Êngao kơ dŭm boh tŭ dưn dưi mâo, Bruă duh mkra ala ƀuôn thŭn 2023 čar Lâm Đồng ăt tuôm hŏng lu klei dleh dlan, 4/18 hnơ̆ng čuăn ka dưi bi leh djŏ hŏng hdră kčah. Khădah bruă duh mkra rơ̆ng ti hnơ̆ng đĭ kyar 5,63% ƀiădah ka mâo klei hơĭt leh anăn kjăp. Bruă tuh tia – bruă mkŏ mkra đĭ kyar ƀiă, bruă mkra mjing, mnia mblei mơ̆ng mnuih ƀuôn sang, knơ̆ng bruă amâo mâo găl kyua hmăi mơ̆ng klei prăk luč ênoh, ênoh mnơ̆ng dhơ̆ng đĭ yuôm.

Bruă hrui wĭt prăk knŭk kna ăt tuôm hŏng klei dleh dlan, hlăm anăn ênoh hrui mơ̆ng prăk jia, tla hnô mâo mă 87,8%, hrui mơ̆ng sang dôk, lăn yua knar hŏng 85,8% klei tĭng mkă mơ̆ng alŭ wăl. Êngao kơnăn, klei brei čan duh bi liê bruă knŭk kna adôk êmưt, tla hnô, ruh mgaih anôk ala adôk tuôm hŏng lu klei dleh dlan. Bruă iêo jak klei duh bi liê, boh nik jing ngăn prăk bi liê mơ̆ng ala tač êngao dôk êmưt. Bruă mlih mrâo klei ngă hră mơar knŭk kna, bi hơĭt wăl duh bi liê mnia mblei ka mâo djăp hŏng klei čuăn.