VOV4.Êđê- Ti anăp ênoh mnuih ruă Covid 19 hlăm čar đĭ lu, hruê 24/2, Anôk bruă sang čư̆ êa čar Lâm Đồng mâo leh hră m’ar gĭt gai dŭm êpul êya djŏ tuôm, anôk bruă sang čư̆ êa dŭm kdriêk, ƀuôn prŏng hlăm čar mđĭ hdră gang mkhư̆ klei ruă tưp. Hlăm mkrah mlan êgao, ênoh mnuih ruă Covid 19 mrâo ti Lâm Đồng đĭ êbeh 285% hŏng êbeh 12.000 čô ruă, mđĭ ênoh mnuih djŏ Covid 19 hlăm čar êbeh 25.700 čô. Klei năng mđing, hlăm ênoh mnuih ruă Covid 19 mrâo, mâo lu jing phung hđeh lehanăn nai mtô. Tĭng mơ̆ng hruê 7/2 truh kơ ară anei, mrô ksiêm yap ka klă ênŭm brei ƀuh, mâo ƀiă êdi 1.700 čô hđeh hriăm hră lehanăn dŭm êtuh čô nai mtô djŏ Covid 19. Anôk bruă sang čư̆ êa čar Lâm Đồng mtă kơ Anôk bruă sang hră m’ar mtô bi hriăm Lâm Đồng ksiêm dlăng nanao hdră gang mkhư̆ klei ruă tưp ti dŭm sang hră, anôk mtô bi hriăm hlăm alŭ wăl, msir mghaih ktang hlei anôk bruă, mnuih ngă soh hŏng hdră gang mkhư̆ klei ruă Covid 19. Anôk bruă sang čư̆ êa čar Lâm Đồng ăt gĭt gai Knơ̆ng bruă mdrao mgŭn Lâm Đồng pŏk hdră tlŏ vaccine gang mkhư̆ Covid 19 pral hĭn, boh nik tlŏ aruăt tal 1 lehanăn 2 kơ mnuih mơ̆ng 12 thŭn kơ dlông lehanăn aruăt lŏ mñă, aruăt thiăm mbŏ kơ mnuih mơ̆ng 18 thŭn kơ dlông, wăt hŏng mnuih mơ̆ng krĭng mkăn. Rơ̆ng hlăm mlan 2/2022 anei, 100% ênoh mnuih mơ̆ng 12 thŭn kơ dlông dưi tlŏ vaccine./.

                                                    Pô mblang: H’Nêč Êñuôl