VOV4.Êđê - Hruê 26/9, Khua phŭn bruă Lŏ hma – mđĭ kyar krĭng ƀuôn sang Lê Minh Hoan, K’iăng khua Anôk bruă ala čar gĭt gai hdră mdrơ̆ng hŏng klei yan adiê ngă mbĭt hŏng Êpul mă bruă nao ksiêm dlăng leh hdră mdrơ̆ng hŏng angĭn êbŭ mrô 4 ti čar Quảng Ngãi lehanăn nao ksiêm dlăng ênao mgơ̆ng êa Phú Ninh, čar Quảng Nam.

Khua phŭn bruă Lê Minh Hoan nao ksiêm dlăng leh hdră gang mkhư̆ klei klưh hroh lăn ti Cửa Đại, ƀuôn prŏng Hội An, čar Quảng Nam lehanăn hmư̆ klei hưn kơ hdră mdrơ̆ng hŏng angĭn êbŭ mơ̆ng čar Quảng Nam. Khua phŭn bruă Lê Minh Hoan bi mni klei pral kơ bruă mơ̆ng čar Quảng Nam, Quảng Ngãi. Hluê Khua phŭn bruă, dŭm čar anei mâo dua krĭng mdrơ̆ng hŏng angĭn êbŭ, anăn jing ti krĭng êa ksĭ brei ksiêm yap hô̆ mran, mbĕ mnuih ƀuôn sang, bi krĭng čư̆ čhiăng brei mkăp hdră kčah mdrơ̆ng hŏng klei êa đĭ, klưh hroh lăn./.

Mbĭt hŏng krĭng kwar krah, dŭm čar krĭng Lăn Dăp Kngư dôk hluê ngă dŭm hdră êlan bi mdrơ̆ng hŏng angĭn êbŭ mrô 4. Tlam mbruê 26/9, Bruă Đảng čar Kon Tum mkŏ mjing klei kƀĭn online hŏng gưl bruă Đảng nah gŭ, bruă sang čư êa mơ̆ng gưl čar truh kơ să čiăng bi tŭ ư hdră gĭt gai, ktrâo lač bruă bi mdrơ̆ng hŏng angĭn êbŭ. Hluê anăn, mâo klei bi tŭ ư hŏng klei bi êdah mơ̆ng knơ̆ng bruă mtô mjuăt bi hriăm brei phung hđeh mdei sang hră mơ̆ng anei truh kơ êla mâo klei hưn mrâo. Bruă sang čư êa čar Kon Tum mkŏ mjing 3 êpul ksiêm dlăng, gĭt gai bruă bi mdrơ̆ng hŏng angĭn êbŭ ti dŭm kdriêk mâo klei huĭ hyưt msĕ si: Kon Plông, Kon Briah, Ngọc Hồi, Đăk Hà, Tu Mơ Rông leh anăn Đăk Glei. Bruă Đảng čar Kon Tum mtă kơ bruă Đảng nah gŭ, bruă sang čư êa mơ̆ng čar truh kơ să srăng mbĕ mđuê̆ mnuih ƀuôn sang ti dŭm anôk kreh mâo klei êa lêč, dlưh rih lăn, amâo mâo brei mnuih ƀuôn sang găn dŭm anôk ênưih klei jhat truh hlăm wưng mâo hjan prŏng.

H’Nêč ; Y-Ƀel pô mblang