Hlăm ai êwa kdrưh kơăm, hŏng klei mmuñ “Hồn Tử sĩ”ngă klei bi hdơr, êbeh 30 čô hđeh hriăm thâo ti 7 să knông lăn čar Dak Nông myơr brui mgưi, mnga bi hdơr kơ phung jhŏng ktang djiê êngiă kđông kahan ƀăng jang knông lăn Bu Prăng (să Bu Prăng, kdriêk Tuy Đức. Anei jing sa kdrêč hlăm hră “Mmông hriăm krĭng knông lăn” mơ̆ng lĭng kahan knông lăn Dak Nông mkŏ mjing kơ phung hđeh sang hră.

Tinei, phung hđeh dưi hmư̆ klei yăl dliê kơ klei bi blah, săn asei mlei mơ̆ng phung aê ama, boh nik jing 16 čô lĭng kahan mơ̆ng kđông kahan ƀăng jang knông lăn Bu Prăng, kdơ̆ng mblah truh kơ ai êwa knhal tuč čiăng răng mgang knông lăn Bu Prăng. Dŭm klei hriăm hƀuê ênuk yuôm bhăn anei ngă kơ phung hđeh hmư̆ mgei ai tiê, ksul mbŭ klei khăp kơ lăn čar mơ̆ng diñu. Y-Dũng, dôk hriăm adŭ 7A5, sang hră gưl dua Nguyễn Huệ, să Thuân An, kdriêk Dak Mil, anak rông kđông kahan knông lăn Thuận An brei thâo:

 “Êjai dưi nao hlăm adŭ hriăm ti gơ̆ng knông lăn kâo ƀuh ktưn hưn êdi kơ lăn čar pô. Kâo čiăng lŏ mâo lu hĭn mmông hriăm sơnăn. Êdei diih truh kơ prŏng srăng jing lĭng kahan, răng mgang knông lăn leh anăn lăn čar pô.”

Nao hlăm hdră anei, mbĭt hŏng myơr brui mgưi, myơr mngati knưng bi hdơr phung jhŏng ktang djiê êngiă, phung hđeh sang hră mâo phung nai ao mtah atăt nao čuă dlăng, ksiêm dlăng êlan gak răng, gơ̆ng knông lăn, ksiêm dlăng mnuih, êdeh êdâo găn êrô ti knông lăn. Dưi ktuê dlăng leh anăn hriăm dŭm mta ka mâo hlăm hdruôm hră ƀiădah jing yuôm bhăn leh anăn tŭ dưn đru bi ksul mbŭ klei khăp kơ lăn čar, lŏ mbŏ boh kdrŭt kơ phung hđeh hriăm hră mơar. Gưl tal êlâo nao hlăm adŭ hriăm krĭng knông lăn, ti gơ̆ng knông lăn mrô 55, adei Triệu Thị Cẩm Nhung, dôk hriăm adŭ 9A, sang hră gưl 1 leh anăn gưl 2 Bế Văn Đản, să Thuận Hà, kdriêk Dak Song hơ̆k mơak kyua dŭm klei anei.

 “Kâo ƀuh mmông hriăm jing mơak êdi leh anăn mâo lu klei hriăm klă sĭt hĭn êjai hriăm ti sang hră. Êjai ktuê dlăng leh anăn dưi hriăm tinei kâo ƀuh ai tiê khăp kơ lăn čar dưi mđĭ hĭn leh anăn pô srăng mâo ai tiê, bruă klam răng mgang knông lăn ala čar.”

Thŭn anei jing thŭn tal êlâo hdră “Mmông hriăm krĭng knông lăn” mâo lĭng kahan knông lăn čar Dak Nông mkŏ mjing hlă jih jang dŭm kđông kahan knông lăn hlăm 7 să knông lăn, hlăm 4 kdriêk Čư̆ Jŭt, Dak Mil, Dak Song leh anăn Tuy Đức. Êlâo kơnăn, mơ̆ng thŭn 2018, kđông kahan knông lăn Tuy Đức (kdriêk Tuy Đức) jing anôk bruă tal êlâo mơ̆ng čar mkŏ mjing hdră anei. Giăm 7 thŭn êgao, anôk bruă ngă nanao hdră tŭ dưn anei. Thiếu tá Nguyễn Văn Nga, k’iăng khua bruă kđi čar kđông kahan knông lăn Tuy Đức brei thâo, hŏng hdră anei, anôk bruă hmăng hmưi đru kơ mnuih ƀuôn sang, hđeh sang hră krĭng knông lăn thâo klă hĭn kơ dŭm hdră bhiăn srăng ngă djŏ êjai êrô êbat ti alŭ wăl knông lăn, thâo klă hĭn kơ klei dưi, bruă klam mơ̆ng lĭng kahan knông lăn. Mbĭt anăn, ksul mbŭ, bi lar klei khăp kơ lăn čar kơ mnuih ƀuôn sang leh anăn hđeh sang hră krĭng knông lăn.

 “Ăt čiăng bi lar klei khăp krĭng knông lăn, klei dưi kiă kriê mơ̆ng lăn čar hŏng phung hđeh sang hră. Hmei hmăng hmưi lŏ čuê kơ dŭm gưl, phung hđeh sang hră leh anăn mnuih ƀuôn sang amâodjŏ knŏng krĭng knông lăn ƀiădah hlăm dŭm să hrăm mbĭt răng mgang knông lăn, gơ̆ng knông lăn.”

Dŭm mmông hriăm knông lăn klă klơ̆ng leh anăn bŏ hŏng tŭ dưn dôk dưi bi lar ti dŭm să krĭng knông lăn mơ̆ng čar Dak Nông. Hŏng dŭm mmông hriăm dưi đru kơ phung hđeh sang hră mâo thiăm klei hriăm klă sĭt, mbĭt anăn ksul mbŭ klei khăp kơ ƀuôn sang, lăn čar, mâo boh kdrŭt đru kơ phung hđeh gĭr hlăm klei hriăm hră mơar čiăng jing mnuih tŭ dưn. Hluê anăn, đru mkŏ mjing ai tiê răng mgang hlăm jih jang mnuih ƀuôn sang krĭng knông lăn ala čar.