Amâo djŏ knŏng ti adŭ hriăm, ƀiădah wăt hlăm dŭm adŭ mdei mơ̆ng sang hră gưl tlâo knŭk kna rông ba hđeh sang hră mnuih djuê ƀiă – sang hră gưl 2 kdriêk Kon Plông, ai êwa phung hđeh sang hră lŏ ksiêm wĭt klei hriăm jăk leh anăn mjêč êdi. Êngao kơ mmông mâo phung nai mtô hlăm adŭ hriăm, 82 čô hđeh sang hră nao hgŭm hlăm klei bi lông bi ruê̆ klei hriăm gưl 3 thŭn anei ăt čŏng pô hlăm bruă lŏ ksiêm wĭt klei hriăm. Adei Trần Trung Thành, ti adŭ 12B brei thâo:

“Phung adei mbha mmông hriăm aguah leh anăn ti adŭ hriăm. Mông tlam lŏ ksiêm wĭt leh anăn mâo klei hlăp lêñ čiăng bi hrŏ ƀiă klei kpĭ. Hmei gĭr čiăng lŏ ksiêm wĭt jih klei hriăm mâo leh phung nai mtô leh anăn ngă klei lông bi lông êlâo, lŏ wĭt dlăng klei bi lông dŭm thŭn êlâo čiăng lŏ mâo thiăm klei hriăm mprăp kjăp kơ klei bi lông bi ruê̆ klei hriăm gưl 3 kơ anăp”.

            Bi hŏng 96 čô hđeh sang hră jing mnuih djuê ƀiă nao hlăm klei bi lông bi ruê̆ klei hrăm gưl tlâo thŭn anei, nai Bùi Văn Quế, k’iăng khua kiă kriê sang hră gưl tlâo knŭk kna rông ba hđeh sang hră mnuih djuê ƀiă – sang hră gưl 2 kdriêk Kon Plông brei thâo, êpul kiă kriê sang hră leh anăn phung nai mâo klei uêñ mĭn, ngă dŭm mta bruă msĕ si: Tiŏ nao phung nai kriê dlăng bruă ksiêm wĭt klei hriăm mơ̆ng phung hđeh sang hră hlăm mmông mmăt, bi kơ phung hđeh amâo mâo thâo srăng mâo nai hriăm mbĭt, mtô kơ diñu čiăng jhŏng nao hlăm klei bi lông:

        “Êpul khua kiă kriê sang hră mâo jêñ jêñ klei jĕ giăm, uêñ mĭn, mđĭ ai phung hđeh sang hră hlăm mmông hriăm ti adŭ hriăm. Êngao kơnăn hlăm dŭm mmông huă ƀơ̆ng grăp hruê hmei ăt nao čuă êmuh kơ klei huă ƀơ̆ng. Êpul khua kiă kriê sang hră ngă hră akâo kơ bruă sang čư êa kdriêk Kon Plông đru brei prăk huă ƀơ̆ng kơ 69 čô hđeh sang hră mnuih djuê ƀiă hlăm 4 hruê diñu nao bi lông kñăm mđĭ ai phung hđeh sang hră".

Klei bi lông bi ruê̆ klei hriăm gưl tlâo thŭn anei čar Kon Tum mâo 5.028 čô nao bi lông, hlăm anăn mâo 1.722 čô bi lông jing mnuih djuê ƀiă. Aduôn Phạm Thị Trung, khua kiă kriê knơ̆ng bruă mtô mjuăt bi hriăm čar Kon Tum brei thâo, klei ruă tưp Covid-19 hmăi amâo mâo jăk truh kơ klei hriăm hră mơar mơ̆ng phung hđeh sang hră. Čiăng đru kơ diñu djă kjăp klei hriăm, thâo hlăm klei bi lông, knơ̆ng bruă mtô mjuăt bi hriăm čar Kon Tum hluê ngă hdră êlan mdê hĭn hlăm bruă ksiêm wĭt klei hriăm.

“Dơ̆ng truh hruê bi lông, knơ̆ng bruă ăt mkŏ mjing Êpul hdră êlan truh hŏng grăp sang hră, jao hnơ̆ng čuăn hdră êlan leh anăn dŭm mmông ksiêm wĭt klei hriăm. Grăp čô jing sa hdră êlan, mta kñăm mdê mdê. Ksiêm wĭt klei hriăm hŏng ai tiê anăn phung hđeh sang hră thâo klei êdu kƀah leh anăn klei găl pô. Lông ngă klei bi lông mrâo anei, hmei lŏ hrŏng mă sa blư̆. Phung hđeh sang hră čiăng đru lu hĭn srăng mkŏ mjing dŭm klei hriăm, êpul dŭm hdră êlan đru kơ phung hđeh sang hră mâo klei jhŏng, ênŭm klei hriăm nao hlăm klei bi lông gưl anei.”

Gưl bi lông thŭn anei, kluôm čar maoa êbeh 21.000 čô bi lông, hlăm anăn phung bi lông jing mnuih djuê ƀiă mâo 28%. Bi kơ ênoh anôk bi lông, mâo 33 anôk bi lông hŏng 900 adŭ bi lông. Truh kơ ară anei, dŭm anôk bruă bi djăp leh grăp klei găl mơ̆ng mnơ̆ng yua, kdrăp yua ti anôk bi lông, anôk kđăm klei bi lông leh anăn anôk brei puăng klei bi lông hluê si klei čuăn.

Knơ̆ng bruă ăt tiŏ nao giăm 3000 čô knuă duh, dlăng klei bi lông, đru kơ klei bi lông, ka yap ôh êpul ksiêm duah. Bruă mtô mjuăt phung bi lông, mprăp kơ mnơ̆ng yua, adŭ mdrao mgŭn kơ phung bi lông dưi rơ̆ng kjăp. Êpul gĭt gai klei bi lông brei thâo, dôk ngă jăk bruă hâo hưn, mđĭ ai čiăng phung hđeh sang hră mâo klei hơĭt hlăm klei bi lông. Mbĭt anăn mñă klă mprăp ênŭm leh kơ bruă răng mgang klei êđăp ênang dŭm hruê bi lông. Đại tá Nguyễn Hữu Lương, khua adŭ bruă klei êđăp ênang bruă kđi čar, kahan ksiêm čar Dak Lak brei thâo:

“Jih jang dŭm mta bruă djŏ tuôm hŏng phung ngă truh boh klei ti Čư̆ Kuiñ mrâo anei anei jing mâo klei hmăi kơ klei êđăp ênang ƀiădah hmei ƀuh amâo mâo klei hŭi hyưt kơ bruă mkŏ mjing klei bi lông kơ phung hđeh sang hră ti čar Dak Lak ară anei. Dŭm êpul êya kahan ksiêm čar Dak Lak bi mguôp kjăp hŏng knơ̆ng bruă mtô mjuăt bi hriăm hrăm mbĭt bi klă dŭm mta bruă plah wah gưl čar truh kơ kdriêk, srăng rơ̆ng kơ klei êđăp ênang kơ gưl bi lông anei.