Hlăm anăn, dŭm anôk hiu čhưn ênguê ti čar hrăm mbĭt mkra mđĭ, mđĭ hnơ̆ng jăk mnơ̆ng dhơ̆ng hiu čhưn ênguê. Mbĭt hŏng bruă rơ̆ng hnơ̆ng jăk dŭm hdră bruă, bruă hiu čhưn ênguê čar Lâm Đồng lŏ dơ̆ng pŏk ngă hdră “hruê yuôm bhăn”, “mmông yuôm bhăn”, iêo jak lu anôk bruă duh mkra ti čar mđing leh anăn pŏk ngă dŭm hdră đru mdul, msĕ si bi hrŏ ênoh sang jưh, hră mŭt hiu dlăng, mđup brei mnơ̆ng bi hdơr, amâo mă prăk đa đa tuor hiu čhưn… čiăng iêô jak tue hiu čhưn.

Hruê kăm yuôm bhăn hiu čhưn ênguê Lâm Đồng thŭn anei mâo akŏ “Lâm Đồng- Anôk truh mơ̆ng Mnga leh anăn klei kdŏ mmuñ”, jing klei yuôm bhăn pŏk kơ gưl hiu čhưn ênguê yan mdei prŏng thŭn 2024. Kyua anăn, êngao kơ rơ̆ng hnơ̆ng jăk dŭm mta mnơ̆ng dhơ̆ng, bruă kriê dlăng knŭk kna hlăm dŭm bruă ăt dôk mâo anôk bruă djŏ tuôm ti čar pŏk ngă.