VOV4.Êđê- Hlăm 4 hruê mdei bi hdơr hruê mkŏ mjing ala čar 2/9, Đà Lạt – Lâm Đồng Mâo drông 85.000 čô tuê hui čhưn ênguê. Djăp mta bruă hiu čhưn ênguê dưi rơ̆ng mâo klei jăk, hlăm ênoh phung tuê hriê ti ƀuôn prŏng Đà Lạt hlăm dŭm hruê mdei anăn, mâo 1.500 tuê mơ̆ng ala tač êngao, 13.500 čô tuê hlăm ala čar, hlăm anăn mâo 60.000 gưl dlông hiu čhưn ênguê đăm mlam. Kyua mâo ƀiă tuê msĕ sơnăn, dŭm sang jưh knŏng yua mă kah knar 65% adŭ mdei.

Hlăm jih dŭm hruê mdei, ƀuôn prŏng Đà Lạt amâo mâo ôh klei kpăk đuôm hlăm êlan klông. Djăp mta bruă hiu čhưn ênguê msĕ si huă mnăm, hlăp lêñ, dŭm anôk hiu čhưn ênguê ăt msĕ si yăng đar, amâo mâo êgao hnơ̆ng msĕ hŏng êlâo. Hluê si knơ̆ng bruă Dhar kreh, mjuăt ktang asei mlei leh anăn hiu čhưn ênguê Lâm Đồng, ênoh phung tuê amâo mâo đĭ êgao hnơ̆ng phung tuê hriê hlăm dŭm hruê knhal jih hruê kăm. Klă klơ̆ng, 8 mlan akŏ thŭn anei, kluôm ênoh phung tuê hruê ti ƀuôn prŏng Đà Lạt – Lâm Đồng mâo êbeh 5 êklăk gưl čô, đĭ 153% mkă hŏng wưng anei thŭn dih.

Pô mblang: Y-Ƀel Êban