VOV4.Êđê- Sui hŏng anei 55 thŭn (hruê 24/6/1967), Việt Nam lehanăn Campuchia klă klơ̆ng mkŏ mjing klei bi mjĕ lehanăn hruê anei nao mŭt leh hlăm hƀuê ênuk dua ala čar msĕ si sa hdră bruă yuôm bhăn, pŏk sa hdră mrâo hlăm klei bi mjĕ dua ala čar, siă suôr hŏng klei đĭ kyar mơ̆ng dua djuê ana riêng gah. Khădah găn lu thŭn mlan dleh dlan hlăm hƀuê ênuk lehanăn dŭm klei mrâo bluh mâo, klei bi mjĕ Việt Nam - Campuchia ăt dưi krơ̆ng kjăp, mâo phung khua kiă kriê lehanăn mnuih ƀuôn sang dua ala čar amâo mdei ksŭl mbŭ, jing ngăn drăp yuôm bhăn mơ̆ng dua djuê ana.

    55 thŭn jing sa wưng amâo mâo sui ôh hŏng hƀuê ênuk klei bi mguôp dua djuê ana, ƀiădah jing leh sa êwang yuôm bhăn êdi hlăm klei bi mguôp dua ala čar. Anăn jing wưng phung ƀuôn sang Việt Nam lehanăn phung ƀuôn sang Campuchia ayŏng adei mra ksĭng mra hlăm klei bi blah sua mă klei êngiê kơ djuê ana, lehanăn hrăm mbĭt rŭ mdơ̆ng lăn čar êđăp ênang, phung ƀuôn sang jăk yâo, trei mđao.

Klei bi mguôp hŏng ai tiê sĭt suôr, thâo bi đru hdơ̆ng găp mơ̆ng dua djuê ana drei klă klơ̆ng jing leh boh kdrŭt yuôm bhăn, kơ ai ktang čiăng kơ dua ala čar mdrăm mbĭt blah dưi hŏng phung măk ƀai Polpot, atăt lăn čar Campuchia lŏ kơrŭ wĭt, lehanăn klei hgŭm mbĭt dua ala čar mâo klei đĭ kyar ktang msĕ si hrue anei. Nai prĭn Kin Phea, k’iăng khua anôk bruă ksiêm duah klei kreh knhâo Campuchia lač:

 Klei bi hgŭm, ai tiê thâo bi mguôp, hgŭm bruă lehanăn bi đru mơ̆ng lĭng kahan Việt Nam hŏng Campuchia mâo nanao klei tŭ dưn hƀuê ênuk, lehanăn amâo mâo klei dưi thâo lăm ôh klei anăn. Klei Việt Nam đru hlăm djăp kdrăn mblah mâo dŏng brei leh ala čar Campuchia, đru mdlưh knŭk kna măk ƀai Polpot Khmer hrah, lehanăn lŏ wĭt rŭ mdơ̆ng lăn čar Campuchia.

Khua phŭn bruă hŏng tač êngao Việt Nam Bùi Thanh Sơn

Dŭm boh tŭ dưn Việt Nam lehanăn Campuchia mâo mbĭt hlăm dăl 55 thŭn êgao, amâo mâo djŏ knŏng jing klei dưi mơ̆ng klei bi blah sua mă klei êngiê kơ djuê ana, ƀiădah lŏ jing klei bi knăl kơ klei mđĭ kyar hlăm djăp mta bruă rŭ mdơ̆ng lăn čar. Hlăm êbeh 2 thŭn êgao mdrơ̆ng hŏng klei ruă tưp Covid 19, hmăi amâo mâo jăk prŏng êdi kơ klei đĭ kyar mơ̆ng grăp ala čar, ƀiădah klei bi mguôp Việt Nam lehanăn Campuchia ăt kăm mdei rei klei bi đru. Dua ala čar hrăm mbĭt mdrơ̆ng hŏng klei ruă tưp mâo leh klei tŭ dưn, bi đru hdơ̆ng găp hŏng djăp hdră êlan msĕ si mđĭ ai, đru mnơ̆ng mnuă, kdrăp mdrao mgŭn, prăk kăk, vaccine. Dua ala čar kreh hyuă kjăp hĭn klei hgŭm, bi hâo hưn hŏng klei pral lehanăn bi đru mbĭt mơh hlăm klei bi kƀĭn hŏng ala tač êngao lehanăn hlăm alŭ wăl, boh nik hlăm êpul hgŭm dŭm ala čar Ngŏ Dhŭng Asi ASEAN, hlăm Êpul hgŭm lu ala čar, lehanăn hlăm klei hgŭm krĭng hnoh krông Mekong.

