Hdruôm hră anei mơ̆ng Khua gĭt gai Đảng Nguyễn Phú Trọng mâo 600 pŏk mơar, 111 rup bi hmô. Hlăm klei čih kra, kđăm mkra ngă leh lu mta bruă klă klơ̆ng, hŏng lu klei čuăn ktang phĭt, kluôm ênŭm, kreh knhâo čiăng kơ hdruôm hră anei mâo ênŭm klei čuăn hnơ̆ng tŭ jăk, mta phŭn leh anăn rơ̆ng djŏ hruê mmông. Nguyễn Túc, Khua hlăm Dhar bruă mặt trận čar kwar Việt Nam lač, hdruôm hră anei mkŏ mjing leh knhuang prŏng kơ klei mĭn jih jang mnuih ƀuôn sang. Mơ̆ng anăn, hluê ngă bruă gang mkhư̆ klei ƀơ̆ng ngăn, klei amâo mâo jăk hlăm wưng mrâo, ti anôk anăn jih jang mnuih ƀuôn sang nao hgŭm dưi lač jing mta kñăm “Amâo mâo dưi”, “Amâo jhŏng”, “Amâo mâo čiăng” klei ƀơ̆ng ngăn. Nguyễn Túc brei thâo:

“Klei ƀơ̆ng ngăn ngă kơ mnuih ƀuôn sang drei čôn ăl êdi, msĕ si Khua gĭt gai Đảng lač, gang mkhư̆ klei ƀơ̆ng ngăn jing leh hdră bruă amâodưi bi mklăk êjai jih jang mnuih ƀuôn sang nao hgŭm. Kyuanăn, bruă čih mkra hdruôm hră anei jing sa wưng čiăng mđĭ hĭn klei thâo săng mơ̆ng Đảng, jih jang mnuih ƀuôn sang, lĭng kahan kơ bruă bi kdơ̆ng hŏng phung roh hlăm lam, boh hră ktang phĭt leh anăn gĭr ktưn ngă kơ kâo thâo săng hĭn”.

Mrâo anei, bruă Đảng dŭm anôk bruă gưl dlông mkŏ mjing klei bi kƀĭn ksiêm duah, tui hriăm bi kjăp, lehanăn mâo klei hâo hưn kơ hdruôm hră: “Khut khat gĭr bi kdơ̆ng ktang phĭt hŏng klei ƀơ̆ng ngăn, klei amâo mâo djŏ, đru bi rŭ mdơ̆ng Đảng lehanăn knŭk kna knư̆ hrue knư̆ doh mngač kjăp ktang” mơ̆ng khua gĭ gai Đảng Nguyễn Phú Trọng. Blŭ hrăm ti anôk bi kƀĭn khua kiă kriê bruă Đảng êpul dŭm anôk bruă gưl dlông Nguyễn Văn Thể mtă, leh klei bi kƀĭn anei, dŭm gưl bruă Đảng mkŏ mjing bi kjăp jih jang bruă kđi čar djŏ hŏng hdruôm hră mơ̆ng khua gĭt gai Đảng Nguyễn Phú Trọng ti dŭm anôk bruă êpul êya pô. Mơ̆ng anăn mâo klei hlăm bruă ƀư̆ mkra Đảng, bi kdơ̆ng hŏng klei ƀơ̆ng ngăn, klei amâo mâo djŏ ti dŭm anôk bruă êpul êya hlăm wưng kơ anăp:

  Nguyễn Văn Thể: “Hlăm kluôm bruă Đảng dŭm anôk bruă bi tui hriăm sĭt êmĭt kơ hdruôm hră mơ̆ng khua gĭt gai Đảng čih. Mơ̆ng anăn, grăp čô knuă druh đảng viên brei ngă djŏ hŏng klei blŭ. Anei jing bruă amâo mâo dưi mdei ôh, kyuanăn grăp čô đảng viên, mnuih ngă bruă hlăm kluôm êpulbruă Đảng lŏ dơ̆ng păn kjăp, tui hriăm hlue ngă djŏ hŏng hdruôm hră mơ̆ng khua gĭt gai Đảng čih, ba yua hlăm klei hdĭp lehanăn đru mkŏ mjing Đảng, mkŏ mjing knŭk kna knư̆ hrue knư̆ doh mngač kjăp ktang”./.