VOV4.Êđê- Dŭm hruê knhal jih mlan 4 mrâo êgao ti Trường Sa yuôm bhăn kyua ti anôk anei 47 thŭn êlâo, hruê 29/4/1975, êpul lĭng kahan mơ̆ng Êpul 1 kahan êa hŏng sa êpul kahan knhăk Kahan krĭng 5 knŏng hlăm wưng bhiâo ngă bruă pral, bi leh bruă klam yuôm bhăn – mtlaih êngiê plao ksĭ Trường Sa, đru mguôp hlăm klei tŭ jing kluôm ênŭm, yuôm bhăn mơ̆ng djuê ana. 47 thŭn êgao, lĭng kahan, mnuih ƀuôn sang Trường Sa hrăm mbĭt sa ai tiê, hrăm mbĭt mkŏ mjing kdriêk plao ksĭ ƀrư̆ hruê ƀrư̆ mdrŏng sah, jăk siam, lu phung knuă druh lĭng kahan êa bi răng mgang klei dưi hlăm êa ksĭ čar kwar.

Hlăm krah lă lia êa ksĭ prŏng, ti gŭ hla čhiăm gru kđuh ti gơ̆ng knăl kơ klei dưi kiă kriê hlăm plao ksĭ Song Tử Tây, mđing hmư̆ klei mmuiñ kwang mơ̆ng klei muiñ kkuh hla čhiăm gru bŏ hŏng klei myưng m’ang mơ̆ng anak mnuih Việt Nam. 10 klei ƀuăn mơ̆ng lĭng kahan ti plao ksĭ Song Tử Tây răk hŏng klei ktang, kwang kbưi bi êdah ai tiê kut kat găn klei dleh dlan bi dưi, ti krah klei lông dlăng hlăm êa ksĭ, kñăm răng mgang klei dưi êngiê êa ksĭ plao ksĭ lăn čar pô.

Song Tử Tây jing plao ksĭ tal êlâo mâo mă klei êngiê hlăm dŭm hrue mlan 4 thŭn 1975 hƀuê ênuk. Dưn yua jih knhuah gru kahan êa pô, hlăm dŭm thŭn êgao, lĭng kahan hlăm plao ksĭ Song Tử Tây mâo nanao klei bi mguôp, sĭt suôr mbĭt rŭ mdơ̆ng lehanăn răng mgang plao ksĭ. Trung tá Phạm Quốc Hùng, pô ngă bruă kđi čar ti plao ksĭ anei brei thâo:

Kâo čoh čuăn khădah si klei jing, ăt jih ai tiê duh kơ lăn čar, kơ phung ƀuôn sang, păn kjăp bruă răng kriê êa ksĭ hlăm klei êđăp ênang lehanăn mđĭ kyar...

 Gak răng ti plao ksĭ Song Tử Tây

47 thŭn leh êgao, dŭm gưl phung kahan êa lŏ bi čuê kơ bruă răng mgang klei dưi êngiê êa ksĭ plao ksĭ pô hlăm Trường Sa, mdưm nanao hlăm ai tiê pô klei dưi mơ̆ng aê ama pô êlâo dih sua mă leh klei êngiê hŏng klang êrah, čiăng răng kriê plao ksĭ lăn čar. Amâo mâo djŏ knŏng kơ ai tiê bi blah jhŏng ktang, ƀiădah lŏ bi êdah ai tiê êpa mhao kơ klei êđăp ênang mơ̆ng lĭng kahan Việt Nam hlăm bruă răng mgang klei dưi êngiê êa ksĭ plao ksĭ lăn čar. Trung tá Ngô Văn Hưng, Khua kiă kriê plao ksĭ Trường Sa lač:

Bruă čuăn mprăp kơ ai tiê bi blah jing bruă phŭn ngă nanao hlăm kđi čar mơ̆ng êpul êya lĭng kahan. Kđông bi kjăp leh ai tiê jih jang lĭng kahan mâo nanao klei thâo răng, mâo klei mprăp prŏng, mkŏ mjing hdră răng kriê, lehanăn klei mjuăt hriăm, mghaih msir bi pral djăp mta klei, mprăp grăp čô lĭng kahan hŏng kdrăp phao ktuang tơdah mâo asăp mtrŭn bi blah snăn bi blah mtam hŏng klei dưi, đru bi răng kriê kjăp klei dưi êngiê plao ksĭ lăn čar.

