VOV4.Êđê - Mơ̆ng akŏ thŭn truh kơ ară anei, čar Lâm Đồng mâo leh êbeh 50 klei bi rai dliê, hlăm anăn mâo 14 klei ka dưi bi mklă ôh phung ngă soh. Anôk bruă djŏ tuôm mâo ngă leh hră mơar mghaih msir truh 47 klei, hlăm anăn mâo 4 klei soh ba phat kđi, hrui mă êbeh 84m³ kyâo hgăl djăp mta lehanăn ba jao kơ knŭk kna êbeh 789 êklăk prăk. Hlăm ênoh anei, êdah êdi, lehanăn dleh dưi mghaih msir jing 5 klei bi rai dliê prŏng hlăm dŭm kdriêk Lạc Dương, Dam Roong, lehanăn Bảo Lâm.

Ară anei dŭm anôk bruă kahan ksiêm dôk ksiêm, bi mklă hră mơar ba phat kđi mnuih ngă soh. Tui si knơ̆ng bruă lŏ hma čar Lâm Đồng, amâo mâo knŏng klei bi rai dliê, ƀiădah klei bi ksĭng mmiă lăn dliê hlăk đĭ mơh. Kbiă hriê mơ̆ng klei bi čhĭ lăn đĭ, lu mnuih amâo lŏ uêñ ôh hŏng klei bhiăn ngă lu bruă amâo lŏ djŏ. Hŏng jih jang ênhă lăn luič anei dŭm dhar bruă djŏ tuôm ngă ktang ruh mgaih lehanăn brei lŏ wĭt pla dliê, lehanăn phat mkra ktang phung ngă soh./.

Y-Khem pô mblang