VOV4.Êđê-Hruê mbruê 7/7, Êpul gơ̆ng bruă ƀuôn sang čar Lâm Đồng gưl 10 pŏk kčưm leh klei kƀĭn tal 6 čiăng bi trông leh anăn ba mdah dŭm hdră êlan mgaih msir dŭm klei dleh kpăk, lŏ dơ̆ng mtrŭt mđĭ bruă duh mkra ala ƀuôn mơ̆ng alŭ wăl. 6 mlan akŏ thŭn 2022, bruă duh mkra ala ƀuôn čar Lâm Đồng dưi mâo lu boh tŭ êdah êdi. 

Hlăm anăn êdah hĭn jing bruă duh mkra đĭ 9,29%, hnư prăk knŭk kna hrui wĭt mâo 7.800 êklai prăk, đĭ êbeh 22% mkă hŏng wưng anei thŭn dih. Hnơ̆ng klei mnia mblei ăt mâo êbeh 436 êklăk USD, đĭ 43% leh anăn phung tuê hiu čhưn ênguê mâo êbeh 3 êklăk 700 êbâo gưl čô, đĭ 86,5% mkă hŏng wưng anei thŭn thŭn 2021.

Bruă bi hơĭt klei hdĭp yang ƀuôn, bi hrŏ klei ƀun ƀin, rơ̆ng klei êđăp ênang bruă đi čar leh anăn yang ƀuôn. Êngao kơ dŭm boh tŭ dưn dưi mâo, čar Lâm Đồng ăt dôk tuôm hŏng lu klei dleh dlan, klei kpăk gun, boh nik hlăm bruă răng mgang dliê, mnơ̆ng hlăm gŭ lăn, lăn ala, bruă čuăl mkă…Klei kƀĭn bi klă anei jing dŭm klei dleh kpăl čiăng mâo klei kñăm bi trông, hlăk mblang, tui duah hdră êlan mgaih msir, mtrŭt mđĭ bruă duh mkra ala ƀuôn đĭ kyar.

Pô mblang: Y-Ƀel Êban