VOV4.Êđê - Mdiê - jing mnơ̆ng pla ba hnư hrui wĭt phŭn ti kdriêk Êa Sup, čar Dak Lak. Khă snăn, mta mnơ̆ng ba hnư hrui wĭt phŭn anei dôk tlă anăp hŏng klei ktuôp uê đĭ lar lehanăn ba lu klei luič liê. Ƀĭng ngă lŏ hma, dŭm gưl bruă sang čư̆ êa lehanăn anôk thơ̆ng kơ bruă mơ̆ng kdriêk mjêč hluê ngă dŭm hdră msir kñăm gang mkhư̆ klei ktuôp uê ngă, răng mgang mnơ̆ng dhơ̆ng pla.

Êbeh 1 hruê kăm anei, Êpul hgŭm ƀĭng ngă lŏ hma să Ea Lê, să mâo ênhă pla mjing mdiê prŏng hĭn ti kdriêk Ea Sup, čar Dak Lak suăi êmăn kyua mnơ̆ng ngă jing ktuôp uê đĭ lêč ti alŭ wăl. Hluê si Trần Lệ Thuỷ, K’iăng Khua Êpul hgŭm brei thâo, anei jing yan mdiê mâo ktuôp uê ngă kjham hĭn hlăm 6 thŭn êgao. Êpul hgŭm bi hgŭm leh hŏng Anôk bruă mtrŭt mjhar lŏ hma, anôk răng mgang mnơ̆ng pla mjing kdriêk, ksiêm dlăng boh klei čiăng hmao hưn kơ mnuih ƀuôn sang brei răng kơ dŭm hdră msir djŏ guôp. Trần Lệ Thuỷ brei thâo, kyua ktuôp uê lar pral, đa đa gŏ êsei ƀĭng ngă lŏ hma wiă mdiê hnưm. Đa đa hlŏng lui mdiê.Klei ktuôp êa ngă kơ mdiê dôk mda snăn hlŏng lui yơh. Bi dŭm gŏ êsei mâo mdiê giăm ksă, kă truh yan wiă snăn hlŏng wiă yơh. Lui snăn ktuôp hlŏng ƀơ̆ng jih, luič mang. Snăn să srăng luič yan mdiê, bi yan mđiă anei jing yan mdiê phŭn hlăm thŭn.”

Să Ea Lê yan anei, mdiê mphŭn ksă kñĭ, jih dua nah êlan dơ̆ng prŏng mlir să. Dôk hlăm êlan dưi ƀuh jih kdrăn mâo anôk ktuôp uê ngă. Leh sa gưl nao dlăng mdiê, Nguyễn Đức Thịnh ti alŭ 3, să Ea Lê luič klei čang hmăng kyua mdiê ñu ktuôp uê ngă lu đei:Ktuôp uê ƀơ̆ng lu snăk. Ih dlăng lăng, ti kdrăn lŏ mrâo wĭt ƀuh jih, lu snăk. Dih, dlăng ti anôk kbưi ƀiă anăn, ñu ƀơ̆ng jih leh.

Hlăm ênoh dŭm gŏ êsei ƀĭng ngă lŏ hma wiă mdiê hnưm čiăng dêč kơ klei mnơ̆ng ngă, ayŏng Hồ Giáp ti alŭ m3, wiă leh 4 sao mdiê hlăm ênoh êbeh 2 ha mơ̆ng gŏ sang. Ayŏng Giáp brei thâo, ăt 4 sào anei, yan êlâo gŏ sang mâo wiă 3 ton mdiê, ƀiădah yan anei knŏng mâo 2 ton mkrah. Yan êlâo, gŏ sang mâo wăt adrăng čiăng rông êmô, ƀiădah yan anei adrăng čih jih yơh:Hruê anei wiă, tơdah mlam anei amâo hjan snăn hruê mgi srăng ba čuh jih. Dưi ba čuh jing jăk kyua dŭm boh ktuôp uê srăng djiê jih. Bi tơdah amâo ngă snăn, truh yan êdei ñu srăng kčeh lu snăk.

Hlue si Anôk răng mgang mnơ̆ng pla mjing Ea Sup, hlăm brô 6 thŭn, ktuôp uê ngă kơ mdiê srăng mâo sa blư̆ hlăm dŭm krĭng mdiê ti kdriêk, ƀiădah yan anei hnơ̆ng tưp lar kjham hĭn dŭm gưl êlâo. Boh nik ti Kdrăn lŏ mrô 1, să Ea Lê, anôk bruă ƀuh leh lu kdrăn lŏ mnơ̆ng ngă lu snăk, ênhă êbeh 20 êbâo m2. Hluê si Nguyễn Văn Thủy, khua nôk bruă, čiăng gang mkhư̆ klei ktuôp uê ngă, hmaĭ kơ yan pla mjing kơ anăp, anôk bruă mđĭ ktang klei hâo hưn, bi hriăm dŭm hdră msir hdră mnêč djŏ guôp. Mbĭt anăn mđĭ ktang ktuê dlăng anôk bruă răng mgang mnơ̆ng pla mjing, ñĕ kơ bruă mjhua ênoh, kpĭ kơ ƀĭng ngă lŏ hma. “Dŭm ênhă ktuôp uê ngă, ƀiădah knŏng dôk dŭm hruê jing wiă yơh snăn hmei mtă kơ mnuih ƀuôn sang pral wiă hnưm. Hŏng ênhă amâo dưi wiă snăn krih êa drao. Tal dua hmei ăt nao ti dŭm anôk čhĭ êa drao kroh kơ mnơ̆ng pla mjing, mtă kơ jih jang amâo dưi mđĭ ênoh hlăk êjai klei ruă tưp ngă snei. Tơdah ƀuh ti anôk ngă soh snăn srăng hưn hŏng gưl dlông đŭ bi kmhal.”

Ea Sup jing kdriêk pla mjing mdiê prŏng hĭn Dak Lak, hŏng giăm 8 êbâo ha hlăm yan puih mnga anei. Kyua anôk bruă knơ̆ng kdơ̆ng êa jăk, lu ƀĭng ngă lŏ hma hlăm kdriêk pla mjing 3 yan grăp thŭn, wưng yan bi kbưi bhiâo. Mbĭt anăn yan adiê thŭn anei ti Ea Sup amâo jăk, hŏng hnơ̆ng yan adiê ƀiă mđiă, hjan lu hĭn kơ grăp thŭn. Anei jing dŭm mta huĭ kơ ktuôp uê lŏ ngă kơ yan kơ anăp ti kdriêk.  Ƀĭng ngă lŏ hma, bruă sang čư̆ êa dŭm gưl leh anăn dŭm anôk bruă djŏ tuôm ti kdriêk dôk lŏ dơ̆ng ngă dŭm hdră msir djŏ guôp čiăng hnưm mkhư̆ klei ruă tưp, rơ̆ng boh mnga mdiê - phŭn hrui mă phŭn mơ̆ng ƀĭng ngă lŏ hma ti alŭ wăl.