Ti anôk bruă alŭ Phan Dũng, să Tuy Phong mƀlir hră anăn phung bi ala leh anăn phung mgơ̆ng asei bi ala Bruă Kbĭn ala gưl 16 leh anăn Êpul gơ̆ng bruă ƀuôn sang dŭm gưl wưng thŭn 2026 - 2031 mâo nanao phung nao dlăng. Mang Nhu, mnuih djuê ana Raglai ti alŭ Phan Dũng brei thâo, dŭm hruê êgao knuă druh alŭ nao ti grăp gŏ sang čiăng hưn kơ klei mplĕ hră, mtă kơ mnuih ƀuôn sang ksiêm kơ phung mgơ̆ng aseu leh anăn hră anăn phung bi ala, mprăp nao mplĕ hră.

 Grăp čô mnuih ƀuôn sang dưi ruah phung bi ala, kyuanăn srăng ruah bi djŏ. Jing sa čô mplĕ hră hmăng hmưi sơăi phung bi ala djŏ ruah uêñ mĭn lu hĭn kơ klei hmăng hmưi mnuih ƀuôn sang, uêñ mĭn čiăng mâo klei hdĭp trei mđao, yâo mơak. kâo ƀuh mnuih ƀuôn sang ăt bi mtă mtăn, mđĭ ai anak čô djăp 18 thŭn dưi nao mplĕ hră.”

Mang Hiếu, Khua alŭ Phan Dũng brei thâo, alŭ mâo lu mnuih ƀuôn sang jing mnuih Raglai, ti anôk mplĕ hră mrô 5 mơ̆ng să Tuy Phong, čar Lâm Đồng. Alŭ mâo 663 čô mplĕ hră leh anăn phung mplĕ hră mâo leh sơăi klei hưn kơ hruê ruah khua.

 Čiăng kơ mnuih ƀuôn sang thâo klă hĭn kơ hruê 15/3 jing hruê jih jang mnuih ƀuôn sang nao mplĕ hră ară anei alŭ bi mguôp hŏng mặt trận čiăng hâo hưn hlăm zalo mơ̆ng êpul ăt msĕ mơh fanpage mơ̆ng Êpul ƀĭng ngă lŏ hma. Hluê anăn čiăng hâo hưn kơ mnuih ƀuôn sang thâo anăn jing hruê nao mplĕ hră, mơĭt klei hmăng hmưi, klei čiăng pô hŏng phung mgơ̆ng asei.

Ti să Bắc Bình, čar Lâm Đồng, bruă mprăp kơ hruê knăm prŏng dưi bi leh. Găn nao dŭm alŭ ƀuôn mnuih CHăm mơ̆ng să Bắc Bình, djăp anôk hmư̆ asăp mđung hưn kơ klei ruah khua. Amâo djŏ knŏng hâo hưn hlăm klei mđung asăp, dŭm êpul lŏ klă anăp bi mguôp hŏng phung mâo kơhưm, phung khua kiă klei đăo hlăm êpul êya mnuih Chăm truh kơ grăp gŏ sang čiăng mtrŭt mjhar, hlăk mblang kơ mnuih ƀuôn sang thâo klă boh tŭ dưn mơ̆ng klei ruah khua. Sư cả Huỳnh Cứng, sa čô khua kiă klei đăo mnuih Chăm ti alŭ Bình Tiến, să Bắc Bình brei thâo: hŏng klei hâo hưn, mnuih ƀuôn sang Chăm thâo klă ruah amâo djŏ knŏng boh tŭ dưn ƀiădah lŏ jing bruă klam mơ̆ng grăp čô mplĕ hră. Mơ̆ng anăn, bi lar ai tiê hơ̆k mơak, đăo knang čiăng kơ hruê mplĕ hră 15/3 kơ anăp klă sĭt jing hruê knăm prŏng mơ̆ng jih jang mnuih ƀuôn sang.

