VOV4.Êđê - Mơ̆ng thŭn 2018 truh kơ ară anei, anôk bruă djŏ tuôm čar Lâm Đồng hmao ƀuh leh anăn ngă hră mơar ƀuah mkra êbeh 1.000 klei bi rai dliê, hŏng kluôm ênhă dliê rai êbeh 223ha. Knŏng hjăn mkrah akŏ thŭn 2022 mâo leh 80 klei bi rai dliê, ênhă dliê rai đĭ giăm 30% mkă hŏng wưng anei thŭn dih.

Hluê si knơ̆ng bruă lŏ hma leh anăn mđĭ kyar krĭng ƀuôn sang čar Lâm Đồng, lu hlăm ênhă dliê rai jao leh kơ dŭm knơ̆ng bruă ƀiădah amâo mâo hluê ngă hdră mkăp, amâodah hluê ngă êmưt, amâo mâo tiŏ nao êpul êya răng mgang. Čar hrui wĭt leh 208 hdră mkăp mơ̆ng dŭm knơ̆ng bruă hŏng ênhă dliê êbeh 30.000ha. Mbĭt anăn, ksiêm duah, dưn yua kdrăp mrâo mrang hlăm bruă kriê dlăng, mđĭ hnơ̆ng tŭ jăk hlăm bruă kriê dlăng dliê mơ̆ng dŭm knơ̆ng bruă hlăm alŭ wăl. Ngô Văn Ninh, khua adŭ bruă, pô blŭ bi ala mơ̆ng bruă sang čư êa čar Lâm Đồng brei thâo, čar dôk dưn yua hrăm mbĭt lu hdră êlan ktang phĭt kñăm răng mgang dliê.

Y-Ƀel pô mblang