VOV4.Êđê - Đảng drei mkŏ mjing hlăm yan mnga, yan mnga mơ̆ng lăn čar lehanăn djuê ana bŏ hŏng ai êwa hơ̆k m’ak lehanăn klei čang hmăng. 92 yan mnga mâo Đảng - k’hưm mơ̆ng ala čar ƀrư̆ hruê dưi bi mklă amâo djŏ knŏng ti krĭng wăl ƀiădah hlăm tar rŏng lăn. Ƀri bi hdơr 92 thŭn hruê mkŏ mjing Đảng jing sa hruê hƀuê ênuk nao mŭt leh hlăm ai tiê mơ̆ng dŭm êklăk čô mnuih Việt Nam grăp blư̆ truh yan mnga.

Hƀuê ênuk 92 thŭn hrăm mbĭt hŏng djuê ana, Đảng Cộng sản Việt Nam msĕ sim tŭ tŭr mtrang mngač atăt êlan, ba lăn čar Việt Nam drei mâo mơ̆ng klei tŭ jing anei truh kơ klei tŭ jing mkăn. Boh tŭ, klei đru mguôp anăn bi guh mngač leh dŭm gru kruăk hƀuê ênuk mâo čih pioh, hlăm dŭm klei bi mlih hlăm grăp hruê mơ̆ng lăn čar, grăp gŏ sang, grăp ƀuôn sang jĕ giăm taih kbưi.

Să Nâm Nung, kdriêk Krông Knô, čar Dak Nông jing anôk phŭn klei kgŭ krŭ kdơ̆ng wưng klei mblah Prăng leh anăn mblah Mi sua wĭt klei êngiê kơ ala čar. Bi lar knhuah gru jhŏng ktang, Bruă Đảng nah gŭ, bruă sang čư êa leh anăn mnuih ƀuôn sang ti să Nâm Nung mâo nanao klei gĭr ktưn găn jih klei dleh dlan, gĭr mkŏ mjing ƀuôn sang ƀrư̆ hruê ƀrư̆ đĭ kyar. Hlăm să mâo êbeh 1.900 gŏ sang, hŏng hlăm brô 8000 čô mnuih ƀuôn sang, hlăm anăn mâo hlăm ƀrô 2000 čô jing mnuih M’Nông. Mâo klei uêñ mĭn mơ̆ng Đảng leh anăn knŭk kna, klei hdĭp mnuih ƀuôn sang ti nei amâo mdei ôh klei đĭ kyar, ênoh prăk ba wĭt kah knar grăp čô hlăm brô 40 êklăk prăk. Y-Sram ti ƀuôn R’Câp, să Nâm Nung brei thâo: “Lač jăk êdi kơ Đảng, knŭk kna mkŏ mjing leh klei găl đru kơ mnuih ƀuôn sang M’Nông leh anăn wăt kơ jih jang. Ară anei, êlan klông, sang hră, anôk mdrao mgŭn mâo ênŭm leh. Jih jang anak aneh dưi nao sang hră mơar, dŭm gŏ sang mâo anak čô truh thŭn dưi nao truh sang hră. Êlâo dih ka mâo sang hră mơar jing dleh dlan êdi, boh nik hlăm ênuk bi blah, anei jing ƀuôn phŭn bruă krŭ kdơ̆ng, mnuih ƀuôn sang ƀun knap êdi. Ƀiădah ară anei mâo leh lu klei mlih, klei hdĭp mnuih ƀuôn sang đĭ kyar, amâo lŏ msĕ hŏng êlâo ôh.

