VOV4.Êđê - Mrâo anei, mă bruă hŏng phung khua kiă kriê čar Khánh Hòa, Khua knŭk kna Phạm Minh Chính lač klă: Mkŏ mkra kdriêk plao ksĭ Trường Sa jing wăl krah phŭn kơ hdră duh mkra, dhar kreh, ala ƀuôn ti krĭng êa ksĭ mơ̆ng kluôm ala, jing krĭng răng mgang kjăp, đru mguôp hlăm bruă răng mgang klei dưi kiă kriê kluôm ênŭm krĭng êa ksĭ, plao ksĭ yuôm bhăn mơ̆ng lăn čar. Dŭm thŭn êgao, mâo klei mđing dlăng mơ̆ng Đảng, Knŭk kna lehanăn lĭng kahan, dŭm hdră bruă mkăp kơ klei hdĭp yang ƀuôn lehanăn mă bruă ti plao ksĭ Trường Sa dưi duh bi liê, hlăm anăn mâo kdrăp pil êran hŏng boh mngač yang hruê lehanăn êran hŏng ai angĭn.

Thiếu tá Nguyễn Văn Chiến, klam hlăm bruă pui kmlă ti plao ksĭ Trường Sa Đông brei thâo, mâo klei Đảng, lehanăn knŭk kna mđing uêñ, klei hdĭp mda phung knuă druh, lĭng kahan, lehanăn phung ƀuôn sang hlăm kdriêk plao ksĭ Trường Sa, čar khánh Hoà hlăk ƀrư̆ hrue mâo mđĭ hĭn. Dưi lač, Trường Sa jing kdriêk tal êlâo hlăm kluôm ala mâo pui kmlă mtrang mngač hŏng pil yang hrue. Kyua mâo leh pui kmlă hơĭt, snăn jih jang bruă jing hơĭt jăk hĭn kơ êlâo. Thiếu tá Nguyễn Văn Chiến lač:  "Kâo mâo leh 8 blư̆ dôk ƀơ̆ng tết hlăm plao ksĭ anei, bi pui kmlă bi êran hŏng môtơr bi êran pui, ka mâo ôh pil yang hrue, kyuanăn djăp mta bruă čiăng mkŏ mjing klei hlăp mbul, dhar kreh kưt mmuiñ kăm jăk mkŏ mjing jih hnơ̆ng rei kyua dôk huĭ amâo mâo djăp ui. Êdei anei leh mâo kdrăp pui kmlă mrâo hŏng pil yang hrue, snăn klei hdĭp phung knuă druh lĭng kahan hlăm plao ksĭ jăk hĭn leh”.

Êlâo dih, hlăm klei kbưi hŏng lăn hang, dŭm plao ksĭ ti Trường Sa knŏng bi êran hŏng môtơr pui yua êa gazual pui hlăm mbul čhưn dhing, lehanăn mă bruă knuă mơ̆ng phung lĭng kahan lehanăn phung ƀuôn sang hlăm plao ksĭ. Kyuadah klei bi êran pui kmlă hŏng êa pui msĕ snăn jing liê êdi, lehanăn pui kăn hơĭt leh mơh, bi ênai ngañ, lehanăn săp pui lu čhŏ kơ wăl hdĭp mda, kyuanăn knŏng yua mă bhiâo êjai adiê mmăt lehanăn ti mmông čiăng kơh. Ƀiădah 10 thŭn kơnei dŭm boh plao ksĭ ti Trường Sa mâo bruă duh bi liê mkŏ mkra pui kmlă bi êran hŏng pil yang hrue, dưn yua mđiă jăk, mâo angĭn ktang hlăm êa ksĭ mâo leh pui kmlă yua, lehanăn hriăm mjuăt mprăp kơ klei bi blah.

