Siămdah, truh jih mlan 10, kluôm čar mrâo bi liê mă giăm 30% hdră kčah. Mâo dŭm bruă prŏng, ƀiădah hnơ̆ng bi liê ngăn prăk dôk êmưt, boh nik bruă mkra êlan dơ̆ng pral Bảo Lộc - Liên Khương lehanăn Tân Phú - Bảo Lộc, hŏng ênoh mka tĭng jih jang jing êbeh 5.000 êklai prăk, ƀiădah ka bi liê ngăn prăk ôh. Kyua dôk gun kpăk hlăm bruă ruh mgaih anôk ala, mbĭt hŏng yan adiê hjan nanao, lehanăn ai dưi mă bruă mơ̆ng phung duh mkra dôk êmưt.

Ti anăp klei êmưt bi liê ngăn prăk snăn, knơ̆ng bruă sang čư̆ êa čar  Lâm Đồng mta leh kơ phung duh mkra mđĭ hĭn bruă klam, ksiêm kjăp klei mă bruă, mghaih msir ktang dŭm êpul bruă êmưt. Lehanăn knơ̆ng bruă sang čư̆ êa ƀuôn hgŭm anôk mâo bruă rŭ mkra, bi pral ruh mgaih anôk ala, mă mtam bruă hruê lehanăn mlam, rơ̆ng dưi ruh mgaih anôk ala ênŭm ba jao kơ êpul ngă bruă. Dŭm knơ̆ng dhar bruă djŏ tuôm ăt mâo jao klei bi hgŭm kjăp ruh mgaih jih djăp bruă dun kpăk, klei ngă hră mơar, lehanăn mâo nanao klei hâo hưn grăl gưl kơ knơ̆ng bruă sang čư̆ êa čar./.