Čar Dak Lak ară anei mâo 4 klei đăo prŏng, anăn jing Đăo Khop, Klei đăo Mrâo Mrang Jăk, Đăo Yơng lehanăn đăo Cao đài, hŏng êbeh 600.000 čô đăo, truh 32% ênoh mnuih. Hlăm dŭm thŭn êgao, hŏng klei kiă kriê mơ̆ng Đảng, mmuih ƀuôn sang hluê đăo sĭt êmĭt mđĭ kyar bruă duh mkra, mkŏ mkra ƀuôn sang, hdĭp jăk đăo djŏ. Khua pô mtô Y - Ky Êban (Aê Sadrăk), Kiă kriê Sang Aê Diê Êa Tul, să Êa Tul, kdriêk Čư̆ Mgar, čar Dak Lak brei thâo: Klei đăo knang mơ̆ng mnuih ƀuôn sang prŏng snăk, đăo kjăp, hluê nao djŏ hdră, djŏ êlan, đăo knang hlăm klei kiă kriê mơ̆ng Đảng. Klei bi kƀĭn kluôm ala tal 13 mơ̆ng Đảng mkŏ mjing jăk siam hlăm thŭn êgao ăt jing klei bi êdah jăk kơ klei đăo knang lehanăn klei čang hmăng mơ̆ng grăp čô mnuih ƀuôn sang kơ dŭm klei bi mklă djŏ kpă, ba lăn čar drei đĭ kyar hlăm djăp mta bruă. Ăt hluê si Khua pô mtô Aê Sa Drăk, hlăm hdră mdrơ̆ng hŏng klei ruă Covid 19, bruă klam kiă kriê mơ̆ng Đảng dưi lŏ bi êdah ti klei gĭr ktưn čiăng dưi tlŏ ênŭm vaccine kơ jih jang mnuih ƀuôn sang.Hlăm dŭm thŭn êgao, Đảng lehanăn Knŭk kna mđing dlăng, mjing klei găl čiăng kơ mnuih ƀuôn sang dưi tlŏ ênŭm vaccine, gang mkhư̆ klei ruă tưp. Čang hmăng hlăm thŭn mrâo amâo lŏ dôk klei ruă ôh, klei ư̆ êpa jih mơh lehanăn dŭm klei truh amâo jăk jih mơh, grăp čô bi sa ai mđĭ kyar bruă duh mkra, mđĭ klei bi hgŭm mguôp jih jang djuê ana Việt Nam msĕ si sa ayŏng adei sa tian prôč./.

Đảng viên Lơ Mu Ha Dzô, ti alŭ 6, să Dă Sar, kdriêk Lạc Dương mñă klă, kyua klei uêñ mĭn mơ̆ng Đảng, knŭk kna, bruă sang čư êa alŭ wăl, klei ruă tưp Covid-19 hmar dưi ksiêm dlăng, ala čar mlih jing wưng aguah tlam mrâo, mkŏ mjing klei đăo knang hlăm ai tiê mnuih ƀuôn sang “Đảng leh anăn knŭk kna mâo lu klei uêñ mĭn kơ mnuih ƀuôn sang, duh bi liê djăp mta bruă hlăm klei hdĭp mnuih ƀuôn sang, kyuanăn klei hdĭp dưi đĭ kyar hĭn mkă hŏng êlâo dih. Êjai klei ruă tưp Covid-19 bluh đĭ, dŭm gưl bruă sang čư êa hmao ngă bruă hâo hưn leh anăn mtô mjuăt kơ mnuih ƀuôn sang mđĭ hĭn klei thâo săng, hur har tui ngă dŭm hdră êlan gang mkhư̆ klei ruă tưp Covid-19 leh anăn dưi ba wĭt boh tŭ dưn. Ară anei ƀuôn sang ăt dôk jing anôk mtah, anôk êđăp ênang, klei hdĭp mda mơ̆ng mnuih ƀuôn sang mâo klei hơĭt leh anăn đĭ kyar kyua kphê mâo ênoh. Thŭn mrâo ăt mâo lu klei hơ̆k mơak, h’uh mđao.

