Hlăm wưng êgao, grăp blư̆ mâo gưl pŏk ngă klei mkiêt mkriêm hrăm mbĭt kyua mnuih ƀun snăn Nguyễn Thị Xuân An, ƀuôn hgŭm mrô 3, ƀuôn prŏng Đà Lạt, čar Lâm Đồng mđing hgŭm ngă. Hŏng ñu, ênoh prăk amâo lu ôh ƀiădah jing yuôm snăk, hrăm mbĭt hŏng êpul êya, ala ƀuôn mđing kơ mnuih ƀun, phung dleh dlan, đru digơ̆ dưi mâo ênoh prăk čan čiăng bi liê mđĭ kyar bruă duh mkra gŏ sang. Nguyễn Thị Xuân An, lač:

“Kâo pô grăp thŭn ngă sơăi. Si tô hmô thŭn êlâo mơĭt ƀiă snăn thŭn anei gĭr mơĭt lu hĭn, ngă nanao snăn yơh. Thŭn anei kâo mơĭt prăk mkiêt mkriêm mâo 20 êklăk, đăo tĭng hruê 14/3 lŏ nao ti ƀuôn hgŭm mơĭt thiăm”.

 Anei jing thŭn tal 4 Knơ̆ng prăk đru ba ala ƀuôn čar Lâm Đồng bi hgŭm hŏng Knơ̆ng bruă mặt trận čar kwar Việt Nam leh anăn dŭm êpul hgŭm čar mkŏ mjing pŏk ngă klei mơĭt prăk mkiêt mkriêm kyua mnuih ƀun. Hlue anăn, ênoh phung mđing truh, hgŭm mơĭt prăk mkiêt mkriêm mơ̆ng hdră ƀrư̆ hruê ƀrư̆ lu, ênoh prăk mguôp ăt ƀrư̆ hruê ƀrư̆ đĭ mơh. Mơ̆ng 24 êklai prăk leh gưl pŏk ngă tal êlâo, truh tal 3 snăn ênoh prăk đĭ truh 130 êklăk prăk mơĭt mkiêt mkriêm hrăm mbĭt kyua mnuih ƀun.

Hlue si Nguyễn Hữu Quang, K’iăng Khua Knơ̆ng prăk đru ba ala ƀuôn čar Lâm Đồng, hdră mơĭt prăk mkiêt mkriêm hrăm mbĭt kyua mnuih ƀun lar bra ktang hlăm dŭm gưl mnuih ƀuôn sang ti alŭ wăl. Tal 4 anei, Hdră mơĭt mkiêt mkriêm hrăm mbĭt kyua mnuih ƀun srăng sui hlăm sa mlan, čang hmăng iêô jak thiăm lu mnuih hgŭm, mđing truh.

“Thŭn anei, mơĭt prăk mkiêm mkriêm hrăm mbĭt kyua mnuih ƀun sui truh sa mlan. Hmei ăt čang hmăng bruă knuă ngă nanao lu hĭn srăng brei kơ mnuih ƀuôn sang hgŭm djăp ênŭm hĭn. Hmei êngao kơ bruă mkŏ mjing ti anôk bruă, snăn dŭm hruê mă bruă ti dŭm anôk bruă ti dŭm să, ƀuôn hgŭm, wăl krah srăng lŏ dơ̆ng mkŏ mjing čiăng kơ mnuih ƀuôn sang, anôk bruă duh mkra ti alŭ wăl đru mguôp hlăm hdră”.

 Truh wưng anei, leh êbeh 1 hruê kăm pŏk ngă, hdră mơĭt prăk mkiêt mkriêm hrăm mbĭt kyua mnuih ƀun ti Lâm Đồng iêô jak êbeh 1.400 čô đảng viên, knuă druh, phung mă bruă knŭk kna, phung mă bruă leh anăn mnuih ƀuôn sang hgŭm pŏk giăm 1.600 hră mkiêt mkriêm, hŏng ênoh prăk đĭ truh êbeh 67 êklai prăk.

Võ Ngọc Hiệp –  Khua Anôk bruă Đảng čar, K’iăng Khua Knơ̆ng bruă sang čư̆ êa car Lâm Đồng, Khua Anôk bruă bi ala Êpul gơ̆ng gĭt gai Knơ̆ng prăk đru ba ala ƀuôn čar Lâm Đồng, lač: Bruă mkŏ mjing “Mlan mơĭt prăk mkiêt mkriêm hrăm mbĭt kyua mnuih ƀun” jing yuôm bhăn snăk, kñăm bi mâo prăk bi djăp klei čiăng čan prăk kơ mnuih ƀun leh anăn phung knŭk kna đru ba mkăn, đru hlue ngă hdră kñăm bi hrŏ ƀun hơĭt kjăp ti čar. Mbĭt anăn, mjing klei bi mlih kơ klei thâo săng leh anăn bruă ngă mơ̆ng dŭm gưl, dŭm dhar bruă leh anăn kluôm ala ƀuôn hlăm bruă mjing phŭn prăk brei čan kơ ala ƀuôn; mtrŭt mjhar dŭm anôk bruă duh mkra, anôk bruă knŭk kna, phung mă bruă knŭk kna leh anăn dŭm gưl mnuih ƀuôn sang hlăm čar Lâm Đồng bi êdah bruă ngă jăk siam, mđĭ lar ai tiê bi khăp bi đru hŏng phung ƀun leh anăn phung êdu awăt hŏng hdră mơĭt prăk mkiêt mkriêm hlăm Knơ̆ng prăk đru ba ala ƀuôn bi êdah “Bruă ngă điêt ba klei yuôm bhăn prŏng” čiăng mjing thiăm klei găl “Hrăm mbĭt kyua mnuih ƀun leh anăn phung knŭk kna dlăng ba mkăn”.

Bi hrŏ ƀun hơĭt kjăp jing hdră êlan prŏng mơ̆ng Đảng, Knŭk kna leh anăn jing bruă jih jang mnuih ƀuôn sang hgŭm, klei khăp yuôm bhăn, jing klei mĭn sa anăn mơ̆ng Đảng, Knŭk kna hlăm hdră mkŏ mjing bruă duh mkra tă hdră ala ƀuôn jing phŭn. Brei čan prăk mơ̆ng Knơ̆ng prăk knŭk kna đru ba ala ƀuôn jing sa hlăm hdră đru bi hrŏ ƀun kyua Đảng, Knŭk kna hlue ngă leh anăn ti čar Lâm Đồng bruă brei čan prăk đru ba ala ƀuôn mđĭ lar leh boh tŭ prŏng prĭn, mkŏ mjing krĭng ƀuôn sang mrâo, rơ̆ng klei êđăp ênang ala ƀuôn ti alŭ wăl.

Mđing kơ hdră “kluôm ala hrăm mbĭt kyua mnuih ƀun- amâo brei hlei pô ti tluôn” mâo Khua knŭk kna pŏk ngă, hlăm 3 thŭn êgao “mơĭt mkiêt mkriêm hrăm mbĭt kyua mnuih ƀun” mâo Knơ̆ng prăk đru ba ala ƀuôn čar Lâm Đồng bi hgŭm hŏng 4 êpul bruă kđi čar ala ƀuôn mkŏ mjing tŭ jing hŏng klei hgŭm mơ̆ng lu phung hgŭm, êdam êra leh anăn mnuih ƀuôn sang hlăm čar đru mguôp jăk hlăm bruă mkŏ mjing phŭn prăk mbŏ kơ Knơ̆ng prăk đru ba ala ƀuôn brei phung ƀun ƀin leh anăn phung knŭk kna dlăng ba mkăn dưi čan./.