Êbeh sa mlan hŏng anei leh, nai mtô Cil Kồng, nai ti sang hră gưl 3 Lang Biang, wăl krah Lạc Dương, kdriêk Lạc Dương, čar Lâm Đồng pioh leh lu mmông ksiêm duah, čiăng bi leh hră mơar čih mkra klei mtô, lehanăn lŏ mbŏ dŭm mta mrâo djŏ hŏng hdră mjuăt bi hriăm. Nai brei thâo, čiăng thâo mtô, snăn phung nai lŏ nao hriăm dŭm boh adŭ mjuăt bi hriăm hdră mtô mrâo, pioh mprăp kơ gưl hriăm mrâo thŭn 2024-2025:

 “Thŭn hriăm mrâo anei, sang hră ba yua hdră mjuăt bi hriăm mơ̆ng thŭn 2018. Phung nai hmei mprăp leh djă ênŭm jih jang bruă pioh kơ klei mtô bi hriăm. Êngao kơ nao hlăm dŭm anôk mjuăt hriăm hdră mtô bi hriăm mrâo, hriăm kơ klei ba yua hdruôm hră bi hriăm mrâo, ksiêm mkă hnơ̆ng hdră mtô bi hriăm hlue hŏng hdră êlan mrâo, hmei lŏ bi kjăp jih jang klei thâo hmei mtô hđeh, čiăng bi leh jăk hdră mtô bi hriăm, čhuang nao hlăm thŭn hriăm mrâo. Rơ̆ng kơ jih jang bruă mtô bi hriăm ti sang hră klă sĭt mâo boh tŭ dưn hĭn”.

          Mbĭt hŏng bruă mđĭ klei thâo hlăm hdră mă bruă hlăm phung nai mtô, sang hră gưl 3 Lang Biang lŏ bi msiam jih jang sang hră, duh bi liê blei mprăp jih jang mnơ̆ng mtô lehanăn hriăm, bi djŏ hŏng hdră bi hriăm mơ̆ng thŭn 2018. Tui si Hoàng Viết Phương, K’iăng khua sang hră, thŭn hriăm mrâo mâo truh 14 boh adŭ hŏng êbeh 600 čô hđeh hriăm hră, hlăm anăn hđeh mnuih djuê ƀiă êgao mkrah. Mbĭt hŏng klei čiăng rơ̆ng mâo djăp klei găl mtô lehanăn hriăm, sang hră mđing mơh duh kơ alŭ wăl anôk phung hđeh hriăm hră dôk đih đăm huă ƀơ̆ng, boh nik hŏng phung hđeh mnuih djuê ƀiă.

 “Sang hră mâo alŭ wăl rŭ mdơ̆ng sang kơ phung hđeh dôk jưh ti sang hră, mâo djăp sang đih đăm sang huă ƀơ̆ng hŏng phung hđeh mơ̆ng kbưi msĕ si ti să Lát lehanăn Đưng K’Nơ̆, mâo mơ̆ng 80 truh 100 čô hđeh hriăm hră. Mbĭt hŏng anăn, sang hră ăt ngă jăk bruă mđrăm mbĭt hŏng yang ƀuôn mjuăt bi hriăm, lehanăn mâo klei iêo mthưr blei mprăp lu mta mnơ̆ng pioh kơ hđeh mjuăt asei mlei, blei aban mŭng, duh mĭn kơ klei phung hđeh huă ƀơ̆ng.  Knŭk kna ăt mđing đru kơ sang hră lu mơh, duh bi liê mnơ̆ng mnuă yua kơ phung hđeh hlăm sang hră”.

          Ti Daklak, êlâo kơ thŭn hriăm mrâo, hlăm ai tiê mơak nao kơ sang hră, phung nai mtô lehanăn hđeh hriăm hră krĭng taih kbưi krĭng dleh dlan hlăm čar lŏ mâo klei mơak hĭn tơdah mâo mŭt hriăm hlăm sang hră mrâo lŏ wĭt mkra bi msiam. Lê Ngọc Quyết, Khua sang hră gưl sa Kim Đồng, să Čư̆ Kbang, kdriêk knông lăn Ea Sup, čar Daklak lač, Čư̆ Kbang jing să dleh dlan êdi, mâo 95% jing hđeh hriăm hră mnuih djuê ƀiă. Mrâo anei, sang hră kdriêk Ea Sup duh bi liê rŭ mdơ̆ng sa boh sang hră mnâo 2 tal hŏng 10 boh adŭ hriăm, mâo mnư̆ mnang ƀăng jang kjăp, wăl tač betong.

     “Sang hră bŏ hŏng klei mơak mâo dŭm boh adŭ hriăm jăk siam snăn, mâo mbha hriăm aguah lehanăn tlam. Sang hră ktưn truh jih thŭn 2024 srăng djăp ênoh čuăn sang hră gưl ala čar ti hnơ̆ng mrô 1”.

Hŏng kdriêk krĭng taih kbưi Krông Bông, čar Daklak jing anôk dôk lu klei dleh dlan, kdriêk gĭr iêo jak leh jih jang ai dưi bi đru lŏ mkra wĭt sang hră, blei mprăp mnơ̆ng mnuă yua kơ thŭn hriăm mrâo. Y-Thưk Êban, k’iăng khua knơ̆ng bruă sang čư̆ êa kdriêk Krông Bông, lač:

 “Knơ̆ng bruă sang čư̆ êa kdriêk gĭt gai leh adŭ bruă sang hră kdriêk bi hgŭm hŏng dŭm alŭ wăl, lehanăn dŭm êpul êya sang hră mơar lŏ ksiêm wĭt jih mnơ̆ng dhơ̆ng yua hlăm sang hră hlăm kdriêk. Ksiêm dlăng ya mta bruă čiăng duh mĭn êlâo, lehanăn ya mta bruă srăng ngă êdei, mkă tĭng hlue hŏng ngăn prăk mâo, kñăm ngă bi jăk djăp ênŭm, dah ka dưi djăp mơh, srăng dăp ngă ya mta bruă jing tal êlâo ngă bruă anăn yơh”.

         Ti kdriêk M’Gar, čar Daklak Nguyễn Tự Do, Khua adŭ bruă sang hră mơar brei thâo mă mơ̆ng lu anôk mkăp prăp, thŭn anei alŭ wăl mâo duh bi liê leh êbeh  42 êklai prăk pioh rŭ mdơ̆ng mkra wĭt, lehanăn lŏ blei mprăp mnơ̆ng yua hlăm sang hră:

      TĐ: “Lŏ ksiêm dlăng jih jang mnơ̆ng mnuă yua pioh kơ bruă mtô lehanăn hriăm. Êngao kơ jih jang klei mprăp jih jang bruă pioh mkŏ mjing sang hră bi djăp ênoh čuăn gưl ala čar, rơ̆ng bi djăp hŏng ênoh čuăn tui si bruă Đảng kdriêk, knơ̆ng bruă sang čư̆ êa kdriêk mtrŭn leh”.

         Thŭn hriăm 2024-2025, hŏng akŏ “Klei bhiăn kjăp hlăm klei thâo uêñ klam, mlih mrâo amâo mâo mdei, mđĭ hĭn hnơ̆ng kjăp”, čar Daklak bi ktưn čiăng kơ jih jang dŭm boh alŭ ƀuôn mâo sơăi sang hră, hnơ̆ng ênoh adŭ hriăm kjăp truh 93%, hnơ̆ng ênoh sang hră djăp ênoh čuăn ala čar êbeh 60%.