VOV4.Êđê- Čar Gialai hlăk dôk nga djăp hdră mdrơ̆ng hŏng angĭn êbŭ mrô 4. Anăn jing hwai mdoh mnuôr mbông êa, khăt mkra adhan kyâo ktuê êlan dơ̆ng, bi hrŏ klei kyâo êbuh. Truh tlam mbrue (27/9), anôk bruă kiă kriê bruă bi mdoh ƀuôn prŏng Pleiku hgŭm leh hŏng anôk bruă khăt mkra kyâo mtâo ƀuôn prŏng nao mkra jih jang ana kyâo boh nik dŭm ƀĕ adhan kyâo ksuă dlông ti êlan Lê Hồng Phong, Lê Duẩn, Phan Bội Châu. Mbĭt anăn, djăp êpul êya nao hwai mdoh mnuôr mbông êa êlan êa đoh ti hnoh êa hlăm ƀuôn prŏng.

Hlue si klei đăo knăl mơ̆ng Anôk đăo knăl yan adiê Lâm Đồng, kyua hmăi mơ̆ng angĭn êbŭ mrô 4, hlăm 48 truh 72 mmông kơ anăp, ti čar Lâm Đồng mâo adiê hjan man dưn truh kơ prŏng, lu anôk mâo êa lip leh anăn klưh lăn. Hdră gang mkhư̆ yan adiê ngă, mdrơ̆ng hŏng angĭn êbŭ mrô 4 hlăk mâo dŭm êpul bruă djŏ tuôm čar Lâm Đồng pŏk ngă.

Hlue si đăo knăl, angĭn êbŭ mrô 4 amâo tuh hriê ti čar Lâm Đồng ôh ƀiădah kyua angĭn ktang snăk anăn alŭ wăl hmăi, huĭ srăng mâo êa lip leh anăn klưh hroh lăn. Kyua anăn, Anôk bruă gĭt gai gang mkhư̆ klei yan adiê ngă leh anăn tui duah phung mâo klei truh čar Lâm Đồng gĭt gai dŭm kdriêk, ƀuôn prŏng, dŭm anôk bruă mjêč pŏk ngă dŭm hdră gang mkhư̆ amâo dưi ngă ngơi mang ôh.

Pô mblang: Y-Khem Niê