Kơ klei klưh hroh lăn kjham ti dŭm kčŭn čư̆ D’ran leh anăn Gia Bắc, Bruă sang čư̆ êa čar Lâm Đồng bi klă ba mdah boh klei mjêč kơ klei truh yan adiê hŏng êlan dơ̆ng mrô 20 leh anăn 28. Bruă sang čư̆ êa alŭ wăl ngă lu hdră êlan bi mdrơ̆ng, msĕ si kpơ̆ng mdhă hưn brei răng, amâo mâo brei mnuih găn êrô, ngă bruă mbĕ mnuih ƀuôn sang nao ti anôk êđăp ênang. Êpul êya ngă bruă gak răng 24/24 čiăng ksiêm dlăng, bi klă phŭn agha leh anăn mâo hdră êlan mgaih msir. Dŭm gưl hjan prŏng mrâo anei ngă kơ taluy gang dua nah êlan kčŭn čư̆ D’ran leh anăn Gia Bắc ksak đuê̆, bi kpăk hlăm êlan klông. Bruă sang čư̆ êa čar mñă kơ dŭm anôk bruă djŏ tuôm mjêč mgaih msir, rơ̆ng kơ klei êđăp ênang kơ mnuih leh anăn êdeh êdâo, nĕ kơ lŏ mâo klei klưh hroh hlăm wưng kơ anăp.

Ti anăp klei mâo dleh dưi ksiêm dlăng mơ̆ng angĭn êbŭ Kalmaegi, đăo knăl srăng mŭt hlăm krĭng ksĭ Ngŏ hruê 5/11, Anôk bruă sang čư̆ êa čar Gia Lai ba mdah leh asăp mtrŭn mjêč, mtă brei pŏk ngă dŭm hdră mdrơ̆ng ti hnơ̆ng đĭ hĭn 1 gưl. Dŭm knơ̆ng, dhar bruă, alŭ wăl mtă brei pŏk ngă hdră gang mkhư̆ klei angĭn êbŭ, adiê hjan êa lip lêč, kluh lăn mơ̆ng hnưm; gĭr, mbĕ mnuih ƀuôn sang ti krĭng trăp, djiêu hnoh êa, ping čư̆ huĭ hyưt, ngă leh êlâo kơ hruê 4/11. Anôk bruă sang čư̆ êa čar mtă brei hluê ngă kjăp hdră “4 tinei mtam”, amâo lui bluh mâo klei truh kơ mnuih. Knơ̆ng gĭt gai lĭng kahan čar mprăp mnuih, kdrăp mnơ̆ng, boh nik kdrăp êlan êa lehanăn êdeh phiơr amâo pô mgăt mkăp kơ hdră ksiêm dlăng, đru dŏng. Knơ̆ng bruă Lŏ hma – wăl hdĭp mda, Knơ̆ng bruă tuh tia mnia mblei bi hgŭm kriê knơ̆ng kdơ̆ng êa djŏ tuôm, rơ̆ng klei êđăp ênang./.