VOV4.Êđê - Angĭn êbŭ mrô 4 bi rai kjham êlan pui kmlă ti čar Quảng Nam, lui pui kmlă hlăm lu anôk. Leh mâo klei gĭt gai mơ̆ng knơ̆ng bruă pui kmlă krĭng kwar krah, knơ̆ng bruă pui kmlă čar Dak Nông mkŏ mjing leh 2 êpul ngă bruă đru kơ čar Quảng Nam mkŏ wĭt êlan klei pui.

Hluê anăn, dŭm pluh čô knuă druh mă bruă hrăm mbĭt ba êdeh êdâo, kdrăp yua, mnơ̆ng mgah asei, phung kăp đru… truh ti kdriêk Núi Thành, čar Quảng Nam mgaih msir klei truh mơ̆ng angĭn êbŭ. Ti anôk mă bruă, păt čiăng jih anôk bi hrŏ hnơ̆ng pui kmlă angĭn bi êbuh, gơ̆ng pui joh, klei pui tloh, kngăm hlăm êa…

Phung ngă bruă mjêč bi klă, mkŏ mjing hdră mgaih msir, mbha êpul ngă bruă rơ̆ng klei êđăp ênang leh anăn hmar hĭn. Phung mă bruă PC Dak Nông amâo mâo uêñ kơ adiê hjan, mđiă ktang mă bruă amâo mâo mdei čiăng hnưm mkŏ wĭt pui kmlă kơ mnuih ƀuôn sang Quảng Nam.

2 êpul ba anăp mơ̆ng Anôk bruă pui kmlă Dak Lak mbĭt hŏng djăp ênŭm kdrăp mnơ̆ng nao đru leh kơ čar Quảng Nam lŏ mkŏ wĭt êlan pui kmlă leh gưl angĭn êbŭ mrô 4. Phung knuă druh, mnuih mă bruă mkŏ mjing lu êpul nao msir mghaih ti dŭm kdriêk Tiên Phước, Phú Ninh lehanăn ƀuôn prŏng Tam Kỳ, čar Quảng Nam.

Ti dŭm anôk anei, mnuih mă bruă hgao klei dleh dlan kơ lăn ala, yan adiê, mkŏ êlan pui kmlă, mdơ̆ng gơ̆ng pui mrâo, lŏ mkŏ wĭt dŭm anôk mđĭ mtrŭn pui kmlă… gĭr bi leh jih bruă klam mâo kčah jao/.

Y-Ƀel, H’Nêč pô mblang