VOV4.Êđê- Mrâo anei, ti Hà Nội, Êpul khua bruă Đảng gưl dlông Đảng cộng sản Việt Nam, bruă kƀĭn ala, Khua lăn čar, knŭk kna, Dhar bruă mặt trận čar kwar Việt Nam mkŏ mjing leh knăm bi hdơr 60 thŭn hruê mkŏ mjing klei mjĕ giăm leh anăn 45 thŭn hruê kuôl kă klei bi hgŭm, bi mguôp Việt Nam – Lào. Hlăm knăm kdrưh kơăm anei, Khua gĭt gai Đảng Nguyễn Phú Trọng lŏ sa blư̆ mñă klă, amâo mâo mdei bi mbŏ klei mjĕ giăm jăk siam leh anăn klei bi mguôp kluôm ênŭm Việt Nam – Lào.

Lŏ bi hdơr klei bi hgŭm yuôm bhăn plah wah Đảng, knŭk kna lehanăn phung ƀuôn sang dua ala čar Việt Nam - Lao, Khua gĭt gai Đảng Nguyễn Phú Trọng lač, ti gŭ klei kiă kriê mơ̆ng Đảng Cộng sản Việt Nam, lehanăn Đảng yang ƀuôn krŭ kdơ̆ng Lao phung ƀuôn sang dua ala čar mra ksĭng mra dơ̆ng mơ̆ng hrue mphŭn mkŏ mjing bŏ hŏng klei lông dlăng knap mñai răng mgang lehanăn rŭ mdơ̆ng lăn čar yang ƀuôn ngă phŭn ti grăp ala čar. Dua Đảng, dua ala čar mâo klei bi đru mbĭt ƀrư̆ ƀrư̆ kơrŭ bruă duh mkra leh klei bi blah, lehanăn ƀrư̆ ƀrư̆ mâo klei hyuă kjăp hĭn jih jang bruă msĕ si klei duh mkra, dhar kreh, yang ƀuôn, sang hră mơar, bruă răng mgang klei êđăp ênang lehanăn bruă hŏng tač êngao.

Khua gĭt gai Đảng Nguyễn Phú Trọng lač, ti gŭ klei mtrang mngač mơ̆ng hdră êlan Marc - Lenin, klei mĭng Hồ Chí Minh ti Việt Nam, lehanăn klei mĭn Keison Phomvihan ti Lao, dua Đảng, dua ala čar lŏ dơ̆ng hrăm mbĭt hlăm klei mlih mrâo, mâo leh dŭm klei tŭ dưn yuôm bhăn prŏng prĭn hlăm bruă mđĭ kyar klei duh mkra ala ƀuôn, păn kjăp bruă kđi čar, klei êđăp ênang yang ƀuôn, ba wĭt klei trei mđao kơ phung ƀuôn sang mdê bi ala čar.

“Lŏ dlăng êwang êlan hƀuê ênuk bŏ hŏng klei myưng m’ang dua djuê ana mđrăm mbĭt găn leh, drei dưi đăo knang klei bi mguôp yuôm bhăn anei, klă sĭt jing klei klă mngač, jih ai tiê sĭt suôr mbĭt plah wah dua Đảng, dua ala čar lehanăn phung ƀuôn sang dua ala čar Việt Nam lehanăn Lao găn leh. Klei bi mguôp yuôm bhăn Việt Nam - Lao mâo leh phung khua gĭt gai prŏng jing Hồ Chí Minh, lehanăn Keison Phomvihan, lehanăn Sufanuvong pô mjing atur, jih ai tiê rŭ mdơ̆ng, kriê pioh lehanăn ksul mbŭ hŏng êa hŏ, ai tiê klang êrah dŭm gưl lĭng kahan lehanăn phung ƀuôn sang dua ala čar, klă sĭt jing leh ngăn dưn yuôm bhăn, klei bi mguôp mâo mă sa anei hlăm hƀuê ênuk dlông rŏng lăn”.

Khua gĭt gai Đảng Nguyễn Phú Trọng blŭ hrăm hlăm klei bi kƀĭn

            Tui si Khua gĭt gai Đảng Nguyễn Phú Trọng klei bi hgŭm plah wah dua Đảng, dua ala čar Việt Nam, Lao lŏ dơ̆ng mâo klei čăt đĭ kjăp, knư̆ hrue knư̆ mtrŭn agha êlam hĭn, lehanăn mboh lu hĭn, êdah êdi jing klei bi mguôp bruă kđi čar amâo mâo mdei dưi bi kjăp, lehanăn mđĭ knhuang đĭ prŏng, dơ̆ng mơ̆ng “Kleik bi mguôp mâo leh mơ̆ng đưm jing klei bi mguôp prŏng yuôm bhăn, mơ̆ng mlan 2/2019, ƀrư̆ hrue mâo leh klei bi đăo knang, lŏ dơ̆ng tă êlan kơ jih jang bruă hgŭm mkăn; hgŭm bruă lĭng kahan jing nanao kmeh gơ̆ng yuôm bhăn hĭn hlăm klei bi mguôp dua ala čar. Klei hgŭm duh mkra lŏ dơ̆ng mâo klei mtrŭt mđĭ, lehanăn dưi ba wĭt leh klei tuư dưn yuôm bhăn klă mngač hŏng phung ƀuôn sang, lehanăn phung duh mkra dua ala čar, hgŭm bruă sang hră mơar, hgŭm hlăm bruă dhar kreh, bruă mdrao mgŭn, bruă êlan klông dŭ mdiăng, bruă pui kmlă knư̆ hrue bi kjăp lehanăn đĭ kyar. Klei bi mguôp plah wah dŭm alŭ wăl, boh nik plah wah dŭm čar mâo knông lăn mbĭt, ƀrư̆ hrue kjăp hĭn.