Amâo mâo djŏ knŏng dŭm anăn, jih bruă bi êran pui kmlă doh ti Trường Sa hŏng pil yang hrue lehanăn ai angĭn mâo leh klei ksiêm duah, lông mkra mjing, ciăng kơ bruă mkăp pui kmlă ti Trường Sa knư̆ hrue knư̆ jăk hĭn. Thượng uý Dương Tuấn Hải, kiă kriê kơ bruă pui kmlă hlăm plao ksĭ Đá Đông A lač, plao ksĭ mâo mkŏ mdưm lehanăn lông ba yua pui kmlă doh 3 fa mơ̆ng 3 mlan knhal jih thŭn dih:"Pui kmlă anei ktang snăk, truh 3 fa hơăi nanao, lông ba yua leh ti hnơ̆ng prŏng hĭn, kdlưn hĭn kơ êlan pui 1 fa. Tui si čih hlăm hră mơar 1 h bi êran pui hŏng ai angĭn, lehanăn pil yang hrue hlăm plao ksĭ snăn mâo truh 25kw. Hŏng klei adiê hjan, lehanăn amâo mâo mđiă, mâo mkuôm truh kơ 3 hrue amâo mâo guôn lŏ mbŏ pui, bi ară anei yua hlăm sa hrue knŏng mil 5kw".

Jih jang pui kmlă doh mâo ba yua hŏng kdrăp mrâo mrang, kiă kriê hŏng comupter, lehanăn mâo phung lĭng kahan mbruă kơ klei anei kñăm dưi răng kriê bi jăk pui kmlă hŏng klei êđăp ênang. Trần Văn Đức, mnuih ngă bruă anôk bi êran pui plao ksĭ Tây A lač:"Asei mlei pô kbiă hriê mơ̆ng krĭng taih kbưi, krĭng ƀuôn sang, ară anei dôk mă bruă hŏng kdrăp mrâo mrang, hlăm klei Ăngle klei ala tač êngao sơăi snăn lu mta jing dleh yơh. Ƀiădah bi êpul knhăk mơ̆ng lăn hang amâo mâo pô hriê bi mlih ôh kdrăp bi êran, snăn čŏng bi hriăm êmuh, tui duah klei thâo săng bi jăk hĭn kơ bruă. Phŭn tal êlâo jing dleh êdi, ară anei dơ̆ng mưng leh pŏk hlăm inveter čŏng mkŏ bi êran mă hjăn, snăn pô knŏng kiă kriê kăp ksiêm dlăng nanao đuič”.

Mrâo anei, blŭ hrăm ti anôk mă bruă hŏng phung khua kiă kriê knơ̆ng čar Khánh Hoà, Khua knŭk kna Phạm Minh Chính mñă bi hlue ngă jih jang bruă mđĭ kyar klei duh mkra hlăm êa ksĭ, lehanăn răng mgang klei dưi êngiê wăl êa ksĭ pô, mbĭt hŏng bruă răng mgang klei êđăp ênang bruă kđi čar lehanăn yang ƀuôn, djŏ hlăm jih hdră êlan, klei čuăl mkă hdră mđĭ kyar, rŭ mdơ̆ng kdriêk plao ksĭ jing anôk duh mkra phŭn dhar kreh kơ kluôm ala lehanăn jing alŭ wăl răng mgang kjăp kơ lăn čar, đru bi răng kriê êa ksĭ yuôm bhăn kơ lăn čar: “Mđĭ kyar Trường Sa jing anôk phŭn kơ klei duh mkra ala ƀuôn hlăm êa ksĭ kơ kluôm ala, jing leh anôk kjăp phĭt, răng mgang klei dưi êngiê plao ksĭ, êa ksĭ lăn čar tui si hdră bhiăn drei lehanăn klei bhiăn ala tač êngao, boh nik UNCLOS 1982, lehanăn leh ruĕ ênŭm bruă čuăl mkă snăn ngă tal êlâo kơ bruă mkŏ mjing, rŭ mkra anôk mkăp pui kmlă kăp đru kơ phung trah mă kan, lehanăn kơ phung ƀuôn sang nao hlăm plao ksĭ lŏ dơ̆ng mđĭ kyar bruă duh mkra ala ƀuôn hơĭt kjăp, lehanăn bi kjăp kđông răng mgang ti kdriêk plao ksĭ Trường Sa anei"”/.