VOV4.Êđê - Tui si knơ̆ng bruă dhar kreh, mjuăt asei mlei, hiu čhưn ênguê čar Lâm Đồng, halwm wưng Tết Nguyên Đán Nhâm Dần 2022 (mơ̆ng hrue 29 mlan knhal tuič thŭn hlŏng truh kơ hrue 6 tết), Lâm Đồng mâo drông leh êbeh 300 êbâo gưl čô tue nao čhưn mơak yan mnga, mdei msăn, đĭ hĭn truh 566% ênoh tue mkă hŏng tết Nguyên Đán Tân Sửu 2021. Hlăm anăn tue hlŏng đih đăm truh 120 êbâo čô, lehanăn tue mơ̆ng ala tač êngao mâo 1 êbâo 900 gưl čô mnuih, lu jing bi kluh nao čhưn kơ ƀuôn prŏng Đà Lạt. Ênoh phung tue hiu čhưn lu hĭn êdi jing hlăm hrue 2 tết truh hrue 6 tết, êjai anăn dôk anôk sang jưh anôk đih mdei dưi djăp truh êbeh 95% ênoh ba yua. Hŏng ênoh tue đĭ pral, tơl hnơ̆ng mâo mmông amâo lŏ mâo adŭ ôh, ênoh ênil ăt đĭ mơ̆ng 30 - 40% mkă hŏng hrue yăng đar, hnơ̆ng mnuih ngă bruă hlăm dŭm boh sang jưh djăp ênoh čuăn jăk. Anei jing klei bi knăl jăk čiăng kơ dhar bruă hiu čhưn ênguê čar mđĭ kyar pral, êjai dôk hlăm klei aguah tlam mrâo./.

Y -Khem pô mblang