Aguah 26/12, ti Hà Nội, Phŭn bruă sang hră mtô bi hriăm gĭt gai bi hgŭm hŏng Anôk bruă hâo hưn mtô mblang gưl dlông, Êpul hgŭm phung êdam êra cộng sản Hồ Chí Minh mkŏ mjing knăm ksiêm wĭt, mđup brei klei pah mni bi lông online “Phung mda asei tui hriăm leh anăn hlue ngă knhuah mngač Hồ Chí Minh” thŭn 2023. Anei jing thŭn tal 9 klei bi lông dưi mkŏ mjing kñăm mđĭ bruă tui hriăm leh anăn hlue ngă knhuah mngač Hồ Chí Minh hlăm phung êdam êra, hđeh sang hră, phung hriăm gưl prŏng hlăm ala čar leh anăn ala tač êngao. Klei bi lông thŭn anei mkŏ mjing mơ̆ng hruê 11/9 truh hruê 26/11 hlue hdră bi lông ruah klei wĭt djŏ online. Leh êbeh 3 mlan mkŏ mjing, klei bi lông iêô jak êbeh 2 êklăk 100 êbâo čô bi lôg. Hgao dŭm klei bi lông, tuôr bi lông knhal tuč, Anôk bruă ruah 186 čô mâo klei tŭ êdah êdi hlăm Klei bi lông knhal tuč dăp anăn phung bi lông kluôm ala. Hlăm knăm ksiêm wĭt leh anăn mđup brei klei bi lông, 90 čô mâo klei tŭ êdah êdi dưi mđup brei klei pah mni mrô sa, dua, tlâo leh anăn mđĭ ai. Anôk mkŏ mjing ăt mđup brei klei pah mni êpul lu kơ 10 anôk mtô bi hriăm mâo ênoh hđeh sang hră bi lông lu hĭn./.