 Dŭm hruê êgao alŭ wăl hâo hưn kluôm kơ klei ruah khua, ti êlan ăt yuôl ƀăng rôn, hla čhiăm gru čiăng sa ai hŏng hruê ruah khua. Kâo pô jing sa čô khua kiă klei đăo, kâo ăt hâo hưn tal êlâo hĭn hŏng mnuih ƀuôn sang pô hdơr nao mplĕ hră leh anăn ruah phung mâo klei thâo, klei mĭn, čiăng kơ êdei anăp leh djŏ ruah dưi ngă djŏ klei ƀuăn pô êlâo dih, đru mguôp ai tiê pô kơ ƀuôn sang.

Nguyễn Thị Vân Khánh, Khua dhar bruă ruah khua să Bắc Bình brei thâo, kluôm să mâo êbeh 36.400 čô mplĕ hră. Čiăng mprăp kơ klei mplĕ hră ruah phung bi ala Bruă Kbĭn ala gưl 16 leh anăn Êpul gơ̆ng bruă ƀuôn sang dŭm gưl wưng thŭn 2026 - 2031, Bruă sang čư̆ êa să mjêč hluê ngă hrăm mbĭt dŭm bruă klam hŏng klei gĭr, boh nik jing bruă hâo hưn.

 Bruă bi myuôm dưi hâo hưn, boh nik ti krĭng mnuih djuê ƀiă. Leh anăn hluê anăn hmei bi mguôp bruă hâo hưn čiăng hưn leh ană kah mbha dŭm boh klei djŏ tuôm hŏng klei ruah khua. Hdră kčah mâo gưl dlông gĭt gai hmei ăt rơ̆ng djŏ hdră kčah mbĭt, hluê ngă dŭm mta phŭn djŏ tuôm hŏng klei mplĕ hră. Leh anăn hmei đăo knang hruê 15/3 klă sĭt jing knăm mơak mơ̆ng jih jang mnuih ƀuôn sang.

Ăt msĕ hŏng să Bắc Bình, să Tuy Phong mrâo mkŏ mjing mâo ênhă prŏng, mnuih ƀuôn sang ƀiă, klei hdĭp adôk lu klei dleh dlan, čiăng kơ bruă mprăp klei mplĕ hră srăng dưi ngă jăk. Trần Di Hậu, k’iăng khua Bruă sang čư̆ êa să Tuy Phong, čar Lâm Đồng brei thâo, ênoh phung mplĕ hră mơ̆ng să  jing 6.616  hlăm 9751 čô mnuih ƀuôn sang. Ti alŭ wăl să mâo 2 anôk mplĕ hră mâo lu mnuih djuê ƀiă jing alŭ Phan Dũng leh anăn alŭ Tuy Tịnh 2. Truh kơ ară anei, bruă hâo hưn mâo alŭ wăl ngă hŏng lu hdră êlan găl guôp.

 Leh mâo hră anăn phung mgơ̆ng asei, să ăt gĭt gai mkŏ mjing kdrêč hâp hưn klah čŭn mơ̆ng grăp čô bi ala čiăng mđung asăp, leh anăn mđung hlăm fanpage. Leh anăn mơ̆ng ară anei truh kơ knăm 7 ti dŭm anôk mâo lu mnuih ƀuôn sang msĕ si sang hră, sang mnia čiăng mâo thiăm dŭm pŏk mdha hưn leh anăn dŭm pano čiăng kơ mnuih ƀuôn sang thâo klă hĭn klei yuôm bhăn mơ̆ng klei ruah khua.

Dŭm mmông bi tuôm hŏng phung mplĕ hră hŏng phung mgơ̆ng asei, dŭm anăn knăm hâo hưn kơ hruê ruah khua, ênai asăp mđung kwang hlăm grăp hruê…jing jang dôk mkŏ mjing ai êwa hơ̆k mơak ti anăp hruê ruah khua ti krĭng mnuih Chăm, Raglai.