VOV4.Êđê- Ktuê êlan êran pral Dầu Giây-Liên Khương mâo boh taih dlông hlăm brô 200km, dưi kah mbha 3 kdrêč bruă: Dầu Giây - Tân Phú, Tân Phú - Bảo Lộc lehanăn Bảo Lộc - Liên Khương. Hlăm anăn, 2 hdră bruă: Tân Phú- Bảo Lộc lehanăn Bảo Lộc - Liên Khương, mâo boh taih giăm 140km mâo bruă sang čư̆ êa čar Lâm Đồng – anôk bruă knŭk kna mâo klei dưi hluê ngă. Hluê Anôk bruă sang čư̆ êa čar Lâm Đồng, čar srăng mkăp 4.500 êklai prăk hlăm ênoh 16.200 êklai kơ 66 km êlan êran pral Tân Phú - Bảo Lộc; mkăp 10.800 êklai hlăm ênoh 12.000 êklai prăk kơ 73 km êlan êran pral Bảo Lộc-Liên Khương.

Anei jing ênoh bi liê ngăn prăk lu êdi mơ̆ng êlâo truh kơ ară anei ti Lâm Đồng kơ hdră bruă êlan klông. Trần Văn Hiệp, Khua anôk bruă sang čư̆ êa čar Lâm Đồng brei thâo, êlan êran pral Dầu Giây- Liên Khương jing klei čang hmăng prŏng mơ̆ng phung knuă druh lehanăn mnuih ƀuôn sang čar Lâm Đồng. Kyua anăn, čar gĭr mprăp klei jăk găl hĭn čing duh kơ hdră anei leh mâo Khua knŭk kna bi mklă hdră mtrŭn duh bi liê./.

                                                    Pô mblang: H’Nêč Êñuôl