Ksor Jar, K’iăng khua bruă Đảng ƀuôn Châm Prông, să Ia Băng, kdriêk Đăk Đoa, čar Gia Lai bi mklă: Thŭn 2021 mrâo êgao, klei ruă Covid 19 ngă bi mlih djăp mta klei hlăm klei hdĭp mnuih ƀuôn sang. Hŏng klei đua klam ba akŏ mơ̆ng sa čô Đảng viên, Ksor Jar kreh nao mtô mblang kơ mnuih ƀuôn sang thâo săng lehanăn đăo knang hlăm hdră êlan gang mkhư̆ klei ruă tưp mơ̆ng Đảng lehanăn Knŭk kna hluê grăp wưng: “Thŭn 2021 mrâo êgao, Đảng lehanăn Knŭk kna drei gĭt gai kjăp hluê bruă čuăl krĭng, gang mkhư̆ klei ruă. Truh mlan 9/2021, mnuih ƀuôn sang hmei dưi tlŏ 2 aruăt vaccine, Đảng lehanăn Knŭk kna lŏ bi mlih jing hdră êlan hdĭp mbĭt, hdĭp djŏ guôp, ksiêm dlăng tŭ dưn klei ruă tưp. Klei anei đru kơ hmei ƀuh êđăp ênang hĭn, dưi mđĭ kyar bruă duh mkra gŏ sang. Ară anei, jing đảng viên, kâo kreh mtrŭt mjhar mnuih ƀuôn sang hluê ngă kjăp 5 Asăp mtă lehanăn đăo knang kjăp hlăm klei kiă kriê mơ̆ng Đảng, Knŭk kna.

Hlăm bruă mkŏ mkra krĭng ƀuôn sang mâo, hdră mơ̆ng Đảng, ai tiê mnuih ƀuôn sang dưi bi êdah klă mngač. Mnuih ƀuôn sang djăp krĭng kwar mprăp ai tiê myơr lăn, đru mguôp hruê ai ngă êlan, rŭ mdơ̆ng sang hră mơar, dŭm anôk bruă hlăm ƀuôn sang. Anăn jing klei gĭr ktưn, klei mĭn bi êdah klei đăo knang hŏng Đảng, bruă sang čư êa alŭ wăl. Điểu Khuyên, khua ƀuôn Bu Bir, să Quảng Tín, kdriêk Dăk Rlâp, čar Dak Nông bi êdah klei hơ̆k mơak krĭng ƀuôn sang mrâo pô: “Mơ̆ng hruê mâo êlan jăk, mnuih ƀuôn sang lač jăk kơ Đảng, bruă sang čư êa mkŏ mjing leh klei găl kơ mnuih ƀuôn sang êrô êbat jăk găl. Mơ̆ng anăn, bruă êrô êbat leh anăn mdiăng hbâo pruê, boh mnga bruă lŏ hma mơ̆ng hma wĭt kơ sang mâo klei găl hĭn. Anăn jing mâo hdră 135 ngă êbeh 400 met êlan leh mnuih ƀuôn sang đru mguôp mkra jih jang êlan hlăm ƀuôn giăm 1km. mâo 20 gŏ sang nao hgŭm mbĭt hŏng knŭk kna. Êlan anei ăt mâo dŭm gŏ sang myơr lăn, koh ana kñul, ana kphê čiăng mkra êlan klông mrâo čiăng nao mă bruă, mnuih ƀuôn sang ăt mâo klei găl mâo êlan pioh mđĭ kyar bruă duh mkra.

Đăo knang hlăm klei gĭt gai mơ̆ng Đảng, klei hdĭp mlih mrâo ti krĭng lăn dap kngư kbiă hriê mơ̆ng klei gĭr, klei čang hmăng kpưn đĭ mơ̆ng grăp čô mnuih, grăp čô đảng viên:

