Gưl hjan hlĭm knhal jih mlan 11/2025 ti čar Khánh Hoà ngă truh klei hmăi êbeh 6.000 êklai prăk, ngă kơ 22 čô djiê, 20 čô êka leh anăn dŭm êtuh êbâo gŏ sang hmăi djŏ. Nguyễn Hồng Trường, khua anôk bruă đăo knăl yan adiê Khánh Hoà brei thâo, klei yan adiê ngă ƀrư̆ hruê ƀrư̆ dleh ksiêm dlăng. Ti krông Cái Nha Trang, khădah êa lêč ka êgao hnơ̆ng ti nah dlông, ƀiădah ti nah tluôn êa đĭ ka tuôm mâo. Phŭn agha kyua klei bi đĭ kyar wăl krah bi điêt êlan êa đuĕ. Anôk krông đŭt, troh, dap mnai ăt ngă kơ êa lêč đĭ pral, đuê̆ pral ƀiădah klei hmăi ăt lu hĭn.

 “Hmei dôk bi klă grăp anôk êa lêč ti dŭm alŭ wăl êngăp êlam. Ăt msĕ mơh sang kâo jing sa anôk êa lêč leh anăn anôk bruă mâo giăm 20 gŏ sang knuă druh mâo sang êa êngăp mơ̆ng 1m - 2m, anăn jing gru êa lêč. Hluê anăn, anôk bruă čih mkra hră kak êa lêč, jing tur knơ̆ng hưn hŏng Bruă sang čư̆ êa čar ngă klei čuăl mkă, mđĭ hĭn boh tŭ dưn bruă gang mkhư̆ klei truh yan adiê hlăm wưng kơ anăp.

Mơ̆ng boh sĭt bruă bi mdrơ̆ng hŏng klei êa lêč knhal jih thŭn dih, Thiếu tướng Nguyễn Túy, khua gĭt gai lĭng kahan čar Khánh Hòa, ktrâo klă dŭm klei êduh kƀah čiăng msir mgaih: bruă thâo klă boh sĭt alŭ wăl ka klă, klei bi mguôp plah wah dŭm êpul ka kjăp, hdră 4 tinăn mtam ka hmao hluê ngă leh anăn klei blŭ hrăm đru gĭt gai mâo wưng kpăk. Thiếu tướng Nguyễn Túy,  mñă brei ngă mtam hră kak anôk êa lêč čiăng dưi čŏng ksiêm dlăng, mbĕ đuê̆ mnuih ƀuôn sang mơ̆ng anôk hŭi hyưt, čŏng mkăp kdrăp yua, mđĭ klei hriăm mjuăt leh anăn mđĭ klei bi mguôp pla wah dŭm êpul bruă.

 “Êpul gĭt gai lĭng kahan ƀuôn čar gĭt gai dŭm alŭ wăl, anôk bruă lŏ dơ̆ng ksiêm dlăng wăl mnuih ƀuôn sang, anôk mă bruă, kđông kahan, mbĕ đuĕ mnuih, êdeh êdâo mơ̆ng anôk hŭi hyưt. Mbĭt anăn hưn mdah hŏng Bruă sang čư̆ êa čar mkŏ mjing dŭm hdră êlan mđĭ kyar bruă duh mkra ala ƀuôn găl guôp hŏng boh sĭt alŭ wăl, mprăp klei bi mdrơ̆ng hŏng klei truh yan adiê leh anăn tui duah đru dŏng”.

Trần Phong, Khua Bruă sang čư̆ êa čar Khánh Hòa lač, čiăng dlăng kơ bruă bi mdrơ̆ng hŏng klei yan adiê ngă hluê ngă čŏng pô, wưng sui. Mbĭt hŏng bruă ksiêm dlăng dŭm anôk arưp aram ktang, alŭ wăl čiăng bi kluôm hdră êlan gang mkhư̆ klei truh yan adiê, mđĭ ai dưi gĭt gai, ktrâo lač leh anăn mtrŭt mđĭ ba yua klei kreh knhâo mrâo mrang hlăm klei ktuê dlăng, đăo knăl, hưn brei răng.

 “Čiăng mjêč ksiêm dlăng, mkra mlih, bi kluôm hdră êlan bi mdrơ̆ng hŏng klei truh yan adiê wưng thŭn 2026 - 2030, bi mrâo dŭm hdră êlan bi mdrơ̆ng hluê hnơ̆ng klei truh, klă hŏng boh sĭt grăp krĭng, grăp alŭ wăl. Mbĭt anăn mđĭ hnơ̆ng bruă gĭt gai, mtrŭt mđĭ klei mlih mrô, dưn kyua kdrăp mrâo hlăm klei ktuê dlăng, đăo knăl, hưn brei răng leh anăn gĭt gai truh nah gŭ”.

Boh sĭt ti Khánh Hoà brei ƀuh, hlăm wưng klei mlih yan adiê, klei yan adiê ngă amâo lŏ msĕ hŏng êlâo ôh. Dŭm ênoh čuăn êđăp ênang nanao, klei hưn êlâo, ai dưi đăo knăl leh anăn čŏng pô bi mdrơ̆ng jing mta bi klă. Dŭm klei hriăm mơ̆ng êa lêč srăng lŏ jing tur knơ̆ng brei kơ dŭm alŭ wăl čŏng pô hĭn ti anăp klei yan adiê ngă, bi hrŏ klei hmăi leh anăn răng mgang klei êđăp ênang kơ mnuih ƀuôn sang.