Ngă bruă mơ̆ng Êpul khua kiă kriê bruă mdrơ̆ng hŏng klei yan adiê ngă gưl lăn čar hrue mbrue (12/7), Êpul ngă bruă mơ̆ng phŭn bruă hâo hưn mâo k’iăng khua phŭn bruă Phạm Đức Long ngă khua êpul mă leh bruă hŏng čar Kontum kơ bruă mdrơ̆ng hŏng klei yan adiê ngă. Klei hâo mdah mơ̆ng êpul bruă mdrơ̆ng hŏng klei yan adiê ngă – lehanăn tui duah mnuih luič čar Kon Tum brei thâo, truh ară anei mâo 102 boh să, ƀuôn hgŭm, wăl krah hlăm čar mkŏ mjing leh êpul ba anăp mdrơ̆ng hŏng yan adiê ngă hŏng êbeh 5.200 čô mnuih hgŭm, jih jang 10 kdriêk, ƀuôn prŏng djăp leh ênoh čuăn kơ klei mnuih ƀuôn sang hdĭp mda ngă djŏ tui di hdră mtrŭn mơ̆ng bruă mdrơ̆ng hŏng klei yan adiê ngă, mâo klei kăp hưn, klei kiă kriê gĭt gai bruă mdrơ̆ng hŏng yan adiê ngă.

Blŭ hrăm ti anôk ngă bruă, Phạm Đức Long mñă êdi kơ 4 mta bruă tinăn mtam hlăm klei mdrơ̆ng hŏng yan adiê ngă, mđĭ hĭn bruă hâo hưn, mtô mblang, mkŏ mjing hdră mdrơ̆ng hŏng yan adiê, êjai yan adiê dleh thâo tng knăl msĕ si ară anei./.