Ti Kon Tum, dŭm thŭn êgao, mâo amâo djŏ ƀiă ôh mnuih ƀuôn sang djuê ƀiă đĭ mdrŏng kbiă hriê mơ̆ng bruă pla ana mkra mjing êa drao. A Chung ti ƀuôn Đăk Dơn, să Măng Ri, kdriêk Tu Mơ Rông, čar Kon Tum jing sa klei bi êdah. Hŏng hlăm brô 5 êbâo phŭn sâm Ngọc Linh, ênoh čhĭ mơ̆ng 120 truh 260 êklăk prăk/kg mtah wăt hla msĕ si ară anei, A Chung kpưn đĭ jing leh pô mdrơ̆ng prăk êklai mơ̆ng ana sâm Ngọc Linh. Ñu brei thâo, gŏ sang ñu mâo mnơ̆ng ƀơ̆ng mnơ̆ng pioh, êbeh 100 gŏ êsei mkăn ti ƀuôn Đăk Dơn ăt mâo klei hdĭp đĭ kyar. Hdĭp ti krĭng lăn phŭn klei krŭ kdơ̆ng, mâo klei hdĭp trei mđao yâo m’ak hlăm thŭn mrâo, A Chung mgei ai tiê, Đảng ba wĭt leh kơ mnuih ƀuôn sang dŭm yan mnga trei mđao. “Kyua mâo Đảng, Knŭk kna mđing dlăng truh kơ mnuih ƀuôn sang kyua anăn păt čiăng jih mnuih ƀuôn sang tinei dưi pla Sâm Ngọc Linh čiăng mđĭ kyar bruă duh mkra. Đảng, Knŭk kna lŏ mđing dlăng đru kơ mnuih ƀuôn sang klei kơ pui kmlă, êlan klông găn êrô, lu gŏ sang gĭr ktưn kpưn đĭ kơ mdrŏng, lu mnuih mâo đĭng blŭ ênuk mrâo, sang sang mâo wifi, tivi ênuk mrâo čiăng hmư̆ klei mrâo hlăm ala čar lehanăn tar rŏng lăn. Mnuih ƀuôn sang ƀuôn Đăk Dơn hơ̆k kdơ̆k đăo knang hlăm klei kiă kriê mơ̆ng Đảng, Knŭk kna. Thŭn mrâo, bruă knŭk kna mđing dlăng, đru kơ gŏ sang ƀun, gŏ sang dleh dlan ti să Măng Ri anei.

Jing sa čô Đảng viên mda asei, ayŏng Đinh Văn Phới, knuă druh adŭ bruă mnuih djuê ƀiă ti kdriêk Đăk Pơ, čar Gia Lai mâo klei mơak sơnăk êjai dôk ti gŭ hlă čhiăm gru Đảng leh anăn răk klei ƀuăn rơ̆ng 4 thŭn êlâo dih. Mbĭt anăn, Đinh Văn Phới ăt ƀuh pô srăng mâo bruă klam, đru mguôp lu hĭn hlăm dŭm bruă bi hơĭt klei hdĭp yang ƀuôn, čŏng nao đru bruă hlăm krĭng taih kbưi. Kyua mâo dŭm hdră êlan mơ̆ng Đảng leh knŭk kna, klei hdĭp mnuih ƀuôn sang ƀrư̆ hruê ƀrư̆ trei mđao, klei hdĭp mda mâo klei đĭ kyar, đru hlăm klei đĭ kyar hlăm yang ƀuôn. Đảng viên Đinh Văn phới lač: “Mnuih ƀuôn sang pô ti nei ngă jăk hdră êlan mơ̆ng Đảng leh anăn knŭk kna, gĭr ktưn čoh bruă ngă hma, mđĭ klei hdĭp mda. Jing sa čô đảng viên mda asei, hruê mmông êgao, dôk ngă leh anăn dôk gĭr hâo hưn, mtrŭt mjhar mnuih ƀuôn sang hluê ngă jăk hdră mtrŭn mơ̆ng Đảng, klei bhiăn knŭk kna, mtrŭt mjhar mnuih ƀuôn sang ngă jăk bruă gang mkhư̆ klei ruă tưp Covid-19 leh anăn mnuih ƀuôn sang hluê ngă jăk êdi.”

