VOV4.Êđê- Hruê kăm êgao, Êpul gơ̆ng bruă ƀuôn sang čar Lâm Đồng mrâo mkŏ mjing Klei bi kƀĭn mkrah thŭn, kñăm bi trông lehanăn tă hdră msir mghaih dŭm klei êdu kƀah, lŏ dơ̆ng mtrŭt mđĭ kyar hdră duh mkra – ala ƀuôn 6 mlan knhal jih thŭn 2022. Hlăm anăn, čar lŏ dơ̆ng pŏk ngă tŭ dưn Hdră bruă ala čar kñăm mkŏ mkra krĭng ƀuôn sang mrâo, bi hrŏ klei ƀun knap h’ĭt kjăp, mguôp hŏng hdră mđĭ kyar krĭng mnuih ƀuôn sang djuê ƀiă lehanăn krĭng čư̆ čhiăng, boh nik jing bruă kriê dlăng, pŏk hdră duh bi liê tŭ dưn dŭm phŭn mkăp prăk mâo Anôk bruă kƀĭn ala, knŭk kna mkăp.

Hluê si klei hưn mdah hlăm klei kƀĭn tal 6 êpul gơ̆ng bruă ƀuôn sang čar Lâm Đồng gưl 10, 6 mlan akŏ thŭn 2022, bruă duh mkra ala ƀuôn hlăm alŭ wăl dưi mâo lu boh tŭ êdah êdi. Hlăm anăn, kdlưn hĭn jing hnơ̆ng bruă duh mkra đĭ 9,29%, hnư knŭk kna hrui wĭt mâo 7.800 êklai prăk, knar hŏng 71,5% klei tĭng mkă alŭ wăl leh anăn đĭ êbeh 22% mkă hŏng wưng anei thŭn dih. Hnơ̆ng klei mnia mblei ăt mâo êbeh 436 êklăk USD, đĭ 43%, leh anăn phung tuê hiu čhưn ênguê mâo êbeh 3,7 êklăk gưl čô, đĭ 86,5% mkă hŏng wưng anei thŭn 2021. Dŭm mta bruă bi hơĭt klei hdĭp yang ƀuôn, bi hrŏ klei ƀun ƀin, klei êđăp ênang bruă kđi čar, yang ƀuôn dưi rơ̆ng kjăp.

Êngao kơ dŭm boh tŭ dưi mâo, čar Lâm Đồng ăt dôk tuôm hŏng lu klei dleh dlan, kpăk êgun, boh nik jing bruă răng mgang dliê, ksiêm dlăng mnơ̆ng gŭ lăn, lăn ala, bruă čuăl mkă… Blŭ hlăm klei kƀĭn, Trần Đức Quận, khua hlăm bruă Đảng gưl dlông, khua bruă Đảng čar, khua êpul gơ̆ng bruă ƀuôn sang čar Lâm Đồng brei thâo, anei jing dŭm klei dleh kpăk čiăng kñăm bi trông, hlăk mblang, tui duah hdră êlan čiăng mgaih msir, mtrŭt mđĭ bruă duh mkra ala ƀuôn. Trần Đức Quận lač:

Hlăm klei kƀĭn anei, phung bi ala êpul gơ̆ng bruă ƀuôn sang čar kñăm ksiêm duah klă grăp mta phŭn, bi trông, hlăk mblang klă nĭk, ktrâo klă phŭn agha dŭm boh tŭ dưn dưi mâo ăt msĕ hŏng dŭm klei dleh kpăk, ba mdah dŭm hdră êlan mgaih msir hlăm klei đĭ kyar bruă duh mkra ala ƀuôn, rơ̆ng klei êđăp ênang bruă kđi čar, yang ƀuôn ti alŭ wăl.

 Klei bi kƀĭn tal 6 Êpul gơ̆ng bruă ƀuôn sang čar Lâm Đồng

Hlăm klei êmuh leh anăn wĭt lač klei êmuh, khua gĭt gai čar Lâm Đồng mñă klă, kyua ngă êdu hlăm bruă ksiêm dlăng klei myơr lăn ngă êlan ktŭng ba lu klei truh amâo jăk. Hlăm anăn, ƀuôn prŏng Bảo Lộc leh anăn kdriêk Bảo Lâm jing anôk mâo lu klei myơr lăn ngă êlan, leh anăn mâo klei mbha čuê, mbha anôk ti čar Lâm Đồng. Hluê si klei tĭng mkă ka ênŭm mơ̆ng anôk bruă djŏ tuôm, mâo ƀiă êdi 50ha mơ̆ng giăm 200 čô myơr leh kơ knŭk kna, hlăm anăn mâo pô myơr hŏng ênhă êbeh 10ha. Klei năng lač, leh myơr lăn kơ knŭk kna, diñu lŏ čŏng pô duah pŏk êlan bê tông leh anăn gŭ drŏng mkŏ hŏng dŭm bĭt êlan mkăn hlăm alŭ wăl.

