VOV4.Êđê - Dŭm hruê anei, hlăm ai êwa tŭ drôn hruê mkŏ mjing ala čar 2/9 dôk bi êdah hlăm djăp ƀuôn êlan ti Krĭng Lăn Dap Kngư. Ti ƀuôn Phôk, să Ea Rbin, kdriêk Lăk, jing sa ƀuôn taih kbưi hlăm čar Dak Lak, hla čhiăm gru hrah phiơr hlăm grăp boh êlan. Y-Ƀlor Lưk, khua ƀuôn Phôk brei thâo, ai êwa hruê mkŏ mjing ala čar mtă kơ mnuih ƀuôn sang hdơr kơ knhuah gru klei bi mguôp, hluê si hdră êlan mơ̆ng Đảng, knŭk kna čiăng mkŏ mjing ƀuôn sang ƀrư̆ hruê ƀrư̆ mdrŏng siam. “Tal êlâo hmei hâo hưn kơ mnuih ƀuôn sang kă hla čhiăm gru bi hdơr hruê 2/9 mkŏ mjing ala čar, klei hơ̆k mơak prŏng. Ăt msĕ grăp thŭn grăp sang kă hla čhiăm gru. Kâo hưn hŏng mnuih ƀuôn sang čiăng thâo săng klă hĭn kơ hruê mkŏ mjing ala čar jing hruê tết êngiê djuê ana. Kyua mâo Awa Hồ leh anăn phung săn asei kơ ala čar, phung mâo bruă tŭ dưn, mnuih ƀuôn sang sa ai hluê Đảng, knŭk kna. Mnuih ƀuôn sang thâo bi mguôp, êjai mâo klei iêo mkrum hrăm bĭt kyua mnuih ƀun ƀin, êa lĭp lêč amâodah klei ruă jŭ jhat diosin, mnuih ƀuôn sang hur har nao hgŭm.

Đinh Đăm (djuê ana Bahnar) jing khua ƀuôn alŭ Kon Sơ Nglok, să Hà Đông, kdriêk Đăk Đoa, čar Gia Lai. Nao mŭt kahan mơ̆ng thŭn 11963, Đinh Đăm ƀuh klei blah ngă ti Lăn Dap Kngư kjham snăk, lu phung ƀĭng kahan djiê, săn asei čiăng răng mgang klei êngiê. Kyua anăn, Đinh Đă, bi êdah kleo hdơr kmha hŏng Awa Hồ jing gĭt gai leh mnuih ƀuôn sang mâo mă klei êngiê, jăk mơak msĕ si hruê anei: “Awa Hồ jing mnuih mphŭn mkŏ mjing ala čar Việt Nam Dân Chủ Cộng Hoà, ba klei jăk mơak kơ mnuih ƀuôn sang. Kyua dưi mtalih êngiê, hlue si asăp Awa Hồ mtô, mnuih ƀuôn sang jăk mơak, bi hgŭm, gĭr ktưn mă bruă, ktâolač, bi hriăm kơ hdră rông mnơ̆ng, pla mjing ba klei tŭ dưn bruă duh mkra. Mơ̆ng leh mtlaih êngiê truh ară anei klei hdĭp mlih leh lu. Êlâo adih amâo mâo êdeh p’phŭt, ară anei dŭm gŏ sang mâo leh soăi êdeh p’phŭt, êdeh kai pioh mkra mjing. Hjăn să Hà Đông ară anei mâo dŭm pluh boh. Leh anăn tivi, hip bi êăt, klei hdĭp bi mlih leh lu.”

Ti krĭng knông lăn Tuy Đức, čar Dak Nông, dŭm hruê anei mâo klei êyui mơ̆ng hla čhiăm gru, bi hdơr hruê mkŏ mjing ala čar 2/9. Y-Thái, k’iăng khua bruă Đảng kdriêk Tuy Đức brei thâo, alŭ wăl mâo knhuah gru bruă krŭ kdơ̆ng, jing ƀuôn sang phŭn mơ̆ng pô jhŏng ktang Ama Trang Lơng – Pô gĭt gai hlăm klei krŭ kdơ̆ng mblah Prăng hlăm dŭm thŭn akŏ wưng 100 thŭn tal 19, jing anôk phŭn bruă krŭ kdơ̆ng Quảng Trực – sa anôk hrah hlăm klei krŭ kdơ̆ng mblah Mi, sua wĭt klei êngiê kơ ala ar. Bi lar knhuah gru bruă krŭ kdơ̆ng, Dŭm thŭn êgao, mnuih ƀuôn sang dŭm djuê ana mâo klei bi mguôp, bi đru hdơ̆ng pô mđĭ kyar bruă duh mkra. Y-Thái brei thâo: “Hluê si dŭm boh tŭ dưi mâo, kdriêk mâo leh hdră mtrŭn kơ bruă bi hrŏ ƀun kjăp hlăm dŭm ƀuôn mnuih djuê ƀiă, hlăm anăn, kñăm tal êlâo dŭm hdră kơ dŭm kdriêk ƀun, hdră mđĭ hnơ̆ng klei hdĭp mda kơ mnuih ƀuôn sang jing mnuih djuê ƀiă leh anăn dŭm hdră mkŏ mkra krĭng ƀuôn sang mrâo čiăng kñăm duh bi liê kơ mnuih ƀuôn sang. Dŭm să mkŏ mjing hdră ngă bruă klă lơ̆ng, djŏ guôp hŏng grăp ƀuôn, pluă mbĭt lu ai dưi hluê ngă. Kdriêk jao bruă, jao bruă klam klă klơ̆ng kơ grăp čô hlăm êpul khua êmua, srăng ktuê dlăng, mtrŭt mjhar, si srăng ngă čiăng mâo boh tŭ dưn hĭn, rơ̆ng klei tŭ jing bruă bi hrŏ ƀun kơ dŭm ƀuôn.”

H’ Zawut + Y Ƀel pô mblang