Hlue anăn, Knơ̆ng bruă sang čư̆ êa čar Lâm Đồng mtă kơ dŭm anôk bruă, dŭm kdriêk leh anăn ƀuôn prŏng Đà Lạt, Bảo Lộc mkŏ mjing ktuê dlăng, hmao thâo ƀuh dŭm krĭng huĭ klưh hroh, êa lip, êngăp êa, boh nik dŭm krĭng mâo mnuih ƀuôn sang, sang hră, anôk bruă, sang mkra mjing…

Gĭr mbĕ đuĕ mnuih leh anăn ngăn drăp mơ̆ng krĭng wăl, amâodah mâo hdră pral rơ̆ng êđăp ênang klei hdĭp, mkhư̆ luč liê kơ ngăn drăp, amâo brei mâo boh klei bi kngăr. Mbĭt anăn, pral mâo hdră dăp, đru, hơĭt kjăp anôk dôk, klei hdĭp mda kơ dŭm gŏ sang brei mbĕ đuĕ. Hjăn kdriêk Dam Rông, Knơ̆ng bruă sang čư̆ êa čar Lâm Đồng gĭt gai msir mgaih boh jhat klưh hroh lăn ti să Dă K’Nàng, êmuh hrăm, mđĭ ai, đru kơ gŏ sang mâo mnuih djiê.