Trường Sa jing mnư̆ mnang kơ lăn čar, amâo mâo djŏ knŏng knuă druh, lĭng kahan hrue mlam răng kriê plao ksĭ êa ksĭ pô, ƀiădah ti anăn lŏ mâo wăt găp djuê mbĭt mjing leh pưk sang h’uh mđao jăk yâo. Hŏng grăp čô phung ƀuôn sang, digơ̆ bŏ hŏng klei myưng m’ang kyua hrue mlam đru bi răng kriê plao ksĭ hing ang kơ lăn čar. Amai Nguyễn Thị Mỹ Dung, mnuih hdĭp ti plao ksĭ Trường Sa yăl dliê: Hlăm krah êa ksĭ anăn, klei hdĭp jăk yâo anăn mâo klei khăp lĭng kahan lehanăn phung ƀuôn sang dưi hyuă kjăp, tinăn đru mdul leh klei ktrŏ, klei dleh dlan, lĭng kahan lehanăn pjhung ƀuôn sang mđrăm mbĭt ai tiê klei mĭn čiăng rŭ mdơ̆ng klei bi đru bruă răng mgang klei êđăp ênang hŏng klei kjăp:

Kyua mâo klei mđing mơ̆ng Đảng, knŭk kna, knơ̆ng khua kiă kriê kahan êa, lehanăn ai tiê mơ̆ng kluôm ala wir phă plao ksĭ Trường Sa, klei hdĭp hlăm plao ksĭ mâo klei bi mlih lu leh kơ dhar kreh, ai tiê, wăl hdĭp mda, klei hdĭp bi mlih hĭn, phung hđeh mâo nao sang hră mơar. Khădah adiê kơ anei amâo mâo jăk ôh, tuôm hŏng klei dleh dlan nanao, ƀiădah lĭng kahan lehanăn phung ƀuôn sang kơnei sai ai tiê bi mguôp hgao klei dleh dlan, dôk ti krah êa ksĭ poh yă, angĭn ktang, bi rŭ mdơ̆ng Trường Sa knư̆ hrue knư̆ jăk siam hĭn.

 Knăm kkuh kơ hla čhiăm gru ti plao ksĭ Trường Sa

Mơ̆ng sa wăl plao ksĭ bŏ hŏng mđiă lehanăn angĭn, kƀah êa kba, snăn ară anei, mâo klei Đảng, knŭk kna, lĭng kahan lehanăn phung ƀuôn sang kluôm ala mđing uêñ, snăn Trường Sa ară anei mâo leh klei bi mlih prŏng, djăp ênŭm hĭn, jăk siam hĭn. Jih jang bruă mâo rŭ mkra hŏng klei kreh knhâo, mâo êlan klông hŏng betong leh sơăi doh siam. Hŏng atur mơ̆ng kdrăn čuah lehanăn sanhô dưi luôm leh sa êa mtah kyâo mtâo, ana boh tei hŭng... Mâo djam mtam mtah pla jăk siam, mâo leh pui kmlă yua djăp, mâo pui kmlă đĭng blŭ djăp ênŭm dưi luôm leh bŏ plao ksĭ. Lương Xuân Giáp, Khua Êpul Gơ̆ng bruă ƀuôn sang kdriêk plao ksĭ Trường Sa brei thâo: Khădah adôk lu klei dleh dlan, ƀiădah grăp čô phung knuă druh lĭng kahan lehanăn phung ƀuôn sang hlăm kdriêk plao ksĭ mâo sơăi klei thâo săng bruă klam mdê mdê:

Khădah hŏng si klei jing, ƀiădah lĭng kahan lehanăn phung ƀuôn sang ăt sa ai tiê siă suôr hŏng Đảng, hŏng lăn čar, lehanăn phung ƀuôn sang, lehanăn hdră êlan yang ƀuôn ngă phŭn, bi mguôp sa ai tiê gĭr mgaih djăp mta klei dleh dlan, bi leh bruă kčah jao, mjing anôk knang kơ phung trah mă kan êjai hiu trah mă kan lehanăn răng kriê êa ksĭ, mâo nanao klei thâo răng, mprăp ai tiê kơ klei bi blah, răng mgang kjăp kơ klei dưi êngiê plao ksĭ lăn čar.

Găn leh dŭm thŭn êngŭn mlan hlĭm hjan mđiă bhang, găn lu mta klei amâo mâo jăk mơ̆ng yan adiê, Trường Sa ăt dôk kjăp ti krah êa ksĭ msĕ si sa klei bi knăl kơ ai tiê jhŏng ktang, lehanăn klei hdĭp ktang phĭt mơ̆ng lĭng kahan lehanăn phung ƀuôn sang ti Trường Sa krah êa ksĭ bŏ hŏng mđiă lehanăn angĭn anei. Găn lu mta klei dleh dlan, knap mñai ƀiădah lĭng kahan lehanăn phung ƀuôn sang kdriêk plao ksĭ Trường Sa ăt kjăp ai tiê grăp hruê bi leh mta kñăm rŭ mdơ̆ng kdriêk plao ksĭ mdrŏng ktang./.

Pô mblang: Y-Khem Niê