Hluê ngă klei bi klă mơ̆ng k’iăng Khua knŭk kna Trần Lưu Quang hlăm klei kƀĭn trông kluôm ala kơ bruă gang mkhư̆, bi mdrơ̆ng hŏng klei truh yan adiê leh anăn tui duah đru dŏng thŭn 2024, čar Kon Tum dôk mjêč ngă bruă ksiêm dlăng kluôm bruă mprăp bi mdrơ̆ng kơ klei hjan hlĭm êa lêč mơ̆ng dŭm alŭ wăl, anôk bruă ti alŭ wăl čar.

Hluê anăn, Êpul gĭ gai bruă gang mkhư̆, bi mdrơ̆ng hŏng klei truh yan adiê leh anăn tui duah đru dŏng čar Kon Tum mñă kơ dŭm alŭ wăl, anôk bruă ksiêm ksiêm dlăng dŭm anôk bruă mkŏ mkra kñăm, anôk mâo klei arưp aram mâo klei êa lip lêč, klưh hroh, ksiêm dlăng bruă mkŏ mjing hdră êlan, mprăp ai dưi, kdrăp yua hŏng hdră “4 sa anôk” čiăng bi mdrơ̆ng hŏng klei truh yan adiê, klei êa lip lêč tam mâo. Mbĭt hŏng bruă ksiêm dlăng kluôm bruă gang mkhư̆, bi mdrơ̆ng hŏng klei truh yan adiê leh anăn tui duah đru dŏng, bruă sang čư êa dŭm alŭ wăl ti čar Kon Tum ăt bi kluôm ênŭm, mbŏ ai dưi kơ bruă gang mkhư̆, bi mdrơ̆ng hŏng klei truh yan adiê leh anăn tui duah đru dŏng, čŏng pô mkŏ mjing dŭm hdră êlan kơ dŭm bruă tui duah đru dŏng ti alŭ wăl.