Khua gĭt gai Đảng Nguyễn Phú Trọng ăt lŏ lač, êjai boh klei dlông rŏng lăn, lehanăn hlăm alŭ wăl hlăk mâo lu klei bi mlih amâo mâo jăk, dleh thâo tĭng mkă, mnuih kmưn hlăk dôk ti anăp hlăk dôk ti anăp lu klei lông dlăng prŏng msĕ si klei bi blah, klei ruă tưp, kƀah êa săng êa pui, kƀah mnơ̆ng ƀơ̆ng huă; dua Đảng, dua knŭk kna lehanăn mnuih ƀuôn sang dua ala čar ktang hĭn mơh lŏ bi mguôp, sĭt suôr mbĭt, mâo klei hgŭm kjăp hĭn čiăng dưi găn jih jang klei dleh dlan, lŏ dơ̆ng ktuê đuĕ nao phă anôk kčah djuê ana êngiê, lehanăn hdră êlan yang ƀuôn ngă phŭn, hrăm mbĭt jih ai tiê răng mgang lehanăn amâo mâo mdei  ksul mbŭ kơ klei bi mguôp hgŭm mguôp yuôm bhăn, bi mguôp kjăp lehanăn kluôm ênŭm Việt Nam - Lao:

Đảng, knŭk kna lehanăn phung ƀuôn sang dua ala čar bi đru hdơ̆ng găp hŏng klei ktang, kluôm ênŭm hlăm klei mlih mrâo ti Lao, lehanăn jih ai tiê bi myuôm, lehanăn duh tal êlâo kơ klei bi mguôp yuôm bhăn anei jing mah jiăng sĭt suôr, lehanăn jing ayŏng adei plah wah dua Đảng, dua ala čar. Drei čang hmăng mâo nanao klei bi mguôp, bi đru kơ Lao đru mah jiăng msĕ si đru kơ asei pô, yap anei jing bruă knơ̆ng, čang hmăng hrăm mbĭt hŏng Đảng, knŭk kna lehanăn phung ƀuôn sang dua ala čar amâo mâo mdei dưi mđĭ kyar, ksul mbŭ hlăm klei bi đăo knang bruă kđi čar, mđĭ hĭn klei hgŭm bruă lĭng kahan, hyuă kjăp klei bi mjĕ êrô bruă duh mkra êngiê, čŏng mđĭ kyar, ñŭ kma êlam; bi ktưn čiăng kơ jih jang boh tŭ dưn hgŭm bruă knư̆ hrue knư̆ jing năng hŏng awan dhuan mơ̆ng klei bi mguôp Việt Nam - Lao”.

Bounthong Chitmany Khua hlăm Phŭn bruă kđi čar, K’iăng Khua lăn čar Lao blŭ hrăm

Blŭ hrăm ti knăm anăn, Čitmani, K’iăng khjua lăn čar Lao lač, Đảng, knŭk kna lehanăn Lao ktur pioh nanao hlăm ai tiê pô, lehanăn mâo nanao klei hdơr knga prŏng prĭn hŏng Khua gĭt gai Hồ Chí Minh kdrăm k’ah,Khua gĭt gai Keison Phom Vihan, lehanăn khua gĭt gai Sufannuvong jing leh phung mkŏ mjing, lehanăn pô ba êlan êlâo guh mngač êdi hlăm klei kriê pioh, ksul mbŭ klei bi mguôp prŏng, bi mguôp yuôm bhăn lehanăn hgŭm bruă kluôm dhuôm plah wah Việt Nam - Lao jing leh ngăn dưn mbĭt amâo mâo ênoh dưi mkă, jing leh klei bhiăn mâo leh mơ̆ng đưm lehanăn đĭ kyar mơ̆ng dua ala čar, jing leh sa hlăm bruă bi mklă klei dưi mơ̆ng klei krŭ kdơ̆ng mơ̆ng dua ala čar.

“Đảng, knŭk kna lehanăn phung ƀuôn sang dua ala čar bi mklă yap anei jing bruă klam kơ pô hlăm klei mđĭ bi lar knhuah gru bi mguôp mâo leh mơ̆ng đưm kdrăm k’ah, bi mguiôp yuôm bhăn, hgŭm bruă kluôm ênŭm Lao - Việt Nam găn leh hjlăm lu gưl lông dlăng, lehanăn duh leh lu ai tiê ksul mbŭ hŏng êa hŏ, klang êrah phung lĭng kahan jhŏng ktang, lehanăn phung ƀuôn sang Lao lehanăn phung phung ƀuôn sang Việt Nam găn leh hlăm dŭm gưl ênuk čiăng dưi mâo klei mpŭ nanao kơ klei tŭ dưn sĭt kơ phung ƀuôn sang dua ala čar, bi năng hŏng klei Khua giưt gai Keison Phomvihan pia: Čư̆ dưi klă êa dưi khuôt, ƀiădah klei khăp Lao hŏng Việt Nam dôk jăp hĭn kơ čư̆, kjăp hĭn kơ hnoh krông”

Lehanăn klei Khua gĭt gai Hồ Chí Minh lač:

Dah thâo bi khăp dŭm boh čư̆ ăt mlai,

dŭm hnoh krông ăt găn;

Việt nam lehanăn Lao dua lăn čar drei klei khăp jing êlam hĭn kơ hnoh krông Hồng Hà - Cửu Long”./.

Pô mblang: Y-Khem Niê