Bruă sang čư̆ êa dŭm alŭ wăl hŏng êpul bruă djŏ tuôm čar Lâm Đồng dôk mjêč msir boh jhat lŏ dơ̆ng pral mdrơ̆ng hŏng êa lip. Hŏng boh klei êngăp êa ti dŭm să, ƀuôn hgŭm nah Ngŏ, êa lip, klưh hroh ăt mâo ti nah Yŭ čar Lâm Đồng ngă kơ sa čô mnuih djiê leh anăn gun kpăk hlăm lu ktuê êlan.

      Anôk bruă gĭt gai gang mkhư̆ đru kơ bruă sơ wil čar Lâm Đồng brei 124 să, ƀuôn hgŭm hŏng êpul bruă djŏ tuôm mkŏ mjing êpul gak răng jih hruê mlam; ksiêm dlăng dŭm wăl mnuih ƀuôn sang ktuê hang krông, krĭng tlung huĭ mâo êa lip. Hŏng dŭm krĭng khăng mâo klei klưh hroh lăn, êngăp êa msĕ si kčŭn čư̆ Đại Ninh- êlan dơ̆ng ala čar 28B, kčŭn čư̆ Sông Pha- êlan dơ̆ng ala čar mrô 27, kčŭn čư̆ Gia Bắc - êlan dơ̆ng ala čar mrô 28… dŭm să nah Ngŏ krĭng tlung brei mâo nanao mnuih gak răng, kdrăp mnơ̆ng đru dŏng tơdah mâo klei čiăng.