Bruă krŭ wĭt ana durian leh êa lip dưi kčưm ngă ti dŭm să Cát Tiên leh anăn Cát Tiên 2, anôk mâo dŭm êtuh ha ana durian êa êngăp. Knuă druh anôk bruă mtrŭt mđĭ bruă lŏ hma čar Lâm Đồng klă anăp mtô kơ bruă mđoh êa hlăm đang pla mjing, mbĭt anăn ngă bruă mgaih msir mnơ̆ng ngă, brŭ agha, pruê hbâo leh anăn gang mkhư̆ klei mnơ̆ng ngă sui.

Mbĭt hŏng bruă mtô kơ hdră mnêč, Anôk bruă mtrŭt mđĭ bruă lŏ hma čar Lâm Đồng ăt bi mguôp hŏng dŭm anôk bruă, knơ̆ng bruă đru sa kdrêč êa drao sinh học, kdrăp yua bruă lŏ hma đru kơ mnuih ƀuôn sang pral krŭ wĭt đang pla mjing. Kluôm čar Lâm Đồng ară anei mâo 42.500ha durian, hlăm anăn lu ênhă pla ti krĭng tlung alŭ wăl Dhŭng čar./.