Trần Văn Hiệp, khua bruă sang čư êa čar Lâm Đồng brei thâo, bruă mnuih ƀuôn sang myơr lăn ngă êlan jing kyua klei tŭ kơ pô kñăm mâo ênŭm klei găl čiăng mbha čuê, mbha anôk djŏ hŏng hdră bhiăn. Lu hlăm dŭm kdriêk, ƀuôn prŏng amâo mâo ngă ôh hră mơar tŭ mă, ksiêm dlăng lăn myơr, êjai anăn dŭm ênhă lăn anei wăt kơ mâo klei bi klă hrui wĭt dôk leh hlăm klei knŭk kna kriê dlăng. Lui mâo klei mnuih ƀuôn sang, dŭm gŏ sang, grăp čô čŏng ngă bruă mkra êlan amâo mâo djŏ hŏng hdră čuăl mkă leh anăn klei bhiăn ala čar. Ktŭng mbĭt mâo lu klei mbha čuê, mbha anôk, mkŏ mjing alŭ ƀuôn sang leh anăn hưn ba čhĭ. Trần Văn Hiệp brei thâo:

 “Boh sĭt klei myơr lăn ngă êlan mrâo klă klơ̆ng jing mkŏ mjing dŭm alŭ ƀuôn sang mrâo čiăng rang mdah. Bruă sang čư êa kdriêk Bảo Lâm, ƀuôn prŏng Bảo Lộc brei klei dưi kơ dŭm gŏ sang, grăp čô mlih klei yua lăn mơ̆ng lăn ngă lŏ hma jing lăn mdơ̆ng sang ƀiădah ka mâo ôh dŭm klei čuăl mkă. Ngă truh mâo lu boh klei hlăm bruă ksiêm dlăng, čuăl mkă lăn, mkŏ mjing hlăm alŭ wăl, ngă truh lu klei amâo mâo jăk leh anăn hmăi kơ klei đăo knang, klei hĭng alŭ wăl Lâm Đồng. Čar mâo leh hră mtrŭn gĭt gai dŭm dhar bruă, alŭ wăl hluê ngă djŏ dŭm mta phŭn djŏ tuôm hŏng bruă mbha čuê, mbha anôk hlăk akŏ mlan 7. Rơ̆ng kyua klei tŭ kơ mnuih ƀuôn sang, knơ̆ng bruă leh anăn bruă klam ngăn prăk hŏng knŭk kna.

 Phưi tha kriê dlăng lăn myơr ngă êlan ngă mâo lu klei amâo jăk

Hluê si tur knơ̆ng dŭm boh tŭ hluê ngă dŭm bruă klam mđĭ kyar bruă duh mkra – ala ƀuôn 6 mlan akŏ thŭn 2022 leh anăn đăo knăl boh sĭt hlăm mmông kơ anăp, Êpul gơ̆ng bruă ƀuôn sang čar Lâm Đồng bi tŭ ư leh kơ dŭm hdră êlan hluê ngă dŭm bruă klam mđĭ kyar bruă duh mkra – ala ƀuôn 6 mlan knhal jih thŭn 2022 hŏng klei gĭr bi leh êgao hnơ̆ng dŭm hdră kčah mơ̆ng bruă sang čư êa bi klă, mbĭt anăn mñă ktang dŭm hdră êlan yuôm bhăn kñăm kơ anăp msĕ si: Lŏ dơ̆ng ksiêm dlăng, bi klă dŭm hnơ̆ng čoh čuăn, bruă klam hluê si hdră mtrŭn mơ̆ng bruă Đảng čar, Êpul gơ̆ng bruă ƀuôn sang čar kơ klei đĭ kyar bruă duh mkra ala ƀuôn, rơ̆ng bruă lĭng kahan – klei êđăp ênang thŭn 2022. Mbĭt anăn nao mbĭt leh anăn mâo hdră mkăp grăo mlan, grăp wưng tlâo mklan čiăng hluê ngă mâo boh tŭ dưn dŭm hdră mtrŭn mơ̆ng bruă kƀĭn ala, mơ̆ng knŭk kna kơ dŭm hdră êlan gĭt gai hluê ngă hdră êlan mđĭ kyar bruă duh mkra ala ƀuôn leh anăn tĭng mkă ngăn prăk knŭk kna thŭn 2022. Čŏng pô hnưm mkŏ mjing hdră êlan mđĭ kyar bruă duh mkra ala ƀuôn leh anăn tĭng mkă ngăn prăk knŭk kna thŭn 2023. Lŏ dơ̆ng hluê ngă mâo boh tŭ dưn hdră ala čar kñăm hlăm bruă mkŏ mkra krĭng ƀuôn sang mrâo, bi hrŏ klei ƀun ƀin, nao mbĭt hŏng hŏng hdră mđĭ kyar krĭng mnuih djuê ƀiă leh anăn čư̆ čhiăng, boh nik jing bruă ksiêm dlăng, duh bi liê mâo boh tŭ dưn dŭm ênoh ngăn prăk mơ̆ng bruă kƀĭn ala, knŭk kna mrâo mkăp brei.

Pô mblang: Y-Ƀel Êban