VOV4.Êđê - Hruê 9/8, Knơ̆ng bruă Êlan klông dŭ mdiăng Lâm Đồng brei thâo, êpul anei dôk mjêč mkra giăm 5 km êlan kčŭn čư̆ Mimosa – jhat rai leh sa wưng dôk guôn prăk duh bi liê. Êlan kčŭn čư̆ Mimosa, ktuê êlan phŭn mŭt, kbiă hlăm ƀuôn prŏng Đà Lạt (Lâm Đồng) dlông giăm 11 km. Anei jing ktuê êlan mâo lu êdeh prŏng êbeh 1,5 ton găn êrô kñăm bi hrŏ klei nao găn êlan kčŭn čư̆ Prenn.

Khă snăn, kyua hnơ̆ng êdeh gănlu, êlan kčŭn čư̆ Mimosa jhat rai leh kjham. Mlan 6/2021, Phŭn bruă Êlan klông dŭ mdiăng mkăp leh prăk kơ Knơ̆ng bruă Êlan klông dŭ mdiăng Lâm Đồng ngă pô duh bi liê, mkra mđĭ. Ênoh mkăp mâo 34,5 êklai prăk srăng hluê ngă hdră mkra hlăm brô 6 km, bi 5 km adôk ka dưi duh prăk mkra kyua anăn ktuê êlan anei hlăk jhat rai. Ară anei, prăk duh kơ 5 km adôk mâo leh Phŭn bruă Êlan klông dŭ mdiăng mkăp, čar Lâm Đồng srăng mjêč hluê ngă lehanăn tĭng srăng bi leh hlăm mlan 11 kơ anăp./.

H’Nêč pô mblang