Khua phŭn bruă lĭng kahan Campuhcia Tea Banh leh anăn Khua phŭn bruă lĭng kahan Việt Nam Phan Văn Giang mă rup hŏng phung hđeh sang hră Campuchia

Hŏng klei kriê pioh, lŏ ksul mbŭ mơ̆ng phung ƀuôn sang dua ala čar, klei hgŭm mbĭt Việt Nam – Campuchia ară anei hlăk mâo klei đĭ kyar jăk hluê hdră êlan “Riêng gah jăk yâo, hgŭm mbĭt mâo leh mơ̆ng đưm, hgŭm bruă kluôm ênŭm, kjăp nanao”. Khua bi ala knŭk kna Việt Nam ti Campuchia Nguyễn Huy Tăng lač:

Drei lŏ dơ̆ng mtrŭt hĭn klei hgŭm prŏng hlăm bruă kđi čar čiăng dưi tă êlan kluôm klei hgŭm dua nah, mđĭ hĭn bruă mjuăt bi hriăm jih jang phung ƀuôn sang dua ala čar, boh nik hŏng phung hđeh gưl mrâo kơ bruă klam, klei yuôm bhăn hlăm hdră êlan klei bi mguôp Việt Nam – Campuchia lehanăn klei yuôm bhăn djiê hdĭp mơ̆ng klei bi mguôp anei. Čiăng mơ̆ng anăn dưi bi kjăp, mđĭ hĭn klei đăo knang kơ bruă kđi čar, mjing atur knơ̆ng kơ yang ƀuôn kjăp, pioh kơ bruă mđĭ kyar, lehanăn mâo nanao klei bi mguôp kjăp kluôm ênŭm dua ala čar. Mbĭt hŏng anăn mđĭ hĭn klei hgŭm răng mgang klei êđăp ênang, hgŭm bruă lĭng kahan, lehanăn bruă hŏng ala tač êngao. Anei jing dŭm kmeh gơ̆ng hlăm kle ibi mguôp dua nah, đru păn kjăp kơ alŭ wăl mđĭ kyar dua ala čar. Lehanăn jing yuôm bhăn hĭn anăn jing mâo klei hgŭm duh mkra, mjing boh mdrŭt mrâo, mjing djăp ai ktang rơ̆ng kjăp kơ klei đĭ kyar klei bi mguôp Việt Nam – Campuchia.

Khua dlăng bruă Đảng Nguyễn Phú Trọng leh anăn Ala mrtao Campuchia Norodom Sihamoni

Hrue 24/6/1967, jing leh klei kruak knăl yuôm bhăn hlăm hƀuê ênuk klei bi mguôp, hgŭm mbĭt mâo leh mơ̆ng đưm sĭt suôr êdi plah wah phung ƀuôn sang dua ala čar Việt Nam lehanăn Campuchia hlăm 55 thŭn êgao mâo ba wĭt leh lu boh tŭ dưn jăk siam mơ̆ng grăp ala čar mjing leh knơ̆ng, atur kjăp čiăng kơ dua ala čar lŏ dưn yua hlăm wưng ară anei, lehanăn kơ êdei anăp. Klei bi mguôp dua ala čar knư̆ hrue knư̆ dơ̆ng tă êlan klă mngač lehanăn kjăp hĭn hlăm klei bi hgŭm lehanăn ngă bruă mbĭt, lehanăn hlăk mâo phung khua kiă kriê dua ala čar kriê pioh lehanăn mđĭ lar, mâo leh hđeh gưl mrâo dua ala čar thâo săng klă mngač, lŏ dơ̆ng bi kjăp klei hgŭm mbĭt. Sum So Phonl, hđeh hriăm gưl prŏng sang hră Gưl prŏng Prea Say Ha Mu Ni Ria, lač:

Kâo mơak snăk lehanăn bŏ hŏng klei myưng m’ang kyuadah lăn čar kâo dưi mâo klei bi mguôp kjăp hŏng Việt Nam. Klei thâo bi hgŭm anei đru leh kơ dua ala čar mâo klei êđăp ênang, hơĭt kjăp lehanăn đĭ kyar. Dŭm ala čar riêng gah brei thâo bi jưh knang hdơ̆ng găp snăn kơh dưi đĭ kyar kjăp. Phung hđeh mda asei msĕ hŏng hmei bi mâo bruă klam kriê pioh klei bi mguôp yuôm bhăn anei.

Bi mnăm mbĭt sa hnoh êa krông Mekong, Việ Nam lehanăn Campuchia mâo sa yun mbĭt. Dŭm boh yuôm bhăn leh mâo ti grăp ala čar, klei bi hgŭm mtrŭn leh agha êlam, lehanăn mâo klei tŭ jing hlăm dăl 55 thŭn êgao jing leh sa klei mta yuôm bhăn, lehanăn klă mngač hĭn, djŏ hĭn hlăm klei hgŭm mbĭt, hgŭm bruă Việt Nam – Campuchia./.

Pô mblang: Y-Khem Niê