀiădah ñu ăt dôk ti anôk bruă čiăng bi leh bruă klam: “Kyua mô̆ kâo ăt thâo săng bi đru kâo. Kâo ăt ênguôt kơ mô̆ anak khă gơ̆ amâo đei kbưi ôh ƀiădah mâo wưng klei ruă tưp gưl êlâo jih 3 mlan amâo dưi wĭt kơ sang. Hŏng kâo pô mơ̆ng hlăk nao hlăm sang hră snăn bi mklă leh ai tiê jing ngă bruă kahan anăn mđĭ ai pô gĭr bi leh jăk djăp bruă klam dưi jao.”

Hlăk êjai hrăm mbĭt hŏng ƀĭng kahan ngă bruă klam ti knông lăn, Trung uý Nông Văn Lợi, Kđông kahan răng mgang knông lăn Ia Rvê thâo ama pô djŏ klei ruă Covid-19 djiê ti Bình Dương hlăm wưng klei ruă tưp dleh dlan hĭn. Trung Úy Lợi yăl dliê: Thâo ama djiê kâo ênguôt snăk. Biădah hlăk anăn klei ruă dleh ktuê dlăng leh anăn ñu dôk ngă bruă anăn amâo dưi wĭt dơr ama ôh. “Hlăm bruă ngă dôk gak răng ksiêm dlăng Covid-19 hmư̆ hưn ama djiê ti Bình Dương. Klei mĭn ăt rŭng răng mơh, ƀiădah mâo ayŏng adei, Anôm bruă gĭt gai kđông kahan, Anôk bruă gĭt gai iêô đĭng blŭ mđĭ ai. Leh anăn pô dôk ngă bruă sui leh hlăm lĭng kahan anăn ai tiê klei mĭn kjăp, ăt bi mklă leh klei truh leh tơdah wĭt đru gŏ sang, bi tơdah amâo dưi wĭt ăt iêô đĭng blŭ bi juh gŏ sang.”

Dua thŭn êgao, ngă bruă klam mdua, dŭm kđông kahan răng mgang knông lăn ti Dak Lak mkŏ mjing leh êbeh 5000 êpul hŏng giăm 33 êbâo gưl knuă druh, lĭng kahan nao ksiêm dlăng knông lăn. Mbĭt anăn, mđĭ lar nanao 9 anôk gak răng ksiêm dlăng klei ruă Covid-19. Mơ̆ng bruă ksiêm dlăng kahan răng mgang knông lăn Dak Lak ƀuh, mă kơ̆ng leh anăn đŭ bi kmhal 18 klei hŏng 57 čô ngă soh klei êđăp ênang knông lăn.

Hluê si Trung tá Nguyễn Văn An, Khua kđông kahan răng mgang knông lăn Ia Rvê: Ngă bruă klam mơ̆ng Anôk bruă gĭt gai, anôk bruă ktuê dlăng, gang mkhư̆ dŭm bruă ngă soh hŏng hdră bhiăn, mbĭt anăn amâo brei klei ruă Covid-19 tưp lar. “Knuă druh, lĭng kahan hlăm kđông bi mklă nanao bruă klam răng mgang klei êđăp ênang mguôp hŏng bruă klam gang mkhhư̆ klei ruă Covid-19 leh anăn bi mklă mdrơ̆ng hŏng klei ruă tưp msĕ si bi kdơ̆ng hŏng phung roh. Kyua anăn, hmei mđĭ ai, bi hriăm knăm mđĭ klei thâo săng, ai tiê, bruă klam msir mgaih djăp klei dleh dlan. Khă gơ̆ klei găl kơ klei hdĭp mnơ̆ng dhơ̆ng ti anôk găk răng dleh dlan, adiê mđiă, hlơr, sang dôk êjai. Ƀiădah hŏng grăp čô knuă druh lĭng kahan thâo săng kơ ai tiê bi leh jăk djăp bruă klam dưi jao.”

Čar Dak Lak mâo 7 kđông kahan răng mgang knông lăn dưi jao bruă klam kriê dlăng, răng mgang êbeh 71 km êlan knông lăn bi knông hŏng čar Mondukiri (Campuchia). Krĭng knông lăn ti Dak Lak mâo lu êlan mŭt mjing klei găl găn knông lăn soh hdră bhiăn ngă tưp lar klei ruă Covid-19 găn êlan knông lăn. Ƀiădah hŏng klei gĭr phung knuă druh, lĭng kahan răng mgang knông lăn hŏng klei hrăm mbĭt đru mguôp mơ̆ng bruă sang čư̆ êa leh anăn mnuih ƀuôn sang klei dưi răng mgang knông lăn Dak Lak dưi răng kjăp nanao./.