Hgao dŭm klei dleh dlan mơ̆ng thŭn 2021 kyua klei ruă Covid 19 ngă, ayŏng Myet – mnuih ƀuôn sang ƀuôn Tiêng, să Tân Sơn, ƀuôn prŏng Pleiku, čar Gia Lai mprăp mŭt hlăm wưng mrâo, kñăm hdĭp êđăp ênang, gang mkhư̆ klei ruă tưp lehanăn mđĭ kyar bruă duh mkra, ala ƀuôn. Ayŏng Myet mñă klă, hlăm thŭn 2022, ayŏng lehanăn mnuih ƀuôn sang hlăm ƀuôn srăng hluê ngă kjăp klei mtă mơ̆ng anôk bruă mdrao mgŭn, rơ̆ng klei suaih pral lehanăn mđĭ kyar bruă duh mkra gŏ sang: “Hmei čang hmăng gŏ sang đĭ kyar bruă duh mkra hĭn čiăng ba wĭt klei yâo m’ak hlăm klei hdĭp. Thŭn 2021 klei ruă Covid 19 bluh mâo ngă kơ ƀuôn sang huĭ hyưt, tuôm hŏng lu klei dleh dlan. Čang hmăng mơ̆ng anei kơ anăp srăng mâo klei bi mlih hĭn. Brei drei gĭr mă bruă. Hrăm mbĭt hluê ngă bruă djŏ si klei gĭt gai mơ̆ng gưl dlông, čiăng kơ klei hdĭp jăk siam hĭn. H’êč hmưi kơ thŭn mrâo mnuih ƀuôn sang drei mă bruă đĭ kyar, bruă duh mkra đĭ kyar mơh, thâo răng mgang pô, čiăng thŭn mrâo anei klei ruă dưi msưh kdŭn, ƀuôn sang lŏ wĭt hŏng klei hdĭp yâo m’ak msĕ êlâo.

Ti ƀuôn Jut 2, să Ia Dêr, kdriêk Ia Grai hŏng êbeh 165 gŏ sang mnuih Jrai, leh dŭm klei dleh dlăn mơ̆ng thŭn 2021 kyua klei ruă tưp, mnuih ƀuôn sang dôk tĭng mkă čiăng ngă dŭm hdră êlan mrâo. Ayŏng Rơ Čom Ngưu, sa čô ti ƀuôn Jut brei thâo, hlăm thŭn 2021, klei ruă tưp Covid-19 ngă kơ lu phung nao mă bruă kbưi wĭt kơ ƀuôn sang pô, klei hdĭp grăp čô mâo klei hmăi amâo jăk. Ayŏng Ngưu hmăng hmưi hlăm thŭn 2022, klei ruă tưp dưi ksiêm dlăng čiăng dưi ngă bruă knuă leh anăn klei hdĭp mnuih ƀuôn sang lŏ wĭt msĕ yăng đar:Hmăng hmưi hlăm thŭn 2022 ti anăp, hluê si asăp mtrŭn mrâo hdĭp êđăp ênang hŏng klei ruă tưp, mnuih ƀuôn sang čiăng mâo klei bi mguôp hlăm klei ngă bruă knuă, mkŏ mjing klei bi hmô êpul bi mguôp, bi mguôp mkra mjing hlăm sa hdră, kdrăn lŏ ênhă prŏng, bi mguôp hŏng dŭm knơ̆ng bruă, êpul bi mguôp čiăng ba čhĭ mnơ̆ng dhơ̆ng, mâo anôk ba čhĭ hơĭt, mkŏ mjing anăn knăl, mâo mnơ̆ng dhơ̆ng doh hluê si hdră OCOP, leh anăn ba mnơ̆ng dhơ̆ng hlăm anôk mnia mblei điện tử, mơ̆ng anăn đru mđĭ ênoh mnơ̆ng dhơ̆ng boh mnga bruă lŏ hma Việt Nam. Mbĭt hŏng anăn, srăng lŏ mâo lu klei brei čan mnga hdjul kơ mnuih ƀuôn sang duh bi liê klei ngă bruă. Hlăm thŭn kơ anăp, hmăng hmưi Đảng, knŭk kna srăng mâo hdră đru kơ klei hdĭp, bruă mă leh anăn klei hriăm hră mơar hlăm wưng hdĭp êđăp ênang hŏng klei ruă tưp. Ƀiădah mnuih ƀuôn sang ăt čiăng mâo klei hur har hriăm hră mơar, mă bruă knuă čiăng đru bi mđĭ kyar bruă duh mkra ala ƀuôn.