VOV4.Êđê- Êpul hgŭm bruă hđeh êdam êra gưl dlông leh anăn Êpul hgŭm phung nai êa drao mda asei gưl dlông Việt Nam mrâo mkŏ mjing Knăm trŭn kơ bruă Nai êa drao mda asei hluê ngă asăp Awa Hồ, čŏng ngă bruă kyua klei suaih pral yang ƀuôn thŭn 2022 hŏng akŏ “Kriê dlăng klei suaih pral êdei klei ruă tưp Covid-19”. Hruê mmông êgao, ti dŭm alŭ wăl hlăm kluôm ala ăt mâo leh lu hdră čŏng ngă bruă kyua klei suaih pral yang ƀuôn.

Ktuê êlan phung aê mdrao mda asei hluê ngă Asăp Awa, ba anăp kyua klei suaih pral êpul êya mkŏ mjing mơ̆ng hruê 14/5 truh kơ jih thŭn anei, mđing dlăng kriê klei suaih pral kơ mnuih ƀuôn sang leh djŏ Covid 19, hŏng mta kñăm 20 êbâo čô nai aê mdrao mda asei nao hgŭm hlăm hdră mkă dlăng, đru kčĕ klei suaih pral leh djŏ Covid 19 kơ êbeh 1 êklăk čô mnuih; êbeh 3 êklăk čô dưi mkă dlăng kluôm lehanăn dưi đru kčĕ online; 100.000 čô dưi đru kčĕ, mkă dlăng klă anăp.

Hdră anei ăt mtrŭt mjhar mnuih hgŭm, phung êdam êra ba myơr 50 êbâo ênoh êrah doh, mđĭ ai 1 êklăk čô mnuih hgŭm mjuăt bi hriăm klei suaih pral hluê gru mngač Awa; mjuăt bi hriăm, mprăp klei thâo kơ 100 êbâo čô ba anăp đru kčĕ kơ mnơ̆ng ƀơ̆ng tŭ jăk lehanăn klei thâo gang mkhư̆ klei ruă tưp. Jih jang mnuih ƀuôn sang djŏ Covid 19 dưi mkăp hră hâo hưn kơ hdră dlăng kriê klei suaih pral leh djŏ Covid 19. Khua êpul hgŭm phung aê mdrao mda asei Việt Nam Hà Anh Đức brei thâo:

“Ktuê êlan phung aê mdrao mda asei hluê ngă asăp Awa – kyua klei suaih pral êpul êya. Thŭn anei, hmei čiăng lŏ mđing hĭn, anăn jing mđing kơ mnuih ruă Covid 19, ăt msĕ mơh mđing truh kơ Klei bi kƀĭn prŏng bruă êdam êra kluôm ala. Gưl tal êlâo ba yua kdrăp mrâo êngao kơ bruă mkă dlăng klă anăp, drei dưi yua kdrăp hotline srăng đru bi tai wưng mnuih ƀuôn sang akâo đru kčĕ, mbĭt anăn drei ăt dưi đru kčĕ hluê đĭng blŭ, teleheath, čiăng kčĕ klă anăp kơ mnuih ƀuôn sang”.

Khua Dhar bruă duh mkra gưl dlông Trần Tuấn Anh blŭ hrăm hlăm klei bi kƀĭn

 Nao hlăm knăm mtrŭt mjhar gưl dlông ti čar Thừa Thiên Huế, Khua anôk bruă duh mkra gưl dlông Trần Tuấn Anh tĭng dlăng “Ktuê êlan phung aê mdrao mda asei hluê ngă asăp Awa, ba anăp kyua klei suaih pral êpul êya” thŭn anei, mbĭt anăn mñă klă: Hlăm wưng êdei kơ Covid 19, čiăng mâo lu klei gĭr hĭn čiăng kơ klei hdĭp mnuih ƀuôn sang dôk hlăm boh klei “aguah tlam mrâo” čiăng mâo klei suaih pral hlăm asei mlei wăt ai tiê klei mĭn, hlăm anăn mâo êpul mnuih mă bruă dưi rơ̆ng kjăp, mjing wăl anôk, tur knơ̆ng kơ hdră duh mkra blei mnia lehanăn hdră bruă yang ƀuôn mơ̆ng ala čar dưi h’ĭt kjăp lehanăn lŏ dơ̆ng đĭ kyar. Trần Tuấn Anh mñă:

“Kâo đăo knang hŏng ai tiê klei mĭn mrâo, ba anăp, gĭr hgao klei dleh dlan, ktuê êlan phung aê mdrao mda asei hluê ngă Asăp Awa thŭn 2022 srăng mâo dŭm boh tŭ dưn, hŏng dŭm êklăk čô mnuih dưi ksiêm mkă dlăng, đru kčĕ, lŏ krŭ wĭt klei suaih pral leh djŏ Covid 19. Kâo m’ak êdi hŏng dŭm mta kñăm, hdră êlan mđing truh kơ mnuih ƀuôn sang. Klei anei bi êdah bruă klam mnuih ƀuôn sang jing pô phŭn hlăm anôk bruă kđi čar hlăm dŭm hdră mtrŭn lehanăn hlăm hdră ngă bruă mơ̆ng Êpul êdam êra”.

Ti knăm trŭn kơ bruă, êbeh 1.200 čô ruă Covid 19 mâo klei lŏ mkă dlăng, bi mklă, ktrâo lač kơ hdră dlăng kriê klei suaih pral hluê kdrăp Vinbrain. Ƀri gưl anei, Anôk bruă êdam êra gưl dlông ăt mđup brei 40 hnư mnơ̆ng kơ gŏ sang knŭk kna dlăng ba lehanăn phung hđeh mâo klei hdĭp dleh dlan, nao čuă mtrŭt mđĭ ai phung aê mdrao ti Sang êa drao gưl dlông Huế lehanăn mnuih ruă nao ksiêm dlăng leh djŏ Covid 19…

Êpul hgŭm phung aê mdrao mda asei Việt Nam đru hlăm hdră

Hlăm wưng êgao, ti dŭm čar, ƀuôn prŏng hlăm kluôm ala ăt mkŏ mjing knăm trŭn kơ bruă Ktuê êlan phung aê mdrao mda asei hluê ngă asăp Awa. Dŭm alŭ wăl mkŏ mjing leh hdră mkă dlăng leh djŏ Covid 19, mbha êa drao amâo mmă prăk lehanăn mđup brei mnơ̆ng kơ 50 êbâo čô mnuih ƀuôn sang lehanăn phung hđeh mâo klei hdĭp dleh dlan hlăm kluôm ala, mbĭt anăn đru kčĕ, ktrâo lač kơ hdră kriê dlăng klei suaih pral kơ êbeh 100 êbâo čô. Nai prĭn – Aê mdrao Nguyễn Tiến Quang, Khua êpul hgŭm kriê dlăng Sang êa drao K (Hà Nội) bi mklă:

“Ti sang êa drao K ăt mâo phung aê mdrao mda asei hgŭm hlăm Êpul phung aê mdrao mda asei Việt Nam. Hluê anăn, êngao bruă ksiêm mkă dlăng grăp hruê kơ bruă pô, phung aê mdrao anei lŏ nao hgŭm hlăm bruă ksiêm mkă dlăng klei ruă kơ êpul êya. Êpul mtrŭt mjhar, hmưi srăng mjing klei găl, mkăp êpul nao hlăm hdră anei.

        Êlâo anăn, hlăm wưng bluh mâo klei ruă Covid 19 dleh dưi ksiêm dlăng, ktuê êlan phung aê mdrao mda asei hluê ngă asăp Awa, ba anăp kyua klei suaih pral êpul êya ăt dưi mkŏ mjing djŏ guôp hŏng hdră gang mkhư̆ klei ruă ti alŭ wăl, mguôp hŏng bruă dlăng kriê klei suaih pral mơ̆ng kbưi ba yua hdră telehealth lehanăn ksiêm mkă dlăng ti êpul êya dŭm anôk bruă. Mbĭt anăn, êpul hgŭm iêu mtrŭt êbeh 130 êklai prăk mnơ̆ng dhơ̆ng đru kơ êpul ba anăp gang mkhư̆ klei ruă, êdah êdi jing gru hmô container mkăp oxy, container ksiêm dlăng kman mbĕ hiu lehanăn ksiêm dlăng klei ruă. Hdră anei mâo leh giăm 20 êbâo čô ba anăp hlăm kluôm ala kñăm mkă dlăng, đru kčĕ lehanăn kčĕ ba nao dŏng mdrao gưl dlông kơ giăm 4 êklăk čô. Hdruôm kriê dlăng klei suaih pral leh djŏ COVID-19 mơ̆ng Êpul mâo leh êbeh 10 êklăk gưl ksiêm dlăng./.      

                                          Pô mblang: H’Nêč Êñuôl