Klei bi lông hriăm jih gưl 3 thŭn anei, čar Lâm Đồng mâo êbeh 14 êbâo čô hđeh bi lông. Mbĭt hŏng dăp 39 anôk bi lông, 670 adŭ bi lông ti 12 kdriêk, ƀuôn prŏng hlăm čar, Lâm Đồng ăt mprăp djăp ênŭm klei găl kdrăp mnơ̆ng leh anăn mnuih mă bruă truh êbeh 2.600 čô đru hlăm klei bi lông hriăm jih gưl 3.

Čiăng rơ̆ng klei bi lông mkŏ mjing êđăp ênang, hruê 27/6, Knơ̆ng bruă sang čư̆ êa čar Lâm Đồng mâo hră mơar mjêč gĭt gai Knơ̆ng bruă sang hră mtô bi hriăm, Knơ̆ng bruă sang čư̆ êa dŭm kdriêk, ƀuôn prŏng leh anăn dŭm anôk bruă djŏ tuôm kƀĭn gĭt gai djăp ênŭm, bi jăk klei găl. Hlăm anăn, amâo brei hlei pô lui klei bi lông kyua klei găl găn êrô dleh dlan amâodah klei hdĭp dleh dlan, boh nik phung hđeh kbưi, mnuih djuê ƀiă, anak čô gŏ êsei ƀun./.