Dŭm mlam êgao, lu krĭng mnuih ƀuôn sang dôk ti krah ƀuôn prŏng Đà Nẵng mngač nanao pui. Ti ƀuôn hgŭm Hòa Hải, alŭ Ngũ Hành Sơn, dŭm pluh čô mâo mnuih mă bruă, lĭng kahan, knuă druh, phung mduôn khua êbeh leh 70 thŭn nao đru điŏ, êtak mtah čiăng đŭng ƀêñ điŏ ba mơĭt kơ mnuih ƀuôn sang hmaĭ mơ̆ng klei yan adiê ngă ti kwar Dưr. Grăp klŏ ƀêñ điŏ bŏ hŏng klei khăp ba mơĭt kơ mnuih ƀuôn sang kwar Dưr.

Aguah ưm anei, Trần Thị Thương, gŏ sang mă bruă mnia mblei ti sang mnia Hoà Cường mdei êjai bruă čhĭ mnia, nao blei 50 kg điŏ lehanăn êtak mtah čiăng ba kơ mnuih ƀuôn sang bi đŭng điŏ. Thương brei thâo:

 “Mơ̆ng dŭm klei hâo hưn hlăm hdră mđung rup, mđung asăp, kâo ƀuh ênguôt lehanăn pap êdi, pô amâo mâo dưi đru lu msĕ si arăng, snăn hmei bi hgŭm đŭng ƀêñ điŏ. Sa klŏ ƀêñ dôk êpa bi knar hŏng sa hruh prŏng tơdah drei trei. Mlam mbruê truh kơ ară anei kâo bi mĭn, aguah anei kâo hlŏng hriê truh tinei čiăng dưi đŭng lehanăn tŭk ƀêñ ba mơĭt hlăm hruê mtam. Pô ƀuh klei truh snăn ênguôt êdi ê’ưn yơh.

Dŭm hruê anei, gŏ sang Nguyễn Thành Long, mnuih hlăm Êpul hgŭm bruă dŭ mdiăng mnơ̆ng Đà Nẵng ti ƀuôn hgŭm Hòa Hải, alŭ Ngũ Hành Sơn jing anôk mnuih ƀuôn sang hriê tŭk knă ba mơĭt kơ kwar Dưr. Jih hruê mlam, wăl sang ñu mngač nano pui. Jih mlam mnuih ƀuôn sang dôk tŭk ƀêñ. Đặng Tâm, khădah êbeh 70 thŭn dôk ti alŭ Ngũ Hành Sơn ăt krŏng ală dôk tŭk gŏ ƀêñ điŏ čiăng aguah ưm mgi dưi ba nao đru kơ mnuih ƀuôn sang ti kwar Dưr.

 “Kâo khădah khua asei leh ƀiădah kâo ăt gĭr đŭng ƀêñ điŏ mbĭt hŏng ayŏng adei mkăn ba mơĭt kơ mnuih ƀuôn sang hmăi mơ̆ng klei êa lip ti kwar Dưr. Hmei hriê đŭng dơ̆ng mơ̆ng mmăt mbruê truh kơ ară anei, ngă truh 11-12h mlam kơh wĭt, hruê anei hmăi ăt lŏ ngă mơh”.

Sang pŏk anôk čhĭ kphê mơ̆ng gŏ sang Nguyễn Thành Long ăt jing anôk mnuih ƀuôn sang ba mơĭt mnơ̆ng đru kơ mnuih ƀuôn sang hmăi mơ̆ng klei êa lip ti kwar Dưr. Nguyễn Thành Long brei thâo, lu thŭn êgao, grăp blư̆ Đà Nẵng amâo dah mnuih kwar Krah mâo klei yan adiê ngă mâo nanao klei khăp mơ̆ng mnuih ƀuôn sang kluôm ala. Ară anei, mnuih ƀuôn sang dŭm čar nah Dưr tuôm hŏng klei dleh dlan, mnuih ƀuôn sang čŏng pô đru mguôp, grăp čô ênguôt êdi lehanăn čang hmăng dưi đru mdul klei dleh dlan hŏng mnuih ƀuôn sang ti kwar Dưr mmông anei.

 “Hruê mbruê dưi đŭng leh 1 êbâo klŏ ƀêñ điŏ, hruê anei lŏ đŭng thiăm 1 êbâo klŏ dơ̆ng čiăng mơĭt truh kơ mnuih ƀuôn sang kwar Dưr. Ayŏng adei nao hgŭm hlăm êpul anei bi đru mbĭt yơh. Mnuih ƀuôn sang ăt đru prăk kăk blei mnơ̆ng, hlăm hruê anei, mgi hmei srăng nao truh ti čar Yên Bái. Nao hlăm hdră anei, pô ăt iêu mtrŭt klei đru mơ̆ng alŭ, ƀuôn, amai adei ti ƀuôn hgŭm Hòa Hải, alŭ Ngũ Hành Sơn. Hmei ka mâo klei mĭn mdei ôh bruă đŭng ƀêñ điŏ anei. Bi kơ prăk kăk hlei mâo hlei pô, mâo êa, ƀung hdang krô, ƀêñ mi, mnơ̆ng yua đru yơh, hmei čih pioh klă klơ̆ng lehanăn ba mơĭt kơ ayŏng adei kwar Dưr. Bi ƀêñ điŏ hmei srăng đŭng truh kơ aguah mgi.

 Dŭm hruê anei, dŭm anôk mkra ƀêñ ti ƀuôn prŏng Đà Nẵng mđing mrô sa kơ bruă mkra ƀêñ ba đru kơ mnuih ƀuôn sang kwar Dưr. Bruă knŭk kna dŭm čar, ƀuôn prŏng kwar Krah mtrŭt mjhar leh mnuih ƀuôn sang đru kơ kwar Dưr msir mghaih klei luič liê kyua yan adiê mgă. Dŭm êpul ba năp nao leh hlăm hdră đru dŏng lehanăn bi mdoh wăl hdĭp mda. Dŭm boh êdeh mơ̆ng kwar Krah nao truh kơ kwar Dưr mdiăng ba mnơ̆ng ƀơ̆ng lehanăn bŏ hŏng klei khăp hlăk dôk mđing truh kơ mnuih ƀuôn sang hmăi mơ̆ng klei yan adiê ngă ti kwar Dưr, đru digơ̆ pral bi hơĭt